Hromtaý aýdanynyń Kóktaý ken ornynda “Aqtóbe mys kompanııasy”JShS-niń mys jáne mys-myrysh kenin óndirýmen aınalysýy osy attas eldi mekenniń qaıta túleýine yqpal etip otyrǵany ras. Údemeli ındýstrııalyq-ınnovasııalyq baǵdarlama aıasynda júzege asyrylyp jatqan bul joba oblys ekonomıkasynyń boıyna qan júgirtip qana qoımaı, áleýmettik máselelerdiń oń sheshilýine septigin tıgizýde. Munda qazir 1200 adam jumys isteıdi, olardyń 80 paıyzy – jergilikti jumysshylar. Bolashaqta jumysshylar sanyn eki myńǵa jetkizý kózdelýde. Osy kásiporynǵa jaqyn jerde “Kóktaý-2” aýyly boı kóterýde. Osy eldi mekende salynyp jatqan turǵyn úılerge “Nurly kósh” baǵdarlamasy boıynsha elge keletin qandastarymyz qonystanady.
Alys-jaqyn shetelderden kóship keletin oralman baýyrlarymyzdyń basym kópshiligi osy seriktestikte jumys isteıtin bolady. Ázirge munda elý úıdiń qurylysy júrgizilýde. Onyń on besiniń shatyry jabylǵan, qurylysshylar qalǵandaryn da jaqynda bitiremiz dep qoldaryn ysqylap otyr. Ár úıde tórt páter bar. Aýdan ákimi Aıazbaı Osmanǵalıevtiń aıtýynsha, aldymen eki júz otbasy kóship keletin kórinedi. Odan keıin taǵy da 62 úı salý kózdelýde. Jalpy, bul aýylǵa alty júzdeı otbasy kóship keledi dep kútilýde. Osynda salynyp jatqan 600 oryndyq mektep qurylysy aldaǵy jyly aıaqtalmaq. Bolashaqta munda bala baqsha, klýb sııaqty áleýmettik nysandar da salynady.
Aýylǵa gaz kelip tur. Aýyldaǵy qurylystarǵa túgeldeı jergilikti materıaldar paıdalanylýda. “Kóktaý-2” aýylyndaǵy bul úılerdi oralmandar “Turǵynúıqurylysjınaq bankiniń” “О́rken” baǵdarlamasy nesıelerin paıdalanyp alady. Ol úshin oralmandar 3,5 jyl boıy úı baǵasynyń jartysyn jınap, 15 jylda 4,5 paıyzben barlyq beresheginen qutylady.
Satybaldy SÁÝIRBAI, Aqtóbe oblysy.