Almatylyq polıseıler qylmyspen kúreste ózderiniń TMD elderindegi áriptesterine de kómek qolyn sozýda. Almaty qalalyq ishki ister departamenti baspasóz qyzmetiniń jetekshisi Saltanat Ázirbektiń aıtýynsha, ońtústik astanada jyl basynan beri buryn izdeýde júrgen 244 qylmysker quryqtalǵan. Olardyń 159-y Qazaqstan quqyq qorǵaý organdarynyń izdeýinde bolǵan.
Al, Almaty qalasynda ustalǵan 89 qylmyskerge TMD elderiniń quqyq qorǵaý organdary halyqaralyq izdestirý jarııalaǵan. Elimizdegi eń iri jáne halyq tyǵyz ornalasqan qala – Almatyda jasyrynyp, izin sýytýǵa umtylatyn qylmyskerlerdiń jolyn kesý baǵytynda qalalyq IID birqatar yqpaldy is-sharalardy júzege asyrýda. Sóz reti kelgende atap aıtarlyǵy, qolǵa túskenderdiń arasynda asa aýyr qylmys jasaǵandar da bar.
– Máselen, Reseıdegi Cheboksary qalasynyń mılısııasy izdestirgen 59 jastaǵy er adam talaılardy jer soqtyryp, olardan iri kólemdegi aqshany aldap alǵan alaıaq bolyp shyqty. Qylmystyq is materıalynda onyń Qazaqstanda týǵandyǵy kórsetilgendikten Cheboksary qalasy Lenın aýdandyq ishki ister bóliminiń tergeýshileri onyń óz týystary turatyn tarıhı otanyna qashýy múmkin ekenin jobalaǵan.
Izdestirilýde júrgen alaıaq qaladaǵy Raıymbek dańǵylyndaǵy bir úıden tabylyp, ustaldy. Taıaýda ol Reseı Federasııasyna ekstradısııalanady. Bir quptarlyǵy, sala mamandarynyń kásibı sheberligine, iskerlik tájirıbesine oraı qandaı qashqyn bolmasyn óz qylmysynyń jazasyn tartatyny aıdaı aqıqat, deıdi Almaty qalalyq IID krımınaldy polısııa basqarmasynyń bólim bastyǵy, polkovnık Vadım Strelsov.
Shyn mánisinde, ótirik sııaqty qylmystyń da qadamy qysqa ekendigin dáleldep jatýdyń qajeti joq sııaqty. Búginde almatylyq quqyq qorǵaýshylar qylmyspen kúres jáne onyń aldyn alý baǵytyndaǵy birqatar tıimdi is-sharalardy júzege asyrýda.
Baqyt BALǴARINA, Almaty.