Qatarynan tórtinshi jeńis

Burnaǵy kúni Qurlyqtyq hokkeı lıgasy sheńberinde Astananyń «Barysy» óz aıdynynda Ekaterınbýrgtiń «Avtomobılıst» komandasyn qabyldady. Tartysty ótken oıyn nátıjesinde bizdiń jasaq 4:3 esebimen jeńiske jetip, úsh upaıdy qorjynǵa saldy. Andreı Nazarovtyń shákirt­teri kezdesýdi óte shıraq bastady. Salǵan jerden alǵa umtylǵan aıdyn ıelerin qonaqtar oıyn erejesin buzý arqyly ǵana toqtata aldy. Nátıjesinde 3 jáne 4-mınýttarda «Avtomobılıstiń» eki birdeı oıynshysy aıdynnan qýyldy. Alaıda, «Barys» hokkeıshileri úsh qorǵaýshymen qalǵan reseılikterdiń osal tusyn taba almady. Esesine, 8-mınýtta qonaqtar oıynshy basymdyǵyn júzege asyryp, Vıtalıı Popovtyń kómegimen esep ashty. Úziliske 6 mınýt qalǵanda «Avtomobılıst» sapy­nan Anatolıı Golyshev mer­gen­di­gimen kózge túsip, esepti eseledi. Ekinshi kezeń taǵy da «Barys­tyń» basymdyǵymen bastaldy. Bul joly júıeli oıyn órne­gin kórsetken astanalyqtar bir mı­nýttyń ishinde eki shaıba soǵyp, tarazy basyn teńestirip ketti. Atap aıtqanda, 22-mınýtta Kevın Dallmen nátıjeli soqqy jasasa, 23-mınýtta Roman Starchenkonyń mereıi ústem boldy. Oıynnyń sońǵy kezeńinde, ıaǵnı, 42-mınýtta Petr Koýkal bizdiń qaqpadan sańylaý taýy­p, qonaqtar taǵy da alǵa shyqty. Áıtse de, saǵy synbaǵan barys­tyqtar shabýyldaryn toqtatpady. Bul taktıka óz je­misin berip, Dastın Boıd 50-mınýtta esepti 3:3-ke jetkizse, 54-mınýtta «Barystyń» kapıtany Brendon Bochenskı jeńis shaıbasynyń avtory atandy. Osylaısha, «Barys» pleı-off joldamasyna talastaǵy basty qarsylastyń biri «Avto­mobılısten» úsh upaı oljalady. Búginde 48 oıynnan 69 upaı jıǵan elordalyq ujym Shyǵys konferensııasynda 7-orynda keledi. Al 64 upaıy bar Ekaterınbýrgtiń komandasy – 9-orynda. Degenmen, onyń «Barystan» úsh oıyn kem ótkizgenin atap ótken jón. Bizdiń komanda kelesi kezde­sýin 11 qańtar kúni Tolıattıde jergilikti «Ladamen» ótkizedi. Elaman QOŃYR, «Egemen Qazaqstan».