Selınograd aýdanyndaǵy Qajymuqan aýylynda eshki ósirý fermasynyń qurylysy bastaldy. Respýblıkamyzdaǵy ekinshi jobanyń quny 1,5 mıllıard teńgeni quraıdy. Munda bolashaqta 5000 bas asyl tuqymdy túlik ósirilmek. Fermanyń óndiristik alańy 10 gektardy quraıdy.
«Zerendi asyl tuqymdy sharýashylyǵy» atalatyn JShS quryltaıshylary Hamıt Faezov pen Ermek Luqpanovtyń aıtýynsha, ferma aldaǵy kóktemde jumysyn bastaıdy. Qurylys qarqyndy júrip jatyr. Birinshi kezekte Eýropadan alyp kelinetin asyl tuqymdy mal jaıǵasatyn qora men sút zaýyty salynady. Jabdyqtar kelisimshart boıynsha Italııadan jetkiziledi. Sút óndirýdiń tolyq sıklin qamtıtyn jumys túgeldeı avtomattandyrylǵan. Munda 30-50 aralyǵynda jumys orny qurylady. Olar ıtalııalyq mamandardan sabaq alady.
О́ńirde buryn bolmaǵan joba avtorlary orta eseppen ár túlikten 800-den 1200 lıtrge deıin sút alynady dep otyr. Tutyný naryǵyna eshki súti, aırany, maıy, kilegeı men irimshigi shyǵarylmaq. Bul ónimderge Italııa men Qytaı qyzyǵýshylyq tanytyp otyrǵanyn bildik.
Baqbergen AMALBEK,
«Egemen Qazaqstan».
Aqmola oblysy,
Selınograd aýdany.