Otandyq fılmder baq synaıdy

Almatyda VI halyqaralyq “Eýrazııa” kınofestıvali bastaldy Keshe Almatyda altynshy ret “Eýrazııa” halyqaralyq kınofestıvali M.Lermontov atyndaǵy memlekettik orys drama teatrynda búkil sán-saltanatymen shymyldyǵyn túrdi. San ret synalyp, minelse de Ortalyq Azııanyń aıshyqty oqıǵalarynyń birine aınalyp úlgergen kınofestıval dástúrge saı álemge áıgili kıno sańlaqtaryn qazaq jerinde toǵystyrdy. Al baıqaý baǵdarlamasynda sońǵy kezde túsirilgen otandyq fılmder baq synaıtyn bolady. Bıylǵy festıvaldiń aıtýly qonaqtarynyń arasynda sońǵy kezde Qazaqstanǵa jıi joly túsip júrgen Jerar Deparde, “Telohranıtel” fılmi arqyly tanys amerıkalyq akter Kevın Kostner, aty “Tı­­ta­nık” fılmi arqyly shyqqan Ýıl­­ıam Zeın, Reseı kınojuldyzdary – Andreı Merzlıkın, Larısa Golýb­­­kına, Lıýdmıla Chýrsına, Irına Kýpchenkolar bar. Eki birdeı “Os­kar” syılyǵyn alǵan akter ári kı­norejısser Kevın Kostner qazaq jerinde óziniń mýzykalyq tobymen óner kórsetetin bolady. Atalmysh festıval ádettegideı Respýblıka Saraıynda emes, orys drama teatryna kóshse, festıvaldiń baspasóz ortalyǵy da bıyl “Almaty Towers” atty kelisken keshenge aý­ysty. Alǵashqy baspasóz máslıha­tyn­da Sh.Aımanov atyndaǵy “Qazaq­fılm” AQ prezıdenti Ermek Aman­shaev, VI halyqaralyq “Eýrazııa” kınofestıvaliniń art-dırektory Gúl­nara Ábikeeva bıylǵy kınobaı­qaý­dyń jaı-japsary týraly jan-jaqty baıandady. Jýrnalıstermen kezdesýge “Unifrance” kompanııasy­nyń Orta­lyq Azııa jáne Shyǵys Eýropa elderi boıynsha jetekshi mamany Joel Shapron qatysty. Munyń da óz jón-josyǵy bar. Baǵ­dar­lamada “Halyq­aralyq baıqaý”, “Qa­zaqstandyq panorama”, “Gala-premeralardan” bólek, “Búgingi fransýz kınosy” atty bólim jumys isteıdi. Júzdesý kezinde Joel Shapron óz kompanııasyn burynǵy Mem­­kı­nomen salystyrdy, sebebi “Unifran­ce” kompanııasy da fransýz kınema­tografııasyn shetelderde nasıhattaý isimen aınalysady eken. Alaıda, elimizde qazirgi tańda túsirilip jat­qan týyndylarǵa kórermenderdiń yn­tasy artyp kele jatqanyna qara­mastan, bul qyzmet bizde kenjelep turǵany da sóz bolmaı qalǵan joq. Sonymen bıylǵy “Eýrazııa” kınofestıvalinde Qazaqstan, Qyr­ǵyzstan, Reseı, О́zbekstan, Tájik­stan, Túrkııa elderinen baıqaýǵa usynylǵan 32 fılmniń ishinen 12 kartına bas júlde úshin baq synaı­tyn bolady. Jalpy, apta boıy Al­matyny dýmanǵa bóleıtin kıno­baıqaýda kópshilik qyryqqa tarta kınotýyndyny tamashalaı alady. Onyń ishinde sońǵy eki jylda túsi­rilgen otandyq fılmder de bar. Al negizgi baıqaýǵa Qazaqstannyń aty­nan jýyrda ǵana kórermenderine jol tartqan jas rejısser Farhad Sháripovtiń “Qyzǵylt qoıan týraly hıkaıa” fılmi men rejısser Aqan Sataevtyń atyshýly “Adasqandar” trılleri jiberilgen. Sondaı-aq, festıval aıasynda japon, nemis, orys