О́skemendik kásipker, «Lázzat» tigin sehynyń jetekshisi Aıgúl Tuńǵatarova – sal aýrýymen jeti jyl tósek tartyp jatsa da, óz ómirin ózi qolyna alyp, aıaqtan nyq turǵan, jeke kásibin qurǵan erik-jigeri erekshe jan. Ekinshi toptaǵy múgedek áıel áleýmettik járdemaqy kóleminiń artýy kembaǵal jandardyń turmysyna sep bolatyndyǵyn aıtady.
– Adamdy alǵa jeteleıtin – eńbek pen erik-jiger. Elbasymyz osy qasıetterdi árqashan elimizge úlgi etip keledi. Biz, ómirde qanshama qıyndyq kórsek te, eńbektiń arqasynda kózdegen maqsatymyzǵa jettik. Aıtalyq, búginde atelemizde múgedektiktiń ártúrli tobyna jatatyn 14 adam eńbek etedi. Al jalpy oblys kóleminde 18 adamdy jumyspen qamtyp otyrmyz. Kásipornymyzda júzden astam tósek-oryn jabdyqtary men arnaıy kıim túrlerin shyǵaramyz.
Prezıdent jýyrdaǵy Joldaýynda jańa áleýmettik saıasat júzege asyrylatynyn málimdedi. Iаǵnı, memleket álsiz qorǵalǵan azamattardy qoldaıdy. Muqtaj adamdarǵa ataýly áleýmettik kómek kórsetedi. Biraq bul memleketke birjola masyl bolý degendi bildirmese kerek. Osy oraıda Memleket basshysy «Basqalar tabysty óz eńbekterimen tabýy tıis», dep atap kórsetti.
Álbette, Qazaqstanda áleýmettik jaǵynan az qamtylǵan adamdarǵa memleket tarapynan kóp kóńil bólinedi. Mysaly, men áleýmettik járdemaqy alamyn. Bıyl bul kómek 1 qańtardan bastap 30 paıyzǵa artatyny erekshe qýantady. Sondaı-aq, biz jylyna bir márte memlekettiń qoldaýymen emdik-saýyqtyrý shıpajaıyna joldama alamyz. 2015 jyldyń 11 jeltoqsanynda kil myqty kásipkerler qatysqan «Altyn sapa» baıqaýynyń «Isker» atalymy boıynsha jeńimpaz bolyp tanyldyq. Prezıdent Nursultan Ábishulynyń aldynda óz ónimderimizdi kórsetýge múmkindik aldyq. Munyń barlyǵy eń aldymen Elbasynyń, táýelsiz memleketimizdiń qoldaýy men qazirgideı qarjylyq qyspaq kúsheıgen zamanda óz azamattaryn qıyndyqqa qaldyrmaıtynynyń kórinisi dep bilemin.
Jazyp alǵan
Dýman ANASh,
«Egemen Qazaqstan».
О́SKEMEN.