Indýstrııalandyrý isi ulttyq ıdeıa deńgeıine kóterilmek

Premer-Mınıstr Kárim Másimovtiń tóraǵalyǵymen selektorlyq keńes túrinde ótken keshegi Úkimet otyrysynda Elbasynyń tikeleı tapsyrmasymen qolǵa alynǵan elimizdi ındýstrııalandyrý isine barynsha mańyz berý, ony ulttyq ıdeıa deńgeıine kóterý týraly keleli áńgime boldy. Osy másele jónindegi aǵymdaǵy istiń barysy týraly baıandama jasaǵan Indýstrııa jáne jańa tehnologııalar vıse-mınıstri Berik Kamalıevtiń aıtýy boıynsha, bıylǵy jylǵa jalpy quny 840 mıllıard teńgeni quraıtyn 144 jobany júzege asyrýdyń jospary jasalǵan bolatyn. Osynyń negizinde elimizde 20 myńnan astam jańa jumys orny qurylýy tıis. Ústimizdegi jyldyń birinshi jartysynda 131 mıllıard teńgeniń 72 ınvestısııalyq jobasy júzege asqany belgili. Bul 12 myńnan astam turaqty jumys ornyn qurýǵa múm­kindik berdi. Endi ekinshi jarty­jyl­dyqta 559 mıllıard teńgeniń 72 jo­basy júzege asýǵa tıis bolatyn. Onyń 4-ýi qazirdiń ózinde iske qosylǵan. О́mirdiń árdaıym ózgeriske beıim turatyndyǵy belgili. Sol sekildi belgilengen jobalardy iske qosýda azdaǵan ózgerister bar sekildi. Máse­len, Indýstrııa jáne jańa tehno­lo­gııalar mınıstrliginiń ár aı saıyn jergilikti atqarý organdarymen birlesip ótkizetin májilisterinde 12 jobany iske qosý merziminiń kelesi jylǵa aýysty­rylýy múmkin ekendigi baıqalyp otyr. Onyń esesine Pre­zıdent Ákimshiliginiń memlekettik ıns­pektorlarymen óńirlerge baryp, jaǵdaımen tanysyp, máselelerdi talqylaý barysynda elimizdiń ın­dýstrııalyq kartasyna qosymsha 83 jobany qosý múmkindigi anyq­tal­ǵan. Bul jobalardyń 27-sin bıyl aıaqtaýdyń tolyq múmkindikteri bar.  Mine, osyndaı ózgeristerdi esepke alatyn bolsaq, ústimizdegi jyldyń ekinshi jartysynda jıyny 80 joba iske qosylmaq. Sonymen ómir ózgeristerdiń ózi ınvestısııalyq jobalardy belgilep, olardy iske asyrý merzimin aıqyndaǵan tusta  el ekonomıkasynda oń ózgerister bar ekendigin kórsetip otyr. Úkimet basshysy Kárim Mási­mov júzege asyrylatyn ındýs­trııa­­lyq jobalardyń máselesin talqy­laı kele bul iske neǵurlym tere­ńi­rek ári keńirek aýqym be­riletin­digin atap kórsetti. Onyń aıtýyn­sha, budan bylaıǵy ýa­qytta elimizdi ındýs­trııa­landyrý isi ulttyq ıdeıa deń­geıine kóte­ri­lýi tıis. Úkimet bas­shysynyń osy sózin munan keıin sóz ke­ze­gin alǵan Premer-Mı­nıstr­diń orynbasary – In­dýs­trııa jáne jańa tehnologııalar mı­nıstri Áset Isekeshovtiń ja­sa­ǵan baıan­damasy tolyǵymen qýat­tap shyq­ty. Endigi kezekte bizdiń eli­miz­degi basty nazar naq osy máse­lege aýdarylmaq. Orta­lyq jáne jer­gilikti memlekettik organ­dardyń birinshi basshy­la­ry­nyń jumy­sy