Kógildir Kókshetaý jańa jylda da kórkem ǵımarattarmen tolyǵa túspek. Solardyń qatarynda zamanaýı Neke saraıynyń boı kóterýi izgi úmitterge qanat bitiretini haq. Kópten kútken nysannyń shańyraq túrinde salynyp jatqany jaqsy nıet, shaıqalmaıtyn shattyǵymyzdyń saltanatyn asyra túsetini de qýanyshqa bóleıdi.
Qurylys qalanyń kórnekti jerinde, Buqpa taýynyń etegi men Qopa kóliniń jıeginde ekpindete salynyp jatyr. Amandyq bolsa, bas merdiger «Aq sáýle» jaýapkershiligi shekteýli seriktestigi jeti aıda jurtshylyqtyń aıryqsha nazaryndaǵy jumysty aıaqtap shyqpaq. Qos qabatty ǵımarat Shyǵys sáýlet óneriniń klassıkalyq úlgisin búgingi úrdispen úndestire qabystyratynyn aıtady mamandar. Qoldaǵy maketke qııal júgirte qarasańyz, aldymen saqına, odan keıin shańyraq bolyp jymdasqan bolashaq ǵımarattan toı áýeni estilip jatqandaı sezim keshetindeısiz. О́ris keńeıtýdi ómir máni sanaıtyn halqymyzdyń qýanyshy kóbeıe bergeı. Erteńin eńselendirý qamyndaǵy memleketimiz bul oraıda qarjy-qarajatyn úıip-tógip jatqany da ǵanıbet.
Mine, Uly Dala eli óz Táýelsizdiginiń bezbendep ólshenbeıtin 25 jyldyq qymbat belesine qadam basty. Qazaqstan Prezıdenti N.Á.Nazarbaev jýyrdaǵy Joldaýynda: «Nebári shırek ǵasyrda Qazaqstan jahandyq sharýashylyq baılanystarǵa qosylǵan egemen ulttyq ekonomıka jáne ulttardyń álemdik otbasynyń tolyqqandy qatysýshysyna aınalǵan memleket retinde qalyptasty... Bizdiń maqsatymyz – eli baqytty, jeri gúldengen qasıetti Otanymyz Qazaqstandy «Máńgilik El» etý! Álemdegi eń damyǵan 30 memlekettiń qataryna qosylyp, baı da qýatty eldermen ıyq túıistirý. Biz bul maqsatymyzǵa mindetti túrde jetemiz», dep atap kórsetti.
Bul – baılamy berik bataly sóz. Endeshe, uly maqsat saparynyń bir parasy Kókshetaýdyń erteń-aq esigin ashatyn Neke saraıynan da bastaý alatyny aqıqat!
Baqbergen AMALBEK,
«Egemen Qazaqstan».
Aqmola oblysy.