Osydan jeti-segiz jyl buryn Saryaǵash aýdanyna issaparmen «Egemen Qazaqstan» respýblıkalyq gazeti» AQ prezıdenti Saýytbek Abdrahmanov keldi. Jıynnan shyqqannan keıin shaı ishildi. Dastarqandaǵy «Saryaǵash» arasan sýyna kózi túsken Sáýkeń «Ábeke, (Saryaǵashtyń sol kezdegi ákimi Ábdibaqyt Maqulbaev) keı jerde Saryaǵashtyń arasan sýynyń ornyna qudyq sýyn qosyp satady degen sóz bar. Osyndaı áreketi úshin ustalǵandar týraly teledıdardan kórsetiledi. Osy qanshalyqty ras, dep surady. Sonda aýdan ákimi kúlip:
– Sáýke, Saryaǵashta arasan sýynyń ornyna taza sý qosyp satý tym qymbatqa túsedi, – degen.
Onysy ras. Saryaǵash aýdanynyń jerasty telegeı teńiz arasan sýy. Myń bir aýrýǵa em. Bir qyzyǵy, elýshaqty artezıan qudyǵy bolsa árqaısynyń quramy bólek. Aǵzadaǵy ishek, azqazan aýrýlaryn aıtpaǵanda ótin aldyrǵandarǵa Saryaǵashtyń sýyndaı paıdaly em Qazaqstanda joq.
Saryaǵash – kýrortty aımaq. Qazir onda 16-dan astam emdeý-saýyqtyrý ortalyqtary jumys jasaıdy. Búginde arasan sýymen ataǵy shyqqan aýdandaǵy emdeý-saýyqtyrý ortalyqtaryn halyqaralyq deńgeıge kóteretin jańa joba iske asyrylyp jatyr. Biz osy jaǵdaılarǵa baılanysty oblys ákimi Beıbit ATAMQULOVPEN suhbattasqan edik.
– Elbasy bizge qoldaǵy bar qarjyǵa maldana bermeı jańa tabys kózderin ashýdy tapsyryp otyr. Álemde týrızmnen kúrep aqsha taýyp otyrǵan memleketter kóp. Al, qazaqtyń túgelge jýyq áýlıe, ámbıeleri, han, sultan, batyr, bıleri máńgilik tynyshtyq tapqan Ońtústiktiń týrıstik áleýeti kúshti. Biraq, ár týrıstik kompanııalar ár jaqqa tartqandyqtan beıberekettik kóp. Biz osynyń bárin qorytyndylaı kele «Ontustik Tourism Center» týrıstik-aqparattyq ortalyǵyn qurý arqyly ekonomıkaly tabysqa jetýdiń jaıyn saraladyq.
– Saryaǵash kýrorttyq klasteri osy úlken istiń bir quramyna kiretin sııaqty.
– Durys aıtasyz. Saryaǵash Allanyń qalaýymen adam aǵzasyn emdeıtin qasıetti sýy bar aımaq. Ákimdiktiń zerdeleýi boıynsha jyl basynan beri Túrkistanǵa bir mln-ǵa jýyq adam týrıstik saparmen kelse, Saryaǵashqa 70 myńǵa jýyq halyq em alýǵa kelipti. Sol seksen myńǵa jýyq adamnyń deni elimizdiń batys jáne shyǵys óńirinen kelgender. Bir Saryaǵashtyń ózinde 300 myńǵa jýyq, kórshi Maqtaaralda 400 myńǵa jýyq halyq bar. Bul keremet múmkindik. Biz Elbasynyń tapsyrmasy boıynsha Saryaǵash demalys aımaǵyn halyqaralyq kýrorttar júıesine jetkizý jobasy arqyly syrttan ǵana adamdar tartyp qoımaımyz, eki aýdandaǵy 700 myńǵa jýyq halyqtyń da densaýlyǵyn nyǵaıtýǵa zor múmkindikter ashamyz.
– Naqty aıtqanda, qandaı jumystar qolǵa alynady. Keles ózeniniń ústinen salynǵan kópir halyqaralyq standartqa kelmeıtin sııaqty edi.
– «Teatr kıim ilgishten bastalady» dep Stanıslavskıı aıtty degen támsil bar ǵoı. Kelesti kesip ótetin kópirdi halyqaralyq deńgeıge jetkizý jumystary júrip jatyr. Búginde Saryaǵashtyń ózinde jıyrmaǵa jýyq emdeý-saýyqtyrý ortalyqtary bar. Endi olardyń qatary jaqyn jyldarda 96-ǵa kóbeıetin bolady. Qurylys jumystaryna negizinen jeke ınvestorlar tartylyp jatyr. Joba boıynsha 600 gektar aýmaqta sáýleti jarasqan 1500 oryndyq kýrortty qalashyq salynbaq.
Kásipkerler ońtaıly jumys jasaý úshin oblys óz qarjysyna ınfraqurylym jumystaryn rettep, arnaıy sý júıelerin salyp beredi. Saryaǵashta halyqaralyq týrısterdiń talabyna saı golf alańshasy bar. Aımaqta eki shaǵyn kól qyzmet etedi. Endi onyń qataryn oıyn-saýyq ortalyqtary, akvapark, shaǵyn áýejaı tolyqtyrady. Shymkentten Saryaǵashqa qatynaýdy jaqsartý úshin júrdek poıyz, jaıly avtobýstar júrmek. Servıstik qyzmet jaqsartylady.
Osy jobany iske asyrý arqyly Memleket basshysynyń bizge qoıyp otyrǵan tapsyrmasynyń údesinen shyǵamyz dep oılaımyz. Bul qurǵaq qııal emes, búginderi halyqaralyq deńgeıdegi demalys aımaǵynda naqty jumystar júrip jatyr.
Áńgimelesken
Baqtııar TAIJAN,
«Egemen Qazaqstan».
Ońtústik Qazaqstan oblysy.