kınoprodıý­ser­leriniń qatysýymen qolǵa alynyp jatqan qazaq kınojobalary nası­hat­talatyn bolady. “Eýrazııa” kıno­fes­tıvaliniń taǵy bir jańalyǵy – sandyq formatqa kóshirilgen jáne óń­delgen “Qyz Jibek” fılmi kórsetilmek. Seısenbi kúni kınofestıvaldiń saltanatty ashylý rásimi áıgili fran­sýz akteri Jerar Depardeniń qatysýymen túsirilgen rejısser Sábıt Qurmanbekovtiń “Keshikken mahabbat” kartınasyna ulasty. Eli­mizdiń ońtústiginde túsirilgen bul fılm týraly otandyq BAQ ókilderi az nasıhattaǵan joq. Dúısenbi kúni Depardeniń qatysýymen túsirý toby baspasóz máslıhatyn ótkizgen bo­la­tyn. Fransýz akteri jýrnalısterge bergen suhbatynda qazaq kınosyna túsý ózine asa unaǵanyn atap: “Bul fılm­de shyndyq pen ómir bar. Fı­lmdi túsirý barysynda qazaq akter­laryna baýyr basyp kettim. Mundaı fılmge qatysý úlken táýekeldi qajet etedi. Sebebi, munda eshqandaı kommersııalyq múdde bol­ǵan joq. Meni fılmniń adamı jaǵy qyzyq­tyrdy”, – dedi. Aıtqandaı, “Qazaqfılm” kı­no­stýdııasy men “Tanaris Production” kınokompanııasy túsirgen “Keshik­ken mahabbat” fılminde basty rólderdiń birin somdaǵan Jerardyń ózi de qazaqstandyqtarmen birge ony birinshi ret tamashalady. Men osy fılmdi Parıjben birge álemniń basqa elderi tamashalaý úshin qolymnan kelgenniń bárin jasaımyn, – deıdi fransýz akteri. – О́kinishke qaraı, kınemato­graf­tar­dyń adamdyqtan attaıtyn kezderi az bolmaıdy. Sondyqtan da men ulttyq bastaýyn, tamyryn joǵalt­pa­ǵan siz­derdiń elderińizde erekshe iltıpatpen kınoǵa tústim. “Keshikken mahabbat” Jerar Deparde túsken jalǵyz qazaq kartı­nasy emes. Jýyrda ǵana ol Parıjde túsirý jumystary aıaqtalǵan re­jısser Talǵat Temenovtiń “Meniń kúnáli perishtem” fılmine túsken. Sonymen, seısenbi kúni “Eýra­zııa” kınofestıvaliniń aıasynda tórt birdeı baspasóz máslıhaty ótti. Tańerteńgilik jýrnalısterge akter Ýılıam Zeınmen suhbattasýdyń sáti tússe, sáskege qaraı Halyqaralyq baıqaýdyń qazylar alqasy baspasóz máslıhatyn ótkizdi. Ile-shala FIN­PRESSI men NETPAK qazylary qazaqstandyq BAQ ókilderimen oı bólisti. Odan keıin reseılik Olga Lomonosova, Irına Grıneva men Pavel Safo­novtar óz shyǵarma­shy­­lyq­tary men qazaqstandyq kıne­matografııaǵa qatysty pikirlerin ortaǵa saldy. Qalaı desek te, “Eýrazııa” kı­no­festıvali otandyq talantty rejıs­ser­ler men akterlardy, daryndy sse­narıısterdi bir jerge toǵys­ty­ra­t­yn, tanytatyn, shyǵarmashy­lyq­ta­ryn alǵa jeteleıtin dýmandy shara. Tájirıbe almasatyn, mereılerin tasytatyn tamasha orta. Sonymen kınofestıval kórse­ti­limderin jurtshylyq “Arman”, “Se­zar” kınoteatrlary men “Me­ga”, “Silk Way City” sııaqty fes­tı­val ortalyqtarynan tamashalaı alady. Aınash ESALI. Almaty. -------------------------------- Sýretterdi túsirgen Bersinbek SÁRSENOV.