Uly dala eli – uly arman jolynda
Otandastarymyz Elbasy N.Nazarbaevtyń «Ult Jospary – qazaqstandyq armanǵa bastaıtyn jol» atty jańa eńbegin qyzý qoldaýda
Keshe Qazaqstan Respýblıkasynyń Prezıdenti Nursultan Nazarbaevtyń «Ult Jospary – qazaqstandyq armanǵa bastaıtyn jol» degen taqyryppen baǵdarlamalyq maqalasy jaryq kórgen bolatyn. Buǵan sebep, ústimizdegi jyldyń 1 qańtarynan «5 ınstıtýttyq reformany júzege asyrý boıynsha 100 naqty qadam» – Ult Josparyn oryndaýdyń praktıkalyq kezeńi bastalǵan edi. Shyn máninde, bizge tarıhymyzda buryn-sońdy bolmaǵan aýqymdaǵy ulttyq zańnamaǵa ózgeristerdi baǵamdaýdyń mańyzy zor ekeni belgili. Onyń ústine, olar bizdi qazaqstandyq armanymyz – osy ǵasyrdyń ortasyna qaraı álemdegi asa damyǵan 30 eldiń qataryna qosylý armanymyzǵa jeteleıtini anyq. Sondyqtan, gazet jaryq kórisimen qazaqstandyqtar Elbasynyń eldigimizdiń erteńine erekshe baǵdar beretin maqalasymen tek tanysyp qana qoımaı, ózderiniń júrek túkpirlerinen shyqqan lebizderin de bildirýge asyqqan bolatyn. Qazirgi tańda qoǵam arasynda Elbasynyń «Ult Jospary – qazaqstandyq armanǵa bastaıtyn jol» atty maqalasyn talqylaý qyzý júrgizilýde. Sondaı talqylaý keshe Ortalyq kommýnıkasııalar qyzmetinde ótip, oǵan birqatar sarapshylar qatysty. Aldymen sóz alǵan Qazaqstan Respýblıkasy Prezıdenti janyndaǵy Memlekettik basqarý akademııasynyń Etnosaralyq qarym-qatynastardy zertteý ortalyǵynyń jetekshisi, Qazaqstan halqy Assambleıasynyń Ǵylymı-sarapshylyq keńesi tóraǵasynyń orynbasary, sosıologııa ǵylymdarynyń doktory Aıgúl Sádýaqasova Elbasy óz maqalasynda Ult Josparyn oryndaýdyń praktıkalyq kezeńi bastalǵandyǵyn kórsetkendigine erekshe nazar aýdartty. Sonyń ishinde bes ınstıtýttyq reformanyń eń negizgisi – birligi jarasqan ultymyzdyń negizi men biregeıligin qalyptastyrý. «Ulttyń birligin nyǵaıtýdaǵy qandaı is-áreketterdi jáne qandaı josparlarymyz bar ekenin atap ótti. Qazaqstan bıylǵy jyly óz táýelsizdiginiń jıyrma bes jyldyǵyna aıaq basty. Osy jyldar ishinde júzden astam ulttar men ulystar mekendegen keń-baıtaq Qazaqstan óziniń ǵasyrlar boıy jınaqtap kele jatqan qundylyqtaryn basym etkizip, ótpeli kezeńdi bastan keshe otyryp, ekonomıkasy nyǵaıǵan memleketti nyq aıaqtan turǵyzdy», dep atady Aıgúl Kákimbekqyzy. Bul rette, sarapshy qazirgi tańda álemde kóptegen qaýip-qaterlerdiń oryn alyp otyrǵandyǵyn da tilge tıek ete ketti. Sonyń ishinde ekonomıkalyq daǵdarystar men áskerı qaqtyǵystar oryn alyp otyrǵandyǵyna da nazar aýdartty. Osy turǵydan kelgende Elbasy eń basty qundylyq retinde eldiń birligi ekendigin de eskerte ketipti. Bizdiń tatýlyǵymyz dep reformalardyń ishinde biregeılik jáne birlik degen baǵytty atap ótedi, dedi A.Sádýaqasova sózin sabaqtaı túsip. Osy baǵytty qalyptastyrý