Tórim saǵan tóredeı Jańa jylym,
Buıymtaıdy eń qymbat qala búgin.
Aıdyń nuryn aıshyqtar, jerdiń júzin,
Eselensin, Alashym, daralyǵyń.
Jylym Jańa!
Jańǵyrǵan elim dana,
Jeteleıtin Aq jelken – senim ǵana.
Amanattap, ardy oılap, alǵa bastap,
Aqtańgerin ozdyrdy begim dara.
Eski jylǵa taǵarmyn nesine min,
Esem ketse, ony da keshirermin!
Tek aman-saý bolsynshy halqym meniń,
Eńseń tússe taý-tastaı ketilemin.
Quldyrańdap qulyn kún quryq jalǵa,
Alamansyz has tulpar býlyǵar ma?!
Táýelsizdik – tar joldy, taıǵaq keshý,
Táýekelsiz tartysty ul uǵar ma?!
Jyl múıiste toǵysqan jylǵalarym,
Kún jaınatyp aq muzdaq syrǵalaryn.
Kerýen kóshi bet aldy aǵys órleı,
Taǵat tappaı tosarmyn bir habaryn!
Jyl sórede toıbastar bastaǵan em,
Jańa jylym, bóleı gór baqqa kenen.
Sharaınańnan túsirme Qazaq elin,
Aınalaıyn, júzińnen, appaq álem!
Ámire ÁRIN.
Almaty oblysy.