Merekeli jylǵy berekeli bıigimiz osyndaı
Elbasymyzdyń Qazaqstan halqyn jańa 2016 jylmen quttyqtaýynyń mátini álginde ǵana qolymyzǵa tıdi. Quttyqtaýdyń bir tusynda Nursultan Ábishuly: «Jańa jyl barshamyzdy qashanda jańa jetistikke, jańa bıikke jeteleıdi», depti. Sol jańa jetistiktiń, jańa bıiktiń birin Jańa jyldyń alǵashqy aq tańynda sizderge qýana habarlaǵaly otyrmyz, qadirmendi oqyrman.
«Aldyńǵy kúni, ıaǵnı 28 jeltoqsanda oblystardaǵy menshikti tilshilerimizden túsken málimetterdiń ózi gazet taralymy qazir-aq 200 myńdyq mejeni erkin eńsergenin kórsetedi. «Qazposhta» qaptyń túbin qaqqanda, buǵan deıin esepke alynbaı kelgen «Evrıka press», «Nomad press», «Ernur press», «Alash press», «Evrazııa press», «Kazah press» sııaqty seriktestikter jan-jaqtan júrgizgen jazylymdy qosqanda jeltoqsannyń sońǵy kúnderinde keler jylǵy oqyrmandar qataryna shamamen on myńdaı, keıde tipti odan da kóp san qosylatynyn tájirıbeden jaqsy bilemiz», dep jazǵan edik 30 jeltoqsanda jaryq kórgen «Ǵumyrnama ǵıbrattary» atty maqalamyzda.
Aıtqanymyz aıdaı keldi. Mine, bizdiń qolymyzda gazet basylatyn 15 baspahananyń keshe keshki saǵat 17-de joldaǵan eń sońǵy, eń dáldengen málimetteri tur: búgingi, 2016 jylǵy 1 qańtardaǵy 1-shi, gazet tarıhyndaǵy 28 729-shy nómirdi Astanadaǵy «ERNUR» 12 434 dana, Almatydaǵy «Dáýir» 17 060 dana, Taldyqorǵandaǵy «Almaty-Bolashaq» 3 854 dana, Qostanaıdaǵy «Kostanaıpolıgrafııa» 4 735 dana, Qaraǵandydaǵy «Arko» 14 916 dana, Tarazdaǵy «Senim» 18 339 dana, Shymkenttegi «ERNUR print» 39 536 dana, Qyzylordadaǵy «Energopromservıs» 21 312 dana, Aqtóbedegi «A-Polıgrafııa» 10 853 dana, Oraldaǵy «WESTA» 14 515 dana, Pavlodardaǵy «Dom pechatı» 12 884 dana, О́skemendegi «Reklamnyı Daıdjest» 11 947 dana, Atyraýdaǵy «Atyraý-Aqparat» 13 514 dana, Aqtaýdaǵy «CASPIY PRINT» 6 862 dana, Petropavldaǵy «ERNUR» 8 171 dana etip basyp shyǵardy. Sonda qorytyndysynda ne bolady deısiz ǵoı? Qorytyndysynda el gazeti «Egemen Qazaqstannyń» 2016 jylǵy taralymy eki júz on myń toǵyz júz otyz eki dana bolyp shyǵa keledi. Bul san ótken jylǵy 203 myńnan astam taralymnan 7 myńnyń ústinde artyq ekenin ózińiz de kórip otyrsyz.
210 932!
Bul sanǵa artyq túsinikteme qajet bolmas. Bul sannyń astarynda kóp jaı jatyr. Eń bastysy – el halqynyń erteńgi kúnge seniminiń, el gazeti tynbaı, talmaı nasıhattaıtyn Elbasy saıasatyn qoldaýynyń, oqyrmandardyń boıynda otanshyldyq, eldik sezimderdiń serpile túskeniniń kelisti kórinisi bul. Osyndaı mereıli sátimizde biz gazetke taǵy da senim artqan barsha oqyrmandarymyzǵa, jazylymdy uıymdastyrýǵa atsalysqan azamattardyń bárine shyn kóńilden razylyǵymyzdy bildirip, alǵysymyzdy aıtamyz, Táýelsizdigimizdiń shırek ǵasyrlyq mereıli jylynda da «Egemen Qazaqstan» júz jylǵa jýyqtaǵan tarıhyndaǵy dańqty dástúrlerinen aınymaıtynyn jetkizemiz.
Qashanda jazar jaqsylyǵymyz, jetkizer jańalyǵymyz kóp bolsyn!
Saýytbek ABDRAHMANOV.