Zııaly qaýym zııaly oı bildirdi

Keshe Qazaqstan Prezıdentiniń Alma­tydaǵy  rezıdensııasynda Memlekettik hatshy – Syrtqy ister mınıstri Qanat Saýdabaev qazaq ádebıetiniń bir top qalamgerlerin jáne respýblıkadaǵy belgili aqparat quraldary jetekshilerin qabyldap, alqaly kezdesý ótkizdi. Kezdesýge kelgender arasynda kórnekti ǵalym, synshy, akademık Serik Qırabaev, Memlekettik syılyqtyń laýreattary Sherııazdan Eleýkenov, Dýlat Isabekov, Orazbek Sársenbaev, Nurlan Orazalın, jazýshylar Maral Sqaqbaev, Beksultan Nurjekeev, mádenıettanýshy Murat Áýezov, t.b. qalamgerler, sonymen qatar, “Qazaqstan” teleradıokorpora­sııa­synyń prezıdenti Janaı Omarov, “Qazaq gazetteri” JShS tóraǵasy Jumabek Kenjalın, belgili basylymdar bas redaktorlary Jumabaı Shashtaıuly, Baqyt Sarbalaev, Ulyqbek Esdáýletov, Nurtóre Júsip, Shámshıdın Pátteev, Qalı Sársenbaev, Janarbek Áshimjan boldy. Kezdesý barysynda Memlekettik hatshy elimizdiń EQYU-ǵa tóraǵalyǵy men eki jarym aıdan keıin Astanada ótetin Uıym Sammıti jaıynda baıandaı kele, Memleket basshysynyń rýhanı salany damytýǵa turaqty túrde qamqorlyq pen qoldaý kórsetip kele jatqanyn atap ótti. – 8 aıdan beri Qazaqstan álemdegi eń bedeldi de beldi uıymnyń biri – EQYU-ǵa tóraǵa bolyp otyr, – dedi Qanat Saýdabaev. – Sondaı-aq, 11 jyl­ǵa sozylǵan úzilisten keıin Uıym­ǵa múshe elder Memleket basshylary­nyń sammıti Aqordada ótpekshi. Sam­mıtke álemniń 67 elinen Uıymǵa qa­tysýshy memleketter basshylarynyń jáne áriptes memleketter jetekshi­leri­niń kelýi – el tarıhynda bol­ma­ǵan aıtýly oqıǵa. Onyń ústine jıyn táýelsizdigimizdiń 20 jyldyǵy qar­sańynda ótkeli tur. Bul – Qazaqstan­nyń táýelsizdik jyldarynda qol jetkizgen orasan zor tabystary men jetistikterin halyqaralyq qaýym­dastyqtyń baǵalaýy. Ári úlken ha­lyqaralyq tabys, úlken jeńis, ortaq qýanysh. Mine, osy úlken jeńisti, or­taq qýanyshty elimizdiń rýhanı, mádenı salasyndaǵy tulǵalar retinde basy-qasynda bolyp, halyqqa jet­kizetin, oılaryńyzben bólisetin siz­der. Sondyqtan Elbasy sizderge osy sálemin joldap, halyqaralyq jıynǵa úlken úles qosady dep úmit artyp otyr. О́z kezeginde sóz alǵan ádebıet qaıratkerleri rýhanı salany turaqty túrde qoldap, qamqorlyqqa alyp kele jatqany úshin Memleket basshysyna rızashylyq sezimderin bildire kele, Qazaqstan tarıhynda erekshe oqıǵa bolyp sanalatyn salıqaly jıyn týraly óz oılaryn ortaǵa saldy. Bel­gili ádebıetanýshy-ǵalym Serik Qırabaev qalamgerlerdiń jeltoqsan aıynda ótetin úlken halyqaralyq jıyn ótkizýge atsalysýǵa, bizdiń osy saladaǵy qol jetken jetistikterimiz ben tabystarymyzdy nasıhattaýǵa, ekinshi jaǵynan syrt eldermen qarym-qatynastarymyz jóninde pikir bildirýge shaqyrylǵanyn alǵa tartty. “Mine, soǵan barlyǵymyz da biraýyz­dan tilek qostyq. Bul elimizdiń, Pre­zı­dentimizdiń úlken abyroıy jáne hal­qymyzdyń álemge tanylatyn, kóri­netin mezgili týǵandaı”, dedi akademık. Bul basqosýdy rýhanı keńistiktiń altyn arqaýy retinde atap ótken Ja­zý­shylar odaǵynyń tóraǵasy Nurlan Orazalın jyl basynan beri EQYU-nyń Is basyndaǵy tóraǵasy mindetin atqaryp kele jatqan Qanat Bekmyr­zaulymen ótken áńgime qalamgerler úshin de, bılik úshin de, halyq úshin de keleli keńes ekenin jetkizdi. “Olaı deıtin sebebimiz, qazaq halqynyń myńdaǵan jylǵa sozylatyn uly tarıhyna kóz jú­girt­sek, qazaq hal­qynyń memleket retinde qalyp­tasqan ­handyq, ár­túrli ordalardyń quramynda, ulystardyń jeke-jeke bıliginde bolǵan kezeńderin bilemiz. Biraq, tutasyp, shyn maǵyna­syndaǵy álem tanyǵan úlken irgeli memleket bolýy – HH ǵasyrdyń sońǵy on jyl­dyǵynda júzege asqan úlken oqıǵa, ult úshin úlken qubylys. Sol jıyrma jylǵa jetpeıtin ýa­qyt ishinde óziniń táýelsizdigin alyp, endi-endi qanattanyp, el ta­nyp úlgergen memlekettiń álemdegi úlken beldi halyqaralyq uıymdy basqarýy – halyq úshin, memleket úshin úlken jeńis. Al endi onyń obektıvti, sýbektıvti fak­tor­la­ryn túgendep kelgen kezde tulǵa, el deıtin uǵym bolady. Iаǵnı, eliń­di basqarǵan tulǵańa baılanysty sizdiń memleketińiz, elińiz jóninde baǵa berile bastaıdy”, dedi N.Orazalın. Ári qaraı Nurlan Orazalın qalaı degende de álem moıyndap, baǵalaǵan jaýapty kezeńde turǵa­nymyzdy aıta kelip, qalamgerler qaýymy eldiń osyndaı úlken emtıhandy abyroıly aıaqtaýǵa, jeltoqsan aıynda ótetin Uıym Sammıtiniń qarsańynda óz únderin qosatyndyǵyna senim bildirdi. Uıǵyr ádebıeti keńesiniń tór­aǵasy, jazýshy-dramatýrg, “Qurmet Belgisi” ordeniniń ıegeri Ahmetjan Ashırı da búgingi kezdesýdiń úlken máni bar dep esepteıdi. Elbasy halyq úshin, halqynyń baqyty úshin qyrýar jumys atqaryp jat­qanda, álemge tanylǵan Kóshbas­shy jaıynda óz oılaryn jetkizý zııaly qaýymnyń paryzy dep biledi. Sondaı-aq, Qazaqstanda 132 ult ókilderi turatyn bolsa, uı­ǵyr­lar bir tamyrly ­– tilimiz de, dinimiz de bir túrki halyqtary ekenin, al Elbasynyń týysqandyq, tatýlyq­tan qymbat uly qasıet joq­tyǵyn aıtqan danyshpandyq oılaryn oqyrmandarymyzǵa jet­kizýge múddeli ekendigin erekshe yqylas­pen atady. Gúlzeınep SÁDIRQYZY.