Ultyna uran bolǵan er Baýyrjan

Baýyrjan Momyshuly – 100 “Basqanyń bárin qısań da, Jýalyny qımaısyń, Bókterip alyp keter em, At saýyryna syımaı­syń”, dep Táńirtaýdyń baýyryn­daǵy bulaǵy syldyraǵan, laǵy quldy­rańdaǵan, teregi shaıqalǵan, jelegi jaıqalǵan Myńbulaq aty­rabyn armandaı jyrlaǵan Asan qaıǵy babamyz ótken jer, qyr­kúı­ektiń sońy, qazannyń basy demes­ten, tamyljyp turdy. Toqsan toǵy­syndaǵy tabıǵattyń bul jaımashýaq minezi – batyr mereıtoıynyń qýanyshyn bólisýge kelgen jurt­shylyq úshin syı-sııapattyń úlkeni boldy desek te artyq aıtqandyq bolmas. Sonymen... Qazaqtaı qaharman halyqtyń túbi bir túrki jurtyna ortaq batyr uly Baýyrjan Momyshulynyń 100 jyldyq mereıtoıynyń ekinshi kúni batyr týǵan ólkede, Táńirtaýdyń baýraıyndaǵy ilgeride Borandy beket, búginde Baýyrjan Momysh­uly dep atalatyn irgeli aýyldyń joǵarǵy betkeıinde bastalyp ta ketken. Aýyldyń kire berisindegi dóńde ótken-ketken jolaýshyǵa qyrandaı shúılige qarap otyrǵan batyr eskertkishi bar. Ol osydan birneshe jyl buryn ornatylǵan. Toı taǵy­lymy, halyq ǵıbraty, mine, osy, qaıta jóndeýden, jańa árleýden ótken eskertkishke gúl qoıyp, taǵzym etýden bastaldy. Táńirtaýdyń qarly shyńdary menmundalap turatyn órleýitteý betkeıde batyrdyń murajaıy bar. Toı qarsańynda bul shańyraq ta kúrdeli jóndeýden ótkizilip, “Erlik eleýsiz qalmasyn” dep er Baýkeńniń ózi aıtqandaı, jańǵyryp shyǵa keldi. Murajaı aldyndaǵy batyr bıýsti qaıta jasaldy. Buryn aýdan­dyq, aýyldyq deńgeıdegi mekeme retinde atalyp kelgen murajaı endi “oblystyq” degen mártebege ıe boldy. Eksponattary da qaharman aǵamyz kózi tirisinde tutynǵan, búginge deıin batyr urpaqtarynyń qolynda bolǵan kóne buıymdarmen tolyqty. Oǵan batyrdyń búgingi torqaly toıynyń qurmetti qonaq­tarynyń biri, qaharmannyń uly Baqytjan men kelini Zeınep kóp atsalysty. – Atam dúnıege eshýaqytta qy­zyqqan adam emes. Artyna qaldyr­ǵan baılyǵy da, amanaty da, ósıeti de qarapaıymdylyq pen qanaǵat boldy. Kezinde biz úshin de, eli úshin de eń úlken qazyna – atamnyń ózi men sózi bolatyn. Qazir de solaı. Odan keıin ata tutynǵan zattar. Tipti eskirip, zaman kóshinen qalyp qoısa da, ótken kúnderden syr shertip turatyn sııaqty. О́ıtkeni, onyń árqaısysynda ata qolynyń taby bar. Batyr atalarynyń ór rýhyn ańsap, eńse kóterer erlikke shólirkegen urpaq úshin eń basty qazynanyń biri osy dep bilemin, – degen Zeınep jeńeshemiz atasynyń murajaıyna jazda kelgen sapa­rynda. – Atanyń qoly tıgen, ıisi sińgen buıymdary men tutynǵan zattarynyń barlyǵy osy