Qańtardyń 5-inen 6-yna qaraǵan túni Soltústik Koreıada sýtegi atom bombasy synaqtan sátