Eýrazııalyq top kásiporyndarynyń jumysshylary arasyndaǵy «Altyn qor-2015» alǵashqy kásibı sheberlik baıqaýy Sokolov-Sarybaı ken óndiristik birlestiginde jeti atalym boıynsha ótti. Baıqaýǵa elimizdiń ár aımaǵyndaǵy «Qazaqstan Alıýmınııi» AQ, «Qazaqstan elektrolız zaýyty», «Eýrazııalyq energetıkalyq korporasııa», «Qazhrom» UK» AQ-qa qarasty Aqsý jáne Aqtóbe ferroqorytpa zaýyttary, «Shubarkólkómir, «Transremvagon» JShS, «SSKО́B» AQ syndy kásiporyndar jumysshylary qatysty. Jumysshylar kásibı bilimi men biliktilikteri boıynsha baq synasty.
Baıqaýda kópirli kran mashınısteri, elektr-gazben dánekerleýshiler, elektrslesarlary, temir jonýshylar, ekskavator, býldozer men aýyr júk kólikteri mashınısteri – barlyǵy 40 jumysshy óz mamandyqtary boıynsha sheberlikterin kórsetip, bilimderin sarapqa saldy.
Qatysýshylardyń barlyǵy jyl boıy ózderi jumys isteıtin kásiporyndarda irikteý kezeńinen ótken júırikter.
Baıqaý eki kezeńnen – teorııalyq bilimdi tekserý men biliktilik synaýdan turdy. Qatysýshylarǵa usynylǵan árbir tapsyrma jınaqylyq, kásibılik pen jaýapkershilikti talap etti.
Aqtóbe ferroqorytpa zaýyty mehanıkalyq-jóndeý sehynyń temirden túıin túıgen 6 dárejeli temir jonýshysy Serik Nııazǵulov eki tapsyrma boıynsha da bilimi men biliktiligin kórsetip, «Úzdik tokar» atalymynda birinshi orynǵa qol jetkizdi. Onyń óndiristegi 18 jyldyq is-tájirıbesi, kórgeni men ómirden túıgeni jeńiske jeteledi. Seh ujymynyń maqtanyshyna aınalǵan Serik Nııazǵulov óziniń iskerliliginiń arqasynda birneshe ret túrli eńbek jarystaryna qatysyp, júldeli oryndardan kórinip júrgen aǵa býyn ókili. Tek byltyrǵy jyly zaýyt kóleminde ótken seharalyq «Mamandyǵy boıynsha úzdik jumysshy» baıqaýyna qatysyp birinshi oryndy ıelenip «Qazhrom»TUK» AQ-nyń saıysyna joldamany jeńip alǵan bolatyn. «Qazhromnyń» fılıaldary arasynda ótken «Úzdik jumysshy» baıqaýynda zaýyttyń namysyn qorǵaǵan edi. Kásibı tokar bul saıysta da shashasyna shań juqtyrmaaı, bas júldege ıe bolǵan edi. Endi mine, Eýrazııalyq toptyń arasynda ótken baıqaýda da osy jeńisterin taǵy da qaıtalady.
– Eýrazııalyq topta jumysshy mamandar árdaıym basty nazarda ustalady. Qarapaıym jumysshy mamandardyń mártebesin kóterip, jas jumysshylarǵa óndiristen úırenip, bilgenderimizdi úıretý úshin osyndaı baıqaý kerek-aq. Osyndaı baıqaýlar bizdiń kásiporynda da jıi ótkiziledi. Qazirgi qarjy daǵdarysyna qaramastan, osyndaı aýqymdy is-sharany uıymdastyryp, jumysshy mamandarǵa kóńil bólip, mártebesin kótergeni úshin uıymdastyrýshylarǵa rızashylyǵymdy bildiremin. Bul shara tájirıbe almasý úshin asa mańyzdy ári jumysshylardyń kásibı biliktiligin arttyrýǵa jaǵdaı jasaıdy, sheberlik shyńdaıtyn úlken mektep ispettes, – deıdi Serik Nııazǵulov.
Jeńimpazdarǵa birinshi oryn úshin 500 myń teńge, ekinshi orynǵa – 300 myń, úshinshi oryn ıesine 200 myń teńge kóleminde qarjylaı syılyq usynyldy. Ár nomınasııa boıynsha birinshi orynǵa ıe bolǵandar Astana qalasynda ótetin qorytyndy saltanatty is-shara kezinde marapattalatyn bolady.
Satybaldy SÁÝIRBAI,
«Egemen Qazaqstan».
Aqtóbe oblysy.