kúnge deıin úıde turdy. Men ony otyz jylǵa jýyq ýaqyt boıy kózimniń qarashyǵyndaı saqtap júrmin. Árıne, atamnyń artynda urpaǵy bar, uly bar, nemeresi bar, eki shóberesi bar, olarǵa da eskertkish kerek, sondyqtan úıge de birazyn qaldyrdym. Al kóptegen dúnıesin batyr toıyna kelgen el, jas urpaq kórsin dep alyp kelip otyrmyn... Árıne, Baýkeń tutynǵan árbir zattyń ózindik tarıhy bar ekeni bel­gili. Mysaly, sonaý 1908 jyly ja­salynǵan seıfti alyp qarańyz. Burynǵynyń buıymdary asyl keledi ǵoı, tipti jasaǵan adamynyń aty-jónine deıin, ıaǵnı “Pıvova­rov” degen sheberiniń tegine deıin óshpegen. Osy seıfke baılanysty ata men kelin arasynda kútpegen áńgime de bolypty. – Atamnyń qolyna kóship kel­gen kezimiz. Kiletti ashsam, osy já­shik tur eken, “myna qara temirdi mun­da nege qoıǵan” degen oımen shy­ǵarmaq bolǵanym sol edi, atam: “Tıispe oǵan! Ne trogaı!”, dep aı­ǵaı­­lap jiberdi. Shoshyp kettim. Sóıt­sem, meniń “qara temir” dep men­sinbegen zatym soǵysta aldymen ba­talonnyń, keıin Panfılov dı­vızııasynyń búkil qupııa qujattary saqtalǵan seıf eken. Tot basyp, kózge qorashtaý kóringenimen, tórt jylǵy qyrǵynnyń ishinen elge aman-esen kelgen jaýyngerdeı qym­bat dúnıe! Onyń ústine soǵys taǵdyryn sheshýge qatysty talaı qujattardy saqtaǵan atamnyń jeke seıfi! Atam “Tıispe!” degen soń, men de ony kózimniń qarashyǵyndaı saqtaýǵa tyrystym... Jambyl oblysynyń ákimi Qa­nat Bozymbaev pen Mádenıet mı­nıstri Muhtar Qul-Muhammed bas­taǵan toı qonaqtary aýyldaǵy ba­tyr eskertkishine taǵzym etkennen keıin, mine, osy murajaıǵa atbasyn burǵan. Murajaı aldyndaǵy ba­tyr bıýstin saltanatty jaǵdaıda ashqan. Al murajaıdaǵy batyr buıymdaryn kórýge umtylǵan el-jurtta qısap joq. Sirá, kóńilderi “temirdi qyzǵan kezinde soq” degendeı, batyr tu­tyn­ǵan zattardy toıǵa alystan arnaıy kelgen el zııalylarymen birge ta­mashalaǵandy qalaıtyn sııaqty. Murajaıdyń joǵarǵy jaǵyna, ıaǵnı Táńirtaý betkeıindegi kúzgi ja­pyraqtary altyndaı jalt-jult etken bıik terekterdiń arasyna úl­­ken sahna qurylǵan eken, toı jıy­ny osy jerde bastaldy. Áýeli ob­lys ákimi Q. Bozymbaev sahnaǵa shy­­ǵyp kópten kútken batyr toıyn ashyq dep jarııalap, jınalǵan jurt­shylyqty quttyqtap, sóz sóılegen. – Ardaqty aǵaıyn! Qymbatty qonaqtar! Búgin biz qasıetti esimi ult maqtanyshyna aınalǵan dańqty komandır, artyna tarıhı mura qaldyrǵan jaýynger-jazýshy, Keńes Odaǵynyń Batyry Baýyrjan Momyshulynyń ǵasyr toıynda bas qosyp otyrmyz. Asqaq rýh pen eldiktiń aıbynyndaı bolǵan Baýyrjan Momyshulynyń batyr