AQTО́BE. 6 qańtar. Aqtóbe qalasynda jańa jyl qarsańynda birneshe nysan paıdalanýǵa berildi. Sonyń biri – Sáńkibaı batyr dańǵylynda boı kótergen «Progress» bıznes ortalyǵy. Bul týraly egemen.kz tilshisi habarlady.
Zamanaýı jańa bıznes ortalyqtyń saltanatty ashylýyna qatysqan oblys ákimi Berdibek Saparbaev bul nysannyń bıznes qaýymdastyǵy úshin jańa jyldyq tartý bolǵanyna toqtala kelip, jańa jumys oryndarynyń ashylýyna jeke qarjysyn salǵan kásipkerge rızashylyǵyn jetkizdi. О́ńir basshysy búgingi kúni oblysta 52 myń shaǵyn jáne orta kásipkerlik sýbektisi jumys isteıtinin, bıznestiń damýyna qoldaý kórsetýdiń jalǵastyrylatynyn atap ótti.
Berdibek Saparbaev ortalyqty aralap kórip, Eýropalyq qaıta qurý jáne damý bankiniń, aqparattyq tehnologııalar salasynda qyzmet kórsetetin «Adal Traffic» kompanııasynyń jáne jasóspirimderdiń shyǵarmashylyǵyn damytýǵa arnalǵan «Medıa Pro» prodıýserlik ortalyǵynyń keńselerimen tanysty. Prodıýserlik ortalyqta óńir basshysy akterlik óner boıynsha dáris alyp júrgen oqýshylardyń ótinishimen «Juldyzdar qabyrǵasyna» alǵash bolyp óz qoltańbasyn qaldyrdy.
Bıznes ortalyǵyn salýǵa «Norıs ı K» JShS 850 mıllıon teńge mólsherinde jeke ınvestısııasyn salǵan. Seriktestik dırektory Erbol Jarjanovtyń aıtýynsha, bul bıznes ortalyǵy – joǵary komfortty jańa zamanaýı keshen. Segiz qabatty, jalpy aýdany 8 200 sharshy metr bolatyn ǵımaratta túrli kompanııalardyń keńseleri ornalasady. Qurylys jumystaryna paıdalanylǵan materıaldardyń 80 paıyzy qazaqstandyq úles ekenin atap ótken jón.
Qala boıynsha «A» klasynyń talaptaryna sáıkes keletin jalǵyz bıznes ortalyǵynda 60 orynǵa arnalǵan jerasty avtoturaǵy bar. Ǵımarat kásipkerlerdiń bıznesterin tabysty túrde júrgizýi úshin qajet qondyrǵylarmen jabdyqtalǵan, optıkalyq-talshyqty telekommýnıkasııa, beınebaqylaý jáne órtten qorǵaý júıeleri, kúzet qyzmeti, Ońtústik Koreıa eliniń Silver kompanııasy shyǵarǵan dybyssyz lıft jumys isteıdi.
Satybaldy Sáýirbaı.
Derek, sýret: egemen.kz.