Mádenıet mınıstrligi men Jambyl oblysy ákimdiginiń qoldaýymen Uly Jeńistiń – 65, Keńes Odaǵynyń Batyry, qazaq halqynyń qaharman uly Baýyrjan Momyshulynyń 100 jyldyǵyna arnalǵan Qazaqstan teatrlarynyń XVIII respýblıkalyq festıvali Taraz topyraǵynda saltanatty jaǵdaıda ashyldy.
Soǵys zulmaty men sol surapyl jyldardaǵy aýyl ómiriniń aýyrtpalyǵyn aýyzdyqtaý aǵa urpaqqa ońaı bolǵan joq. Sondyqtan bolar, osy ýaqytqa deıin eldik pen erlik taqyrybyn arqaý etken sahnalyq shyǵarmalar kóptep jazyldy. Bul jolǵy festıval tini de qaıǵy-muńy máńgi baqı bitpeıtin taqyrypqa arnalypty.
Sahna ıeleri – jambyldyq óner sheberleri festıval shymyldyǵyn Sh.Aıtmatovtyń “Ana-Jer-Ana” pesasymen ashty. Kórermender júregine atymen de, zatymen de kóp jyldardan beri jol taýyp kele jatqan bul keń tynysty shyǵarmany jambyldyq rejısser Q.Qasymov ózindik qoltańbamen jańasha kesteleýge kúsh salypty. Sirá, túsinik-túısigi men parasat-paıymy jańasha qalyptasa bastaǵan kórermenderdiń yńǵaıynan shyǵýdy kózdegen syńaıly.
Endi teatr qoshemetshileri men batyr toıynyń qonaqtary Shyǵys Qazaqstan oblysynan kelgen jastar teatrynyń “Soldat ketti soǵysqa” (K.Toqaev), Jezqazǵan qalalyq S. Qojamqulov atyndaǵy mýzykalyq-dramalyq teatrynyń “Jaraly gúlder” (S. Júnisov), Jambyl oblystyq qazaq jáne orys teatrlarynyń “Baýyrjan Momyshuly” (E.Álimjan) jáne “Joldas kombat” (A.Bek) atty spektaklderin tamashalap, óz baǵalaryn beretin bolady.
Batyr mereıtoıyna shyǵarmashylyq shashý ispetti usynylyp otyrǵan Qazaqstan teatrlarynyń XVIII respýblıkalyq festıvali baǵdarlamasynda budan basqa da kóptegen pesalar bar.
Kósemáli SÁTTIBAIULY.
Jambyl oblysy.