Astana qalasy tilderdi damytý basqarmasynyń uıymdastyrýymen Qazaqstan halqy tilderiniń HII qalalyq festıvali aıasynda B.Momyshuly men J.Jabaev eskertkishteriniń aldynda “Taǵzym men taǵylym” atty merekelik is-shara ótti
“Daýǵa salsa, almastaı qıǵan, sezimge salsa qyrandaı qalqyǵan, oıǵa salsa qorǵasyndaı balqyǵan, ómirdiń kez kelgen oraıynda ári qarý, ári qalqan, ári baıyrǵy, ári máńgi jas, otty da oınaqy Ana tilinen artyq qazaq úshin bul dúnıede artyq ne bar eken!”, degen Elbasy N.Nazarbaevtyń bul sózinen keıin, ana tilimizge degen qurmetimiz odan ári kúsheıe túspek. Ras, búginde qazaq tiliniń aıasy keńeıip, órisi ósip, qulashy keńge jazylyp keledi. Bul birinshi kezekte táýelsizdigimizdiń, ekinshiden, qazaq tiliniń memlekettik mártebege ıe bolǵandyǵynyń arqasy. Dástúrli bul merekelik is-shara bıyl 12-shi ret atalyp ótýde.
Qyrkúıek aıynyń 15-i kúni Astana aspany astynda qazaqtyń birtýar uly, bahadúr, batyr ári aqyn babamyz Baýyrjan Momyshuly men uly jyraý Jambyl Jabaev eskertkishterine gúl shoqtaryn qoıýdan bastalyp, patrıottyq óleńder oqylyp, ánderi shyrqaldy.
Astana qalasy Tilderdi damytý basqarmasynyń bastyǵy Orazkúl Asanǵazyqyzy: Baýyrjan Momyshuly Alash arystarynyń rýhanı murageri dese, respýblıkalyq “Ulannyń” qolbasshysy, general-leıtenant Abaı Tasbolatov dańqty batyr jaıly toqtala kelip, memlekettik tildi nasıhattaýdaǵy óz oıyn ortaǵa saldy.
Al Jambyl Jabaev eskertkishiniń aldyndaǵy sharaǵa qalalyq tilderdi damytý basqarmasy men L.N.Gýmılev atyndaǵy Eýrazııa ulttyq ýnıversıteti, bilim ordasyndaǵy “Qazaq ádebıeti” kafedrasy oqytýshylary men stýdentter quramy uıytqy boldy. Til merekesinde ýnıversıttet stýdentteri men oqytýshylary daıyndaǵan qoıylymdar men memlekettik tildi nasıhattaýǵa arnalǵan jumystar kórsetildi. Eýrazııa ulttyq ýnıversıtetiniń oqý ádistemelik jáne strategııalyq damý jónindegi prorektory Dıqan Qamzabekuly: “Astananyń árbir buryshynda búginde eskertkishter boı kóterip keledi. Solardyń biri osy Jambyl Jabaev eskertkishi. Osyndaı eskertkishterdi kórgenimizde, qazaqtyń birtýar azamattaryn eske alyp, olardyń shyǵarmashylyǵyn odan ári jańǵyrtý – barshamyzdyń boryshymyz. Sondyqtan da, qazaq tili men mádenıetine bárimiz birdeı atsalysyp, odan ári damýyna óz úlesimizdi qosaıyq”, – dedi. Egemendigimizdi alyp, tilimiz memlekettik mártebege ıe bolyp, ymyrasy jarasyp, aırandaı uıyǵan elde ómir súrip jatqan tusta ana tilimizdi qurmettemeı, ózge tildiń týyn kóterý, ásirese jastarǵa jarasa qoımaıtyndaı kórinedi.
Juldyz BAIDILDA, EUÝ stýdenti.