Tulpardyń qadiri artqan kún
Báıge dese delebesi qozyp, qıqý qosyp: “Er qanaty – at”, dep jelpinetin halyq ótken senbide Kókbastaý atshabar alańyna aǵyldy. Jyl saıynǵy úrdis bıyl da jalǵasyp, Ata Zańymyzdyń 15 jyldyǵy qurmetine Prezıdent kýbogyn sarapqa salǵan ulttyq at sporty oıyndarynan respýblıkalyq jarys jalaýy kóterilip, alaman, top, qunan báıge men jorǵa jarysyna baby kelisken, talaı dodalarda aýzymen qus ilgen 157 sáıgúlik jarys jolyna shyqty.
Prezıdent kýbogy sarapqa túsken báıge júldesine jeti jańa avtokólik tigilip, tulpar men shabandozdardyń jaýapkershiligin eseleı tústi.
Kókbastaý jazyǵyndaǵy atshabar alańyndaǵy bókterdi jaǵalaı jaıǵasqan jankúıerler aldynan bas tóreshi Oryntaı Ámirǵalıev bastaǵan shabandozdar sap túzep ótkende qustaı ushqan tulparlardy jazbaı tanyp jatty. Oblys ákimi Serik Úmbetov kópshilik aldynda at sportynyń salamatty ómir saltyn qalyptastyrýdaǵy mán-mańyzyna toqtalyp, bıyl dástúrli merekeniń 12 ret ótkizilgenin, óńirde bul sharaǵa laıyqty nazar aýdarylǵanyn atap ótti. Aldaǵy kezde de ulttyq dástúrge saı onyń aıasyn keńeıtý baǵytyndaǵy jumys jalǵasatynyn jetkizdi. Halqymyzda: “At shappaıdy, bap shabady”, degen maǵynaly sóz beker aıtylmaǵan. Búgingi jarys jolyna júzden júırik sáıgúlikter shyǵatyny anyq. Olaı bolsa tulparlaryńyz tabysty bolyp, attaryńyz ben baptaryńyz qatar shapsyn, dedi.
Taqymyn qysyp, ekpindegen shabandozdarǵa Almaty oblysynyń qurmetti azamaty Izbasar Baltaǵulov bata bergen soń, 11 shaqyrymdyq qashyqtyqtaǵy qunan báıge bastaldy. Alǵashqy aınalymda-aq ekpindegen attardyń qatary sırep, máre syzyǵyn Bolat Ábishulynyń qyrany qıyp, avtokólikti ıelendi. Al, top báıgege jal-quıryǵy súzilgen 50 tulpar qosyldy. Bul joly ózgelerden oq boıy ozǵan almatylyq Ýálıhan Ábdiralıevtiń “Atıllasy” birinshi kelip, sheteldik avtokólikti ıesine syılasa, Soltústik Qazaqstannan kelgen Birjan Shaımerdenovtiń “Nur Otany” ekinshi orynǵa shyǵyp, temir tulpar kiltin aldy.
Báıge jolyndaǵy 9 shaqyrymda júrisinen jazbaǵan jorǵalardan asyǵy alshysynan túsken Jambyl oblysynan kelgen Bóten Súleımenovtiń “Tachankasy” avtokólik, ekinshi oryndy Jambyl aýdanynyń, úshinshi oryndy astanalyq Arman Tóleýovtiń “Fransýzy” qanjyǵasyna baılady.
Alaman báıgeniń orny bólek ekeni belgili. “Alýan-alýan júırik bar, áline qaraı júgirer” demekshi bul báıgege 46 júırik qosylyp, aınalym saıyn shashasyna shań juqtyrmaǵan júırikter bir úmit, bir kúdikti jankúıerlerdiń degbirin qashyrdy. Desek te baǵy janǵan Jambyl aýdanynyń kelisti torqasqa “Gaýhar” atyna zaty saı ekenin dáleldep, ózgelerdi shań qaptyryp, bas báıge “Djıp” avtokóligi men Prezıdent kýbogyn jeńip aldy. Budan keıingi birinshi, ekinshi oryndarǵa tigilgen avtokólikterdi Qarasaı aýdany men Astana qalasynyń tulparlary enshiledi. Kókbastaý jazyǵyn merekege bólegen ulttyq at sporty jarysy osylaısha aıaqtaldy.
Sýretterde: Kókbastaýda ótken jarys sátinen.
Kúmisjan BAIJAN, Almaty oblysy.