ASTANA. 6 qańtar. Qyzylordalyq kásipker 50 mln.teńge grant aldy. Bul týraly egemen.kz tilshisi habarlady.
Qyzylorda oblystyq kásipkerler palatasy dırektorynyń mindetin atqarýshy Darhan Myrzalıevtiń aıtýynsha, byltyr «Qyzylordanyń qurylys materıaldary» JShS Kásipkerler palatasyna ótinish jasaǵan bolatyn. Kompanııanyń basshysy «Tehnologııalyq damý jónindegi ulttyq agenttik» AQ-nyń uıymdastyrýymen ótetin ınnovasııalyq granttar baıqaýyna qatysqysy keletinin aıtyp, palatadan bıznes-jospar jáne ózge de qujattardy ázirleýge kómek kórsetýin surady.
«Qyzylordanyń qurylys materıaldary» JShS-i 2014 jyly qurylǵan kompanııa. Ol oblysta óndiriske ınnovasııalyq tehnologııalardy jáne joǵary tehnologııalyq, tıimdi jáne ekologııalyq qaýipsiz ázirlemelerdi engizýmen aınalysady.
«Búginde kompanııa «Penobeton óndirisi úshin kóbik shyǵarý» jobasymen «Tehnologııalyq damý jónindegi ulttyq agenttik» AQ-nyń uıymdastyrýymen ótken joǵary tehnologııaly ónimderdi óndirýdiń bastapqy kezeńine arnalǵan baıqaýǵa qatysyp, negizgi kezeńinen ótti. Sondaı-aq oń saraptamalyq qorytyndy aldy. Jalpy grant kólemi 50 mln.teńge. Jaqyn kúnderi kelisim shartqa qol qoıylady dep kútilýde», deıdi Darhan Myrzalıev.
Jalpy, búginde ınnovasııalyq granttardyń 9 túri bar. Otandyq kásipkerler joǵary tehnologııaly ónimderdi óndirýdiń bastapqy kezeńinde 50 mln.teńgege deıin, tehnologııany kommersııalandyrýǵa 100 mln.teńgege deıin, ónerkásiptik zertteýge 30 mln.teńgege deıin, patentteý úshin 6 mln.250 myń teńgege deıin qoldaý ala alady. Jumys ister turǵan kásiporyndar basqarýshylyq-óndiristik tehnologııalardy engizgeni úshin 15 mln.teńgege deıin, ınjenerlik-tehnıkalyq personaldyń shet elde biliktiligin jetildirý úshin 2 mln.teńgege deıin, joǵary bilikti sheteldik mamandy tartý úshin 9 mln.teńgege deıin, konsaltıngtik, ınjınırıngtik jáne jobalyq uıymdardy tartý úshin 35 mln.teńgege deıin, tehnologııany alý úshin 150 mln.teńgege deıin granttar ala alady.
Baǵdarlama Investısııalar jáne damý mınıstrligi arqyly júzege asyrylýda. Baǵdarlama operatory «Tehnologııalyq damý jónindegi ulttyq agenttik» AQ.
Dastan Kenjalın.
Derek, sýret: Qyzylorda oblysy kásipkerler palatasynyń baspasóz qyzmeti.