Aqmola oblysyndaǵy «Altyntaý-Kókshetaý» taý-ken óndirisi JShS jańajyldyq merekelik sharalardan demeýshilik maqsatynda bas tartty. Oǵan jumsalýǵa josparlanǵan aqsha qarajaty kompanııanyń muqtaj múshelerine jáne múgedek balalarǵa materıaldyq kómek retinde bólindi.
Kompanııa basshylyǵynyń sheshimimen 85 qyzmetkerdiń árqaısysyna 50 000 teńgeden qarajat berildi. Olardyń qatarynda kópbalaly otbasylar, múgedek balalary bar qyzmetkerler, uzaq merzimdi aýyr naýqasqa shaldyqqandar, apatty jaǵdaıǵa ushyraǵandar, eki jáne odan kóp balany qamqorlyqqa alǵandar bar. Oblystyq ishki saıasat basqarmasynyń habarlaýynsha, bul maqsatqa 4 250 000 teńge aqsha jumsaldy.
Sondaı-aq, kenshiler Kókshetaýdaǵy júıke aýrýyna shaldyqqan balalar mekemesine arnaıy kreslolar satyp alý úshin 1 000 000 teńge qarjy bóldi.
Baqbergen AMALBEK,
«Egemen Qazaqstan».
Aqmola oblysy.