Muz qursaýynda jatqan Soltústik polıýste kún kúrt jylynyp, aýanyń temperatýrasy Selsıı baǵanasy boıynsha +1 gradýsqa deıin kóterildi. Bul jaıt mamandardyń alańdaýshylyǵyn týdyryp otyr. Sebebi, jyldyń bul mezgilinde atalǵan óńirde -30 gradýs aıaz bolýy tıis.
AQSh-tyń Ulttyq muhıt jáne atmosferalyq zertteýler basqarmasy ókiliniń aıtýynsha, polıýstegi aýa raıyn ǵaryshtan baqylaıtyn qurylǵy az ýaqyt osyndaı temperatýrany kórsetken. Al atalǵan ólkeniń ózinde ázirge osy baǵyttaǵy arnaıy aspaptar joq. Meteorologtar buǵan jyldyń basym bóliginde muz basyp jatýy sebep ekenin aıtýda.
Ǵalymdardyń biri: «Bul qubylys Ulybrıtanııa jaǵalaýynda soqqan «Frenk» daýylymen tikeleı baılanysty. О́ıtkeni, daýyl saldarynan bolǵan tropıkalyq jyly aýa aǵyny Soltústik polıýske jetip, aýa temperatýrasynyń dabyl qaǵarlyq deńgeıge deıin kóterilýine ákelip soqty. Búgingideı jahandyq jylyný máselesi álemdi alańdatyp turǵan kezde bul polıýste plıýstik temperatýra tirkelýi jaǵdaıdy tym ýshyqtyryp jiberýi ábden múmkin», – deıdi.
Aıta keteıik, Anglııanyń soltústik-batysynda jeltoqsan aıynyń basynda bastalǵan nóser jaýyn men joıqyn daýyl áli jalǵasýda. Tabıǵattyń tosyn minezi saldarynan alǵashqy kúnderi 60 myń úı jaryqsyz qalsa, Eplbı eldi mekeninen myńdaǵan turǵyn qaýipsiz jerge kóshirildi. Al jańajyldyq mereke kúnderi daýyl taǵy da kúsheıip, jeti myń úıdi jaryqpen qamtamasyz etip otyrǵan elektr jelilerine zalalyn tıgizdi. Sondaı-aq, Kambrııa graftyǵyndaǵy qalalar men eldi mekenderdi sý basyp qaldy.
Elaman QOŃYR,
«Egemen Qazaqstan».