ASTANA. 6 qańtar. Syrtqy ister mınıstrligi Taıaý Shyǵystaǵy ahýalǵa baılanysty túsindirmesin jarııalady. Bul týraly mınıstrliktiń baspasóz qyzmeti habarlady.
Habarlamada: «Qazaqstan Taıaý Shyǵystaǵy bolyp jatqan úderisterdi jiti nazarda ustap jáne alańdaýshylyqpen baqylaýda», – delingen.
Sonymen qatar, atalǵan vedomstvo: «Álemdik qaýymdastyqtyń jaýapty múshesi retinde Qazaqstan óńirdegi qaýipsizdik pen turaqtylyqqa qater tóngen kezde jáne terrorızmge qarsy jahandyq kúresti ulǵaıtý qajettigi jaǵdaıynda Saýd Arabııasy Koroldigi men Iran Islam Respýblıkasynyń arasyndaǵy qarym-qatynastardyń shıelenise túsýine alańdaýshylyq bildiredi.
Biz osy óńirdegi bizge dostyq qatynastaǵy baýyrlas memleketter – Saýd Arabııasy jáne Irannyń basshylyǵyn, sondaı-aq, basqa da memleketterdi konfessııaaralyq shıelenistiń ári qaraı órship ketpeýi úshin, kelisimdi qamtamasyz etý men dıplomatııalyq qatynastardy qaıta qalpyna keltirý úshin saıası dıalogty ornatýǵa jáne elder arasynda kelissózder júrgizýge shaqyramyz. Biz barlyq tartylǵan taraptardy qaýipti deńgeıden ótpeýge shaqyramyz.
Sheteldik dıplomatııalyq ókildikterge shabýyl jasaýǵa jol berilmeýi tıis, al akkredıtteý elderi Vena konvensııasyna sáıkes olardyń qaýipsizdigin qamtamasyz etýge mindetti.
Osyǵan oraı, Qazaqstan qalyptasqan ahýaldy sheshýdiń bir ǵana durys joly retinde saıası sheshim men dıalogty jaqtaıdy», – dep málim etti.
Elaman Qońyr.
Derek, sýret: Syrtqy ister mınıstrliginiń baspasóz qyzmeti.