10 qyrkúıekte Almatyda Shanhaı yntymaqtastyq uıymyna múshe memleketter Qarýly kúshteri bas shtabtary bastyqtarynyń qatysýymen áskerı-saıası keńes bolyp ótkeni belgili. Osy jıynda jattyǵý sheńberindegi lańkestikke qarsy operasııalardy oryndaý týraly bas shtab bastyqtary qol qoıǵan birlesken jedel dırektıva jattyǵý jetekshilerine tapsyrylǵan bolatyn.
Osyǵan baılanysty keshe “Mátibulaq” áskerı polıgonyndaǵy dalalyq lagerde “Beıbit mıssııa-2010” dep atalatyn lańkestikke qarsy birlesken áskerı oqý-jattyǵýy bastaldy. Onyń ashylý rásiminde Uıymǵa kiretin Qazaqstan, Qytaı, Reseı, Tájikstan jáne Qyrǵyzstannyń úsh myńnan astam adamdy quraıtyn áskerı bólimsheleri tolyqtaı sap túzedi. Sóıtip mundaǵy áskerı oıyndarǵa qatysatyn jeke quram men tehnıkalar legi Qazaqstanǵa tolyqtaı kelip bitti. Olar aldaǵy eki apta boıy ótetin ázirlikterge saqadaı-saı tur.
“Beıbit mıssııa-2010” birlesken áskerı oqý-jattyǵýlaryn Qazaqstan Respýblıkasy Qorǵanys mınıstrligi Shtabtar bastyqtary komıteti tóraǵasynyń birinshi orynbasary general-maıor Muqan Dúısekeev ashty. Ol óz sózinde bizdiń elimizde ótkizilip otyrǵan osyndaı keń kólemdegi jattyǵýlardyń Shanhaı yntymaqtastyq uıymyna múshe memleketter úshin úlken mańyzǵa ıe ekenin atap ótti.
Budan keıin áskerı qyzmetshilerdi Qytaı halyqtyq azat etý armııasy Bas shtaby bastyǵynyń orynbasary general-polkovnık Ma Sıao Tıan, Qyrǵyzstan Qarýly kúshteri Bas shtabynyń bólim bastyǵy polkovnık Meıirbek Imaev, Reseı Federasııasy Qarýly kúshteri Qurlyq áskerleri jaýyngerlik daıyndyq basqarmasynyń bastyǵy general-maıor Iýrıı Petrov, Tájikstan Respýblıkasy Qarýly kúshteri Bas shtaby bas jedel basqarmasynyń bastyǵy general-maıor Zarıf Bobokalonov quttyqtady.
Osy sársenbiden bastap áskerı qyzmetshiler daıyndyqqa bel sheshe kirispek. Shara sheńberinde 24 qyrkúıek kúni ótetin oqý-jattyǵýdyń sheshýshi kezeńine deıin birlesken jattyǵýlardyń tórteýin ótkizý kózdelip otyr.
Muharbek MAHAMBET, maıor.
Jambyl oblysy,
Otar stansasy,
Mátibulaq áskerı polıgony.