naq osy ıdeıa­nyń júzege asy­rylýymen baǵala­natyn bola­dy. Elimizge ınvestı­sııa tartý isine barynsha pármen beriledi. Osyǵan oraı Premer-Mı­nıstr Kárim Másimov tıisti or­gandardyń aldyna birqatar jańa tapsyrmalar berdi. Aldyn-ala esepteýlerge qara­ǵanda, elimizdiń shıkizattyq emes sektoryna taıaý­daǵy 4 jyldyń ishinde 30 mıl­lıard dollardyń ınvestısııasyn tartý múmkindigi bar eken. Osy múm­kindikti júzege asyrý úshin ákim­der óńirlerge ın­vestısııa tar­týdyń barlyq múmkindik­terin qarastyratyn bolady. Sony­men qatar ındýstrııalandyrý kar­ta­syna engizilgen jobalardy jú­ze­ge asyrýshy kásipkerlerdi tek­se­rý­ge moratorıı jarııalaý jónin­de El­basy qaraýyna usynys engiziletin boldy. Osyǵan oraı Ádilet mı­nıstrligine qoıylǵan máseleni júzege asyrýdyń jol­daryn qaras­tyrý tapsyryldy. Oblys jáne qala ákimderine 2 aptanyń ishinde ózderi min­detine alǵan jobalardyń jaǵ­daıyn sol jerge bara otyryp qaıta bir tek­serý júkteldi. So­ny­men qatar Úki­met basshysy údemeli ındýstrııa­lyq-ınnova­sııa­lyq damýdyń mem­le­kettik baǵdarlamasyn odan ári júzege asy­rýǵa qatysty birqatar tap­syr­malar berdi. Árbir oblys ákimi men memlekettik organnyń basshysyna ózderi basqaratyn ba­ǵyttar boıynsha 2 aıdyń ishin­de ǵylymı-ınnovasııalyq damý­dyń múmkindikteri men tetikterin anyq­taý tapsyryldy. Sonymen qatar 10 kúnniń ishinde ındýs­trııa­landyrýdy basqarý orta­lyǵyn qurý týraly qaý­lynyń jobasyn ázirleý mindet­teldi. Otyrysta Baılanys jáne aq­parat mınıstri Asqar Jumaǵa­lıev sóz alyp, ındýstrııa­lan­dyrý isin, onyń mańyzyn halyq­qa jetkizý jóninde ázirlenip jatqan sharalar  jóninde aıtyp berdi. Mınıstr elimizde jasalǵan árbir ónimge, usaq taýarlardan bas­tap quras­ty­ry­latyn avtokó­lik­ter, túrli teh­nıkalarǵa deıin “Qazaqstanda ja­salǵan” degen belgini qoıýdy, sony­men qatar bir kúndi Indýstrııa­lan­dyrý kúni dep ataýdy usyndy. Mı­nıstr­diń pikirinshe, árbir qazaq­standyq eli­mizde júzege asyry­lyp jatqan údemeli ındýs­trııalyq-ın­nova­sııalyq damý baǵdar­lamasynyń nátıjeleri­men jaq­sy tanys bolýy kerek. Osyǵan oraı mı­nıstrlik óz tarapynan birqatar jańa sharalar ázirleý ústinde. Osy otyrysta sonymen qatar qysqa ázirlik máselesi qaraldy. Atalǵan másele jóninde habar­lama jasaǵan Indýstrııa jáne jańa tehnologııalar vıse-mı­nıstri D.Tur­ǵanovtyń aıtýynsha, jalpy daı­yndyq barysy jaman emes. Degenmen, keıbir jerlerde mazýt jet­kizý isiniń ótken jyl­men salys­tyrǵanda, tómen eken­dingi baıqaldy. Atalǵan eki másele jóninde ınteraktıvti baılanys arqyly bar­lyq oblys basshylary sóz alyp, ózderindegi jaǵdaıdy aıtyp berdi. Suńǵat ÁLIPBAI.