Májilis Tóraǵasy Oral Muhamedjanovtyń jetekshiligimen ótken palatanyń sársenbi kúngi plenarlyq otyrysynyń kún tártibinde jeti másele qaraldy. Depýtattar osy jalpy otyrys barysynda Agrarlyq máseleler jónindegi komıtet quramyna T.Ibraevty saılady.
Zań jobalaryn qaraý barysynda “2010-2012 jyldarǵa arnalǵan respýblıkalyq bıýdjet týraly” Zańǵa ózgerister men tolyqtyrýlar engizý jónindegi zań jobasy qyzý talqylanyp baryp maquldandy. Sonymen, 2010 jylǵa arnalǵan respýblıkalyq bıýdjettiń túsimderi 3517,8 mıllıard teńge kóleminde belgilendi. Al shyǵys bóligi 4321,4 mıllıard teńge nemese ishki jalpy ónimniń 22,4 paıyzyna teń boldy. Tapshylyq 803,6 mıllıard teńgeni qurady. 2010 jyldyń qańtar-tamyz aılary aralyǵyndaǵy ınflıasııa 4,6 paıyzdy qurasa, jyl sońyna deıin ol 6,5 paıyzǵa jetedi dep kútilýde. Jalpy, ınflıasııa deńgeıi 6-8 paıyz aralyǵynda josparlanyp otyr.
Sondaı-aq depýtattar “Aqsha belgilerin qoldan jasaýǵa qarsy kúres jónindegi halyqaralyq konvensııany jáne oǵan hattamany ratıfıkasııalaý týraly” zań jobasyn maquldaýdy uıǵardy. Konvensııaǵa kóptegen elder kirse, olardyń ishinde Avstrııa, AQSh, Ulybrıtanııa, Belgııa, Fınlıandııa, Lıýksembýrg, Qytaı, Japonııa jáne Reseı bar ekendigin aıta ketken jón. Qujatta qatysýshy memleketterdiń aqsha belgilerin qoldan jasaýǵa qarsy kúres salasynda (shetelde jasyrynyp júrgen daıyndaýshylar men ótkizýshilerdi izdestirýge jáne ustap berýge) quqyqtyq kómek kórsetý kózdelgen. Sondaı-aq “Qazaqstan Respýblıkasynyń Úkimeti men Tájikstan Respýblıkasynyń Úkimeti arasyndaǵy О́teýsiz áskerı kómek kórsetý týraly kelisimdi ratıfıkasııalaý týraly” zań jobasy da depýtattar qoldaýyna ıe boldy. Kelisimge 2009 jyldyń 10 qarashasynda qol qoıylyp, ýákiletti organdar bolyp eki eldiń qorǵanys mınıstrleri bekitilgen-tin. Beriletin múlik tizbesi men sany kelisim qosymshasynda kórinis tapqan.
Asqar TURAPBAIULY.