Peskı aýylynyń oqýshylary mektep úıiniń tarlyǵynan eki aýysymda oqyp keldi. Sport zalynyń bolmaýy dene qımylymen shynyǵýǵa qalypty múmkindik bermeıtin. Odaq ydyrar aldynda jańa mektep úıiniń irgetasy qalanyp, odan ári jalǵas tappaı qaldy. Peskılikterdiń kópten bergi armany bıyl ǵana oryndaldy. Endi olar úshin qyrkúıek aıy erekshe. 800-ge tarta turǵynnyń ótinish-tilekterine oraı bolashaq bilim oshaǵynyń jobasy “100 mektep, 100 aýrýhana” baǵdarlamasyna engizilip, respýblıkalyq bıýdjetten jarty mıllıard teńge qarjy bólindi. 250 oryndy 2 qabatty bilim otaýy nebári bir jyldyń ishinde boı kóterip, aýyldyń tórine ornalasty. Onyń ashylý saltanatyna oblys ákimi Serik Bilálov arnaıy kelip, mektep ujymyna “GAZel” kóligin tartý etti. Zamanaýı qural-jabdyqtar ornatylǵan synyptardy aralap kórdi. Oqý-ádistemelik, mýltımedııalyq kabınetter, sport jáne akt zaldary keń de jaryq bólmelerde ornalasqan. 50 balaǵa laıyqtalǵan shaǵyn ortalyq jumys isteıdi. Serik Sultanǵazyuly aýdan ortalyǵy – Novoıshım kentinde bolyp, ıpotekalyq úıdiń qonys toıyna qatysty. Túrli salalarda eńbek etip júrgen 12 memlekettik qyzmetshige jaıly páterlerdiń kiltin tabys etti.
Ǵabıt Músirepov – óńirdegi eń iri astyqty aýdan. Jylda bitik egin ósiretin aımaqqa jazdyń qýańshylyǵy óte-móte áser etkeni birden baıqalady. Soǵan qaramastan, ozyq tásilderdi, ásirese, ylǵal saqtaıtyn tehnologııalardy qoldanýdyń arqasynda ortasha ónim alynýda. S.Bilálov egis tanaptaryn aralap, elevatorlardyń astyq qabyldaý jaıymen tanysty. Dıqandarmen áńgime barysynda nan jáne nan ónimderi baǵasyn negizsiz ósirýge jol berilmeıtinin, jer-jerlerde memorandýmǵa qol qoıylyp jatqanyn, turaqtandyrý qoryna 600 myń tonna astyq quıý soltústikqazaqstandyqtar úshin basty mindet ekenin, munyń ózi azyq-túlik qaýipsizdigin qamtamasyz etýge qosylatyn súbeli úles bolyp tabylatynyn qadaı aıtyp, jaýapty naýqandy qyrkúıektiń 10-yna deıin aıaqtaýdy tapsyrdy. Aýdanda jarys kóshin “Tuqym” JShS bastap keledi. Seriktestik basshysy Mekibaı Kárimovtiń sózine qaraǵanda, naýqan bel ortadan aýǵan. О́nimdilik 18 sentnerge jeteǵabyl. Okrýg turǵyndaryna jemshóp jetkizilgenin, kartop qazý jumysy qosa atqarylyp jatqanyn málimdedi. Onyń izin óksheleı kele jatqan “Vozvyshen-SK” 11 myń gektar alqaptyń 80 paıyzyn bastyryp úlgiripti. Seriktestik jetekshisi Ábdirahym Nuqaev qolda bar tehnıkanyń oraqqa túgel jumyldyrylǵanyn, keler jyl úshin sapaly tuqym quıyp alynǵanyn jetkizdi.“Birlik-Qazaqstan”, “Artabaq” sharýa qojalyqtary egin jınaýdy aıaqtapty. Samat Tasmaǵanbetovtiń jetekshiligindegi “Vest” sharýashylyǵy sońǵy destelerdi bastyrýǵa qyzý kirisken. Novoıshımdegi “Álibı-Astyq” JShS-ne qarasty elevator bıyl iske qosylypty. Syıymdylyǵy 20 myń tonnany quraıdy. Astyq qabyldaý pýnkti qarbalasqa toly.
–Bar kúsh-jiger 622 myń gektar alqaptyń astyǵyn ysyrapsyz jınap alýǵa jumyldyrylǵan. Jazdyń aptap ystyǵy men qýańshylyǵy shyǵymdylyqqa keri áser etti. Alaıda, gektar túsimdiligi 8 sentnerden aınalsa da, sapasy óte joǵary. Máselen, balaýyz 26-28-den kem emes. Qoldaǵy astyqtyń 80 paıyzy orylyp, 76 paıyzy bastyryldy. Egin erte piskendikten, tikeleı jınaý ádisin qoldanýdamyz,–deıdi aýdan ákimi Marat Tasmaǵanbetov.
О́mir ESQALI,
Soltústik Qazaqstan oblysy,
Ǵ. Músirepov aýdany.