Zańnamany izgilendirý qylmyskerge jeńildik jasaý emes

Quqyq qorǵaý qadamdary Almaty Bas prokýratýra jáne “Adam quqyqtary úshin Hartııasy” qoǵamdyq qorynyń uıymdastyrýymen “Qylmystyq zańnamalardy qylmystan aryltý jáne izgilendirý” atty dóńgelek ústel bolyp ótti. Memleket basshysynyń “Qazaqstan Respýblıkasyndaǵy quqyq qorǵaý qyzmeti men sot júıesiniń tıimdiligin arttyrý jónindegi sharalar týraly” Jarlyǵyn jáne “Azaptaýlarǵa jáne basqa da qatygez, adamgershilikke jatpaıtyn nemese ar-namysty qorlaıtyn is-áreketter men jazalaý túrlerine qarsy konvensııaǵa fakýltatıvtik hattamany ratıfıkasııalaý týraly” zańdy iske asyrý maqsatynda uıymdastyrylǵan jıynda kún tártibinde turǵan máseleler keńinen talqylandy. “Qylmystyq zańnamalardy qylmystan aryltý jáne izgilendirý” atty jıynǵa Prezıdent Ákimshiligi Basshysynyń oryn­basary Talǵat Donaqov, Konstıtýsııalyq keńes Tóraǵasy Igor Rogov, Bas proký­ror­dyń birinshi orynbasary Iogan Merkel “Adam quqyqtary úshin hartııasy” qoǵam­dyq qorynyń atqarýshy dırektory Jemis Turmaǵambetova qatysyp, sóz sóıledi. Fo­rýmnyń jumysyna sondaı-aq Parlament­tiń, Joǵarǵy Sottyń, quqyq qorǵaý organ­dary men halyqaralyq jáne úkimettik emes uıymdardyń ókilderi qatysty. Memleket basshy­sy­nyń bıylǵy jyl­dyń tamyz aıyndaǵy Jarlyǵynda elimizde qylmystyq saıasatty izgilendirýge basty nazar aýdarylǵan bo­latyn. Shyn mánisinde de, qylmystyq zańnamalardy izgilendirýdiń qoǵam úshin qajettiligi orasan ekendigin jıynda sóz alǵan sala basshylary atap kórsetti. О́tken jyldarda qylmysqa degen kózqarastyń tym qataıyńqyrap ketýinen temir torǵa qamalǵandar sany kúrt ósip ketkendigi jasyryn emes. Sonyń nátı­­jesinde qapas­taǵylar sany jaǵynan Qazaq­­stan búginde álemde on jetinshi oryndy ıelenýde, sondyqtan da qylmystyq zańnamalardy barynsha izgilendirý máselesi qazirgi kezeńdegi basty talaptardyń birine aınalyp otyrǵandyǵy sózsiz. Bul oraıda jıynda sóz alǵan Kons­tı­týsııalyq keńes Tóraǵasy Igor Ro­govtyń “qylmystyq jazany izgilendirý, túptep kelgende qylmyskerlerge jeńil­­dik jasaý degen sóz emes, kerisinshe, qu­qyq qorǵaý organdarynyń jumys sapa­syn jaqsartý” degen salmaqty pikirin atap kórsetken jón. Sala basshylarynyń pikirinshe, qyl­mystyq zańnamany izgilendirý degenimiz, qoǵamda zań talaptaryn buzýshylyqqa, qylmystyq áreketterge degen kózqarasty ózgertip, ony múldem jeńildetý emes. Bul oraıdaǵy eń basty mindet – quqyq qorǵaý organdarynyń jumystaryn júıelendirip, bul baǵyttaǵy jaýapkershilikti barynsha kúsheıtý. Bas prokýrordyń birinshi oryn­basary Iogan Merkeldiń pikirinshe “qyl­mystyq zańnamalardy izgilendirip, jaza taǵaıyndaýda múmkindiginshe jeńildikterdi qarastyrýdyń paıdasy orasan”. “Qazaqstan Respýblıkasyndaǵy quqyq qor­ǵaý qyzmeti men sot júıesiniń tıim­diligin arttyrý týraly” Memleket basshysy Nursultan Nazarbaevtyń Jarlyǵyn iske asyrý maqsatynda uıymdastyrylǵan jıynda sot júıesindegi ahýal da qamtyldy. Baqyt BALǴARINA, Almaty.