úshin eki negizgi tetik qalyptasqan. «Birinshiden, Qazaqstan halqy Assambleıasy ınstıtýty. Júzden astam etnostyq toptar turatyn Qazaqstan jeri olardyń naqty Otany. Bul jerde «Bir el – bir taǵdyr» degen ustanymymyz ben birligimizdi saqtap kele jatqan elmiz. Búgingi tańda sony maqtan etemiz. Ekinshiden, bul jalpyulttyq «Máńgilik El» ıdeıasy. Elbasy osy ıdeıany 2012 jyly birinshi ret aıtqan edi», dep atap kórsetti Aıgúl Kákimbekqyzy. Sonyń ishinde, negizgi eldiń qundylyqtaryn dáriptep, bolashaqtan «Máńgilik El» urpaǵyn qazirden bastap tárbıeleý úshin qandaı josparlardy júzege asyrýymyz kerektigi de naqty kórsetilipti. Ásirese, úshtildik bilim júıesine aýysý jaıy da nazardan tys qalmaǵan. Osy oraıda sarapshy áleýmettik, tipti, memlekettik qyzmet salasynyń ishinde de eshqandaı násildik, etnostyq qatystyǵyna qaramastan elimizde Konstıtýsııamen bekitilgen qazaqstandyqtardyń barlyǵynyń da múmkinshilikteri bar degen qaǵıdaty saqtalǵandyǵyn atady. Elbasy óz maqalasynda elimizde júrip jatqan qarqyndy modernızasııalaý prosesiniń «Qazaqstan-2050» Strategııasynda kórsetilgen eń damyǵan elderdiń otyzdyǵynyń qataryna kirýmen ushtasyp jatqandyǵyna jáne ol byltyrdan beri is júzinde júzege asyp jatqandyǵyna den qoıdy. «2015 jyl búkil elimizge Qazaqstan halqy Assambleıasynyń 20 jyldyǵy barysynda «Úlken el –Úlken otbasy» baǵdarlamasy bastalyp ketti. Sonymen qatar, jańa áleýmettik jobalar da iske asyrylyp jatyr. Jalpy, eldegi tutastyqty jáne birlikti nyǵaıtý – basty maqsat. Negizi biregeılik azamattyq negizinde qalyptasýy jáne nyǵaıýy kerek degen Elbasynyń tapsyrmasy osy qujattar arqyly iske asyrylýda», dedi Aıgúl Kákimbekqyzy. Sonymen qatar, biregeılikti jáne birlikti nyǵaıtý men damytý tujyrymdamasy, Qazaqstan halqy Assambleıasynyń damý tujyrymdamasy osy ótken jyldyń sońǵy kúnderi bekitilip, ústimizdegi jyldyń qańtarynan bastap júzege asyrylýda ekeni de ataldy. Sondaı-aq, keshegi brıfıngte Ekonomıkalyq zertteýler ınstıtýty basqarmasynyń tóraǵasy Maqsat Muqanov, osy ınstıtýt tóraǵasynyń birinshi orynbasary Áset Erǵalıev jáne ınstıtýttyń kásipkerlikti damytý ortalyǵynyń dırektory Nurlan Qulbatyrov máselege ekonomıkalyq turǵydan keldi. Atap aıtqanda, Joǵarǵy zań shyǵarý organy tarapynan qabyldanǵan 59 zań ekonomıkanyń jańa kórsetkishtermen damýyna negiz qalap otyr. Ásirese, Elbasy maqalasynda shaǵyn jáne orta bızneske, jalpy kásipkerlikke erekshe den qoıylǵandyǵy erekshe ataldy. Elimizde júrgizilip otyrǵan reformalar halyqaralyq qoǵamdastyq tarapynan baǵalanyp, elimizde iskerlik belsendilikti arttyrý baǵytynda jeke bastamalarǵa qoldaý bildirilip, ınvestısııalyq tartymdy elge aınaldyrý baǵytynda birqatar is-sharalar qolǵa alynýda. Asqar TURAPBAIULY, «Egemen Qazaqstan».