Jetistikke toly jyldardyń jarshysyndaı

Keshe Astanadaǵy Ulttyq akademııalyq kitaphanada el Táýelsizdiginiń 25 jyldyǵyna arnalǵan «Qazaqstan jańa jahandyq naqty ahýalda: ósim, reformalar, damý» atty kitap kórmesi ashyldy. Jańa jyldyń alǵashqy jumys kúninde halyq nazaryna usynylǵan bul kórme jyl aıaǵyna deıin úzilissiz qyzmet kórsetpek. Kórmeniń ashylý saltanatyna qoǵam qaıratkerleri, zııaly qaýym ókilderi, Astana qalalyq mekemeleriniń ujymdary, jas­tar, kitaphanashylar jáne elorda turǵyndary qatysty. Atalǵan ıgi shara barysynda memleket jáne qoǵam qaıratkeri, belgili ǵalym Myrzataı Joldas­bekov óziniń júrekjardy lebizin bildire otyryp, kórmeniń mán-mańyzyn atap ótti. Sondaı-aq, ol el Táýelsizdiginiń 25 jyl­dyǵyna arnalǵan kórmeniń jumy­syna sáttilik tiledi. «Bizdiń ata-babalarymyz táýel­sizdik úshin aıanbaı kúresti. Ba­syn báıgege tikti, qanyn tókti. Sol babalarymyzdyń armany oryndalyp, Táýelsizdik tańyn kórý baqyty bizge buıyrdy. Táýelsizdigimizge qol jetkizýde, ony baıandy etýde Elbasy Nur­sultan Nazarbaevtyń sińirgen eńbegi ólsheýsiz. Men Táýelsizdiktiń eleń-alańynda Elbasymyzdyń mazasyz kúnderiniń, uıqysyz túnderiniń kýási boldym», – dedi M.Joldasbekov. Buǵan qosa, ol Ulttyq akademııalyq kitap­hana Elbasynyń bastamasymen iske qosylǵanyn aıta kelip, mem­lekettik mańyzy bar aýqymdy sharalardyń basym bóligi osy jerden bastaý alatynyn jetkizdi. Memleket tarıhy ınstı­týtynyń dırektory, tarıh ǵy­lymdarynyń doktory Búrkitbaı Aıaǵan óz kezeginde 2016 jyly atalyp ótkeli otyrǵan mańyzdy sharalardy eske sala kelip, Qazaqstan Táýelsizdiginiń 25 jyldyǵyna arnalǵan kórmeniń ashylýy úlken mereke ekenine toqtaldy. Tarıh konteksindegi qazaq memlekettiliginiń kópǵasyrlyq qalyptasý tarıhyn, Táýelsiz Qa­zaqstannyń saıası-ekono­mı­kalyq, áleýmettik damýyn, bes ınstıtýttyq reformany júzege asyrý jónindegi «100 naqty qa­dam» Ult josparyn, Memleket basshysynyń «Qazaqstan jańa jahandyq naqty ahýalda: ósim, reformalar, damý» atty Qazaqstan halqyna arnaǵan Joldaýyn túsindirý jáne óskeleń urpaqtyń adamgershilik tárbıesine yqpal etý, «Máńgilik El» ulttyq ıdeıa­sy aıasynda jastar arasynda patrıottyq sezimdi qalyptastyrý maqsatynda uıymdastyrylǵan bul kórme mekemeniń kitaptary men elektrondy qorynan jınaqtalǵan 4 bólimnen turady. Birinshi bólim «Qazaqstan Respýblıkasynyń Táýelsizdigine – 25 jyl» dep atalǵan. Onda Táýel­siz Qazaqstannyń qalyptasý tarıhy men Táýelsizdik jyldaryndaǵy memleketimizdiń damýy jaıly baıandalady. Ekinshi bólim «Uly Dala eli – Máńgilik El» uǵymyna arnalypty. Dáliregi, Elbasy Nursultan Nazarbaevtyń «Máńgilik El» jalpyulttyq patrıottyq ıdeıasyna baılanys­ty, sonymen qatar Qazaqstan halqy Assambleıasynyń qyzmetin baıandaıtyn ádebıetter qoıylǵan. «Elbasy joly – el­diktiń joly» atty úshinshi bólim­de Táýelsiz Qazaqstannyń tarı­hyndaǵy Elbasynyń qyzmeti týraly kitaptar usynylǵan. «EHRO-2017» – Astana mereıi» atty tórtinshi bólimde Qazaqstannyń el­or­dasy – Astananyń tarıhy men ómiri jaıly kitaptar jáne «Astana EKSPO-2017» halyqaralyq ma­mandandyrylǵan kórmesi týraly málimetter berilgen. Uıymdastyrýshylardyń aı­tý­ynsha, kórmege 400-den asa ki­tap qoıylǵan. Bul kórme Táýel­sizdigimizdiń 25 jyldyǵyna ar­nal­ǵan mádenı-aǵartýshylyq is-sharalardyń basy bolyp tabylady. Bir jyl boıy turaqty túrde qyzmet kórsetetin kórme barysynda Ulttyq akademııalyq kitaphananyń aqparattyq-kitap­hanalyq resýrstaryn dáripteýge, Táýelsizdik jyldarynda baspadan shyqqan ádebıet týyndyla­ryn nasıhattaýǵa basa mán be­rilmek. Joldybaı BAZAR, «Egemen Qazaqstan». Sýretti túsirgen Erlan OMAROV.