Qazaqstannyń kóne de jańa qalalarynyń biri – Oral jyl ótken saıyn jańaryp, jasaryp jáne jasanyp keledi. Ásirese, onyń soltústik-shyǵys jaq bóligindegi birden kóz tartatyn jańa ǵımarattar – Saltanat saraıy, Qadyr Myrza Áli atyndaǵy mádenıet jáne óner ortalyǵy, onyń aldyndaǵy aqyn eskertkishi, tennıs korty men Nazarbaev zııatkerlik mektebi ǵımarattary tutastaı bir ǵajaıyp ansambl quraıdy.
Jańa jyldyń araılap atqan aq tańynda elimizdiń batys qaqpasyndaǵy jańa qurylys alańy taǵy bir teńdesi joq sándi de sáýletti ǵımaratpen tolyqpaq. Bul jańa jyldyń alǵashqy kúni qurylysy aıaqtalatyn Dostyq úıi. Ony dál osy kúni memlekettik komıssııa jaqsy degen baǵamen qabyldap almaq. Kók tústes kúmbezben kómkerilgen ǵımarattyń syrtqy kórinisi men ishki ıntererinde shyǵarmashylyq jáne arhıtektýralyq ushqyr oıdyń jemisi atoılap tur. Dostyq úıiniń jalpy aýmaǵy 4,5 sharshy metrdi quraıdy. Búgingi kúnniń bıik talǵamyna saı boı kótergen ǵımarat qurylysyn Oral óńirindegi tańdaýly qurylys kompanııalarynyń biri – «OtdelStroı» JShS turǵyzǵan. Atalǵan jobanyń quny 900 mıllıon teńge tóńireginde.
– Dostyq úıinde óńirdegi etnomádenı ortalyqtar men birlestikterdiń ofısteri ornalasatyn bolady. Munda bul úshin búgingi zaman talaptaryna saı jan-jaqty jabdyqtalǵan kabınetter men bólmeler bar. Ǵımaratta dostyq pen birliktiń týyn bıik kóterýdi murat tutqan etnomádenı birlestikter músheleriniń bári qazirgi álemdik deńgeıdegi aqparattyq tehnologııanyń barlyq túrlerin emin-erkin paıdalana alady. Qysqasy, munda zerdeli jannyń janyna qajettiniń bári de muqııat oılastyrylǵan. Mádenı ortalyqtardyń kabınetteri men bólmeleri belgili bir etnos ókilderiniń salt-dástúrler ereksheligine saı jabdyqtalǵan. Al aınadaı jarqyraǵan bıik te eńseli ári aýmaǵy atshaptyrym konferens-zaldar men kórme-holdar óziniń aıshyqty ajarymen kez kelgen adamdy tamsandyryp, tańdandyra alady. Siz múmkin dybystyq jazý stýdııasynyń qyzmetin paıdalanǵyńyz keletin shyǵar? Dostyq úıinde buǵan da tolyq jaǵdaılar bar. Sondaı-aq, munda Qazaqstan halqy Batys Qazaqstan oblystyq assambleıasy bastamashy bolǵan sanalýan is-sharalar da ótkiziletin bolady, – dedi gazet tilshisine Batys Qazaqstan oblysy Qazaqstan halqy Assambleıasy hatshylyǵynyń basshysy Ǵaısa Qapaqov.
Oral óńirin mekendeıtin santúrli etnos ókilderi ǵana emes, sonymen birge barsha batysqazaqstandyqtar jańa jyldyń alǵashqy kúni dostyq pen birliktiń odan ári tereńdeı túsýine negiz qalaıtyn sáýletti ǵımaratty paıdalanýǵa beretin «OtdelStroı» JShS qurysh qoldy qurylysshylarynyń kásibı sheberligine dán rıza. Osy arada bul qurylys kompanııasy respýblıkada eń alǵashqylardyń biri bolyp halyqaralyq sapa standarttaryn engizgen kásiporyn ekenin aıta ketken jón. Osylaısha olar básekege qabilettilik deńgeıin kóterý arqyly sheteldik fırmalarmen birigip qyzmet jasaý múmkindigine qol jetkize bildi.
...Iá, joǵaryda aıtylǵandaı, tórimizge attaǵan Jańa jyldyń araılap atqan aq tańynda Oral qalasyndaǵy qurylysy aıaqtalatyn Dostyq úıiniń aspan tústes kók kúmbezi qazirdiń ózinde alystan menmundalaıdy.
Temir QUSAIYN,
«Egemen Qazaqstan».
ORAL.
Sýrette: Oral qalasynda ashylatyn Dostyq úıiniń syrtqy kórinisi.
Sýretti túsirgen Rafhat HALELOV.