tulǵasy, qaısar minezi, ot aýyzdy, oraq tildi beınesi men aınymas qasıetteri halqymyzben máńgi birge jasap keldi. Dana halqymyzda “Erlik – erimen bıik” degen sóz bar. Batyr Baýyrjannyń boıyn­daǵy aıryqsha daryndylyq pen adaldyq, ádildik pen shynshyldyq qasıetteri kóptiń kóńilinde, urpa­ǵynyń esinde saqtalǵan. Aınalasynda myń bulaǵy bar Kólbastaýdan túlep ushqan jaýjú­rek Baýyrjan Momyshuly vzvod komandırinen dıvızııa komandıri deńgeıine deıin kóterilgen dara sardar. Aınymas minezdi er Baýkeń áskerı qyzmet jolynda temir tártiptiń tizginin qolyna berik us­tap, artynda aıryqsha iz qaldyrdy. Sol úshin de halqy erligimen eline tanylǵan Baýkeńdi kóziniń tirisinde “batyrym” dep baǵalap, alaqanynda aıalady. Eger, ómirde adam bolý – qa­sıet, azamat bolý – mindet, ultyn súıý – paryz desek, osy kıeli qa­sı­etterdiń barlyǵy da Baýyr­jan­nyń boıynan tabylǵan. Al, Batyr Baýyrjannyń “Otan úshin otqa tús – kúımeısiń!” degen rýhy bıik qa­natty sózi búgingi jastardyń boı­yn­da patrıottyq minezdi qalyp­tastyrýǵa shaqyrǵan eń joǵary uran dep bilemin. “Erlik eskirmeıdi, ol halqymen birge máńgi jasaıdy” deıdi dana halqymyz. Batyrlyq rýhtan sý­syn­daǵan Baýkeń – halqynyń bo­la­shaǵy úshin kúresken batyrlardyń jeńisin jalǵastyrǵan azamaty, barsha qazaqtyń bas ıgen Batyry. Soǵystan keıingi jyldary qarýyn qalamǵa aıyrbastaǵan gvardııa polkovnıgi B.Momyshuly – kóp­tegen kórkem týyndylary men áskerı jazbalary arqyly árbir oqyrmannyń júregine jol tapqan jaýynger-jazýshy. Ol – qazaq áskerı ádebıetiniń negizin salǵan qalamger. Egemendigimizdiń alǵashqy jyl­dary Keńes ókimeti tusyndaǵy ádiletsizdiktiń “ýaqytyn keri qaı­taryp” – halqymyzdyń erlik sımvolyna aınalǵan Baýyrjandaı batyrǵa Keńes Odaǵynyń Batyry ataǵyn alyp berýde Elbasynyń tarıhı eńbegi erekshe ekenin aıtýǵa tıispiz. Osy abyroıly ataq arqyly qabyrǵaly qalyń eldiń eńsesin kóterdi. Tutas bir halyqtyń tonal­ǵan tarıhtan esesin qaıtardy. Sa­­ryla kútken el senimi aqtaldy. Bul – bizdiń Táýelsiz elimizdiń alǵashqy rýhanı jeńisteriniń biri edi. Baý­keńniń juldyzdy bolǵan kúni – halyqtyń juldyzy janǵan kún edi! Qadirmendi qaýym! Búginde Baýyrjan Momyshuly­nyń esimin este qaldyrý jáne erlik joldaryn keıingi urpaqqa úlgi-ónege etý maqsatynda elimizde kóp­tegen tirlikter jasalyp keledi. Elimizdiń bas qalasy – Astananyń 10 jyldyq merekesi qarsańynda Baýyrjan Momyshuly atyndaǵy jańa saıabaq ashylyp, Batyrdyń eskertkishi ornatyldy. Al, Máskeý qalasy mańyndaǵy ataqty Dýbo­sekovo men Krıýkovo selolarynda Baýyrjan Momyshulyna eskertkish-bıýster qoıyldy. Bıyl Máskeýde bir mektepke esimi berildi. Kúni keshe alǵash ret 30 tomdyq kitapta­ry jaryq kórdi. Búgingi Baýyrjan Momysh­ulynyń júz jyldyq toıynyń osy­laısha keń kólemde atalyp jatýy – táýelsiz Qazaqstan tarıhyndaǵy erekshe oqıǵa dep bilemin. Baýkeń – tabıǵı bolmysyna daq saldyrmaı, nómiri birinshi Baýyrjan bolyp halqynyń jadynda saqtalǵan, qasıeti – qymbat, sıpaty – sırek, júz jylda bir keletin qaısar tulǵa. О́ıtkeni, ol Batyr bolyp týdy, Batyr bolyp soǵysty, Batyr bolyp ómir súrdi, myna dúnıeden de Batyr bolyp ótti! Olaı bolsa, biz hal­qynyń súıispenshiligine ıe bolǵan Batyr Baýyrjandy, Ultjandy Baýyrjandy, Qaısar Baýyr­jan­dy qazaqtyń eń baqytty perzenti dep zor maqta­nyshpen aıta alamyz. Oblys basshysy sózin osylaısha ekpindete aıaqtaǵan. Aqıqatty aıt­qannyń aıyby joq, Jambyl ob­lysyndaı qazaqylyqtyń qaımaǵy buzylmaǵan óńirge ákim bolyp alǵash ret taǵaıyndalǵanda, júrek pen tilek údesse til úırený degenniń qıyn emes ekenin aıtyp, tilektes bolyp edik. Mine, sol jalyndaǵan jas basshy arada bir jyl ótpeı-aq ana tilinde erkin kósiletin bolǵan. Alǵashynda “apyraılap” júrgen jurt ta dán rıza. Oblys ákimi ózinen keıingi sózdi Mádenıet mınıstri Muhtar Qul-Muhammedke bergen. – Halqymyzdyń arǵy-bergi tarıhynda el bastaǵan kósem, sóz bastaǵan sheshen, qol bastaǵan batyrlar az bolǵan joq. Biraq solardyń bárinen Baýyrjannyń orny da ózgeshe, ataǵy da aıryqsha, tuǵyry da bıik. Sebebi, Baýyrjan qatysqan ekinshi dúnıejúzilik soǵys – adamzat tarıhyna álemniń 70-ten astam eli qatysqan eń alapat soǵys bolyp endi. Ol batyldyq pen ba­tyrlyqtyń ǵana emes, áskerı óner, soǵys taktıkasy, aqyl-oı men bi­lim-biliktiń arpalysqan, bes qurlyq pen tórt muhıtta adamzat jan aly­syp, jan berisken, jer jahandy qamtyǵan ǵalamat soǵys boldy. Ekinshi dúnıejúzilik soǵys tarıh sahnasyna jańa turpatty qolbas­shylardy shyǵardy. Qaharly 41-jyldyń qysynda Keńes Odaǵynyń astanasy – Máskeý qalasyna jaý tankileri qol sozym jer qalǵan sátte búkil dúnıe júziniń nazary áıgili shaharǵa aýdy. Mine, osy kezde qazaqtyń qurysh­taı berik ulany qaıtpas qaısarlyq pen qaharmandyqtyń úlgisin kórsetti. Sol kezdiń ózinde-aq onyń esimi qurlyqtyń altydan birin qam­tyǵan alyp ımperııanyń sheka­ra­synan asyp, dúnıe júzin sharlap ketti. Orystyń qabyrǵaly qalam­ge­ri A.Bektiń “Volokolam tas joly”, A.Krıvıskııdiń “Moskva túbindegi tosqaýylynan” bastap dańqty qol­basshy-generaldar K.Galıskıı, I.Chıstıakovtardyń ózi qaharman qazaqtyń erligi týraly tamsana, tańǵala jazdy. Bul shyǵarmalar, ásirese A.Bektiń romany álemniń alýan tilderine aýdarylyp, mu­hıt­tyń arǵy-bergi jaǵyna B. Mo­mysh­ulynyń quryshtaı berik qudyretti tulǵasy ańyz bolyp jaıyldy. Ol, tipti, Kýba kósemi F. Kastronyń súıikti keıipkerine aınaldy. Jahandyq soǵysqa qatysqan jaýyngerler men qolbasshylar eńbegi Keńes Odaǵy tarapynan kem baǵalanǵan joq. Olardyń aldy bir, eki, úsh, tipti tórt márte Keńes Odaǵynyń Batyry ataǵyn aldy. О́kinishke oraı, bul qatarda Baý­yrjan Momyshuly bolǵan joq... Osylaısha aıaýly Baýkeń kózi tirisinde Keńes Odaǵy Batyrynyń Altyn Juldyzyn keýdesine jar­qyratyp taǵa almaı dúnıeden ótti. Zaman almasty, basshylar aýysty. El tilegi qabyl bolyp, 1989 jyl­dyń maýsymynda Qazaqstan Kom­par­tııasy Ortalyq komıtetiniń tiz­ginin áli elýge de tolmaǵan Nur­sul­tan Nazarbaev ustady. Nursultan Ábishulynyń qazaq halqyna sińirgen myń san erligin reti kelgende áli talaı jazarmyz, biraq sonyń bireýin dál búgin aıtpasaq, aqıqat sózdiń atasy óletini anyq. Ol bylaı bolǵan edi. Qazaqstannyń jas bas­shysy sol kezdegi Keńes Odaǵynyń basshysy Mıhaıl Gorbachevke Baýyrjan Mo­myshulyna qyryq bes jyl boıǵy jasalǵan ádiletsizdikti ashyna jet­kizdi. Ol áldeqashan kómeski tart­qan eski tarıhty qaıta tiriltpeýdi, eger B. Momyshulyna Ba­tyr ataǵy birilse, ózge respýb­lıkalardan mun­daı ótinishterdiń qarsha boraıtynyn aıtyp, kelisim bermeıdi. Sonda Nursultan Ábishuly: – Meniń halqym – myń ólip, myń tirilgen halyq. Áli de kezdeser qıyndyqtyń kez kelgenin jeńe­tinine senimim kámil. Al arqamyzǵa qyryq bes jyl aıazdaı batqan dál myna ádiletsizdikke bylaı tózý múmkin emes. Baýyrjandaı ultyna uran bolǵan uldy týdyrǵan meniń halqym er namysyn joǵary qoıǵan. Endeshe, Baýyrjandaı erdiń namysy men úshin bárinen bıik, – dep tabandylyq tanytqan. M. Gorbachev bul ótinishke kelesi Jeńis kúnine qaraı qaıta oralý jóninde qaıyra usynys jasaıdy. Keler jeńis kúnine deıin qyzyl ımperııa taǵdyry qalaı bolatynyn joba­laǵan, qashanda qııadaǵyny kórip, qııandaǵyny boljaı alatyn Qazaq­stannyń kemeńger basshysy “Men elge Jarlyqpen qaıtýǵa tas-túıin daıyndyqpen keldim”, – dep qaı­sar minez tanytady. Mine, osy­laı­sha, 1990 jyldyń 12 jeltoqsanynda qazaqtyń dańqty perzenti Baýyr­jan Momyshulyna Keńes Odaǵy­nyń Batyry ataǵy berildi... Búgin Baýyrjan Momyshulynyń 100 jyldyǵyna arnalǵan saltanat­ty jıynǵa qatysýshylarǵa Elba­sy­myz arnaıy quttyqtaýyn joldady. Osyny oqyp berýge ruqsat etińizder. “Ardaqty áleýmet! Barshańyzdy qazaq halqynyń birtýar batyr uly, qaharman qolbasshy, jaýynger jazýshy Baýyrjan Momyshulynyń týǵanyna 100 jyl tolýy mereı­toıy­­men shyn júrekten quttyq­taımyn! Baýyrjan Momyshuly – óshpes erligimen, azamattyq dara qalpymen, ultjandylyǵymen, na­mys­tylyǵymen halqymyzdyń or­yndy maqtanyshyna aınalǵan uly tulǵa. Onyń esimi erlik pen órliktiń sımvoly retinde halqy­myzdyń jú­reginde máńgi saqtalady. Osydan 20 jyl buryn meniń tikeleı arala­sýym­men tarıhı ádilettilik qalpyna keltirilip, oǵan Keńes Odaǵynyń Batyry ataǵy berilgen bolatyn. Biz jas urpaqqa batyr Baýyrjannyń kesek tulǵasyn úlgi etip, onyń ónegeli ómirin ulttyq patrıottyq tárbıeniń ózegi retinde nasıhattap otyrýǵa tıispiz. Táýel­sizdigimizdi ba­ıandy etip, memleket­tigimizdi nyǵaı­tý úshin de batyr murasynyń taǵylymy erekshe mol ekendigi sózsiz. Búginde elimizde onyń esimin umytpaý maqsatynda aýqymdy ister atqarylýda. Astanamyzda Baýyrjan Momyshuly atyndaǵy jańa saıabaq ashyldy. Elordanyń eń úlken dańǵyldarynyń birine batyr­dyń esimi berildi. Eńseli eskertkishi ornatyldy. Qaharman qalamgerdiń 30 tomdyq shyǵarmalar jınaǵy jaryq kórdi. Osyndaı taǵylymdy ıgi sharalar aldaǵy ýaqytta jal­ǵa­syn taba beredi dep senemiz. Batyr­dyń rýhy barshańyzdy qoldap júr­sin! Toı toıǵa ulassyn!

Nursultan NAZARBAEV.

Astana. Aq­orda”. Táńirtaýdyń baýraıyndaǵy sulý beleske qonys tepken batyr atyn­daǵy aýylǵa jınalǵan kópshilik aldynda Erdiń erlik isi men Elba­sy­nyń eldik isi jóninde osylaı tol­ǵanǵan Mádenıet mınıstrine batyr toıyna jınalǵan jurt rıza boldy. Toı baǵdarlamasynyń uzyn-yrǵasynan tik minezdi, týra tildi mańǵaz perzenttiń “Elsiz er bola ma, jurtsyz jigit bola ma”, “El degende ezilip, jurt degende jumylyp qyz­met et”, “Qaıratyńa ádisińdi joldas et, ádi­sińe aqy­lyńdy joldas et” degen ósıetine adal­­dyq, óne­­gesine uqypty­lyq ańǵa­rylyp tur­dy. Budan keı­in sóz alǵan senator О́.Baıgeldı Se­nat Tóraǵasy Qasym-Jomart Toqa­ev­­­tyń, al Mem­le­ket­tik hat­shy hat­shy­ly­ǵy­nyń hat­shysy Q.Aıt­baı AQSh-ta mem­le­­ket­tik­ ma­ńyz­dy ­sa­­­­­­­­­­­­­­­­­­­­­­­­­­par­­­men júrgen Mem­­­­le­­ket­tik hat­­shy – Syrt­­­qy ister mınıstri Q.Saý­­­­da­bev­tyń quttyq­taýlaryn ob­lys ákimine tabys etip, ba­tyr mura­jaı­yna qoıý­ǵa tilek bildirdi. Besin aýa toı qo­naq­­ta­ry Ta­raz qala­sy­nyń ba­tys bet­keıindegi Baý­­­­yr­jan Mo­mysh­uly at­yn­daǵy ıppo­drom­ǵa qa­raı aǵyl­ǵan. Mun­­da ult­tyq at sporty oı­yn­­da­ry – báı­ge, kók­par jos­par­lanǵan-dy. Sonymen, ushqyr báı­gege 8 at qatysyp, 2800 metr­lik qysqa qa­shyq­­tyq­ta Kereký­den jetken júı­rik birinshi keldi. Qunan báıgege 44 júı­rik qatys­tyrylyp, Qyzyl­or­da ob­lysy, Shıe­li aýdanynan kel­gen O. Baı­dildaevtyń aty sha­shasyna shań juqtyrmas júırik ekenin tanytty. Shabandozdardyń esterin­de júrsin, ushqan uıasyndaǵy ata-analary bo­lashaq batyr Baý­keńdi bala kezinde “Shań tımes” dep ataı­dy eken. Toq báıgede 38 tulpar baq synap, Alma­­ty oblysynyń “Jaı­ser” atty júı­rigi top aldynan kó­rin­se, alaman báıgege qatysqan 41 tul­pardyń ishi­nen Shyǵys Qa­zaq­stan oblysynyń Taskesken aýy­ly­nyń “Izbasar” at­ty júırigi aldyna qara saldyrmaı, báıge syzyǵyn birinshi bolyp ót­ken. Birinshi oryn alǵan báıge ıe­lerine tıisinshe aqshalaı syılyqtar jáne “Jı­gýlı”, “Nıva”, “Djıp” avtokólik­teri tapsyryldy. Báıge barysynda, álbette, tul­par ıeleri tarapynan daý-damaı da bol­maı qalǵan joq, biraq toı ıeleri ádil­diktiń aq jolynan attamaı, báı­geden túsirilgen beınematerıal kómegine jú­giný arqyly qaı attyń birinshi kel­genin dál aıtyp berdi. Toı qyzyǵyn kókpar men aýda­rys­paq ta qyzdyryp, jınalǵandardy bir jelpintip tastaǵan. Halqymyzda “Toıdyń bolǵa­ny­nan boladysy qyzyq” degen sóz bar. Sonymen, batyr mereıtoıyna jyl basynda jasalǵan daıyndyq máre­sine jetip, ol barshany “bá­re­­keldi” degizgen jaqsy nátıje­men aıaq­taldy. Oǵan toıǵa jı­nalǵan ha­lyq kýá bolsa, estigen el rıza boldy. * * * Batyr mereıtoıy oıdaǵydaı ót­kennen keıin, osy toı qonaq­tarynyń biri, “Egemen Qazaqstan” respýb­lıkalyq gazeti” aksıonerlik qoǵamy prezıdenti Saýytbek Abdrahmanov Jambyl oblysynyń ákimi Qanat Bo­zymbaevpen kezdesip, toı taǵylymy men toı qarsańynda qarapaıym halyq úshin atqarylǵan jumystarǵa rıza­shy­lyǵyn jetkize kelip, baspasózge ja­zylý naýqanyna baılanysty usynys­tary men tilekterin ortaǵa saldy. Egemen eldiń sara saıasaty men dara baǵytyn talmaı jazyp kele jatqan ata basylymnyń basty maq­­saty – eldiń tatý-tátti birligi men halyqtyń berekeli tirligi. Táýel­sizdiktiń tuǵyrly bolýy da aldymen osy ekeýine baılanysty. El táýelsizdik alǵaly beri Jam­­byl oblysyndaǵy gazet taralymy jyl saıyn ósip keledi. Byltyr 17 myńnan asty. Sondyqtan S. Abd­rahmanov bıylǵy meje Jambyl óńi­rinde odan artyq bolmasa, kem bol­­maýǵa tıis, deı kelip, Pre­zıdent saıasatynyń rýhanı uı­ytqysy bo­lyp otyrǵan basylymǵa qamqorlyq jasaýǵa sha­qyr­dy. Oblys ákimi Q.Bo­zymbaev ata basylymnyń   Jam­­byl obly­syndaǵy taralymy jyl­­daǵydan joǵary bolaryna sendirdi. Kósemáli SÁTTIBAIULY, Jambyl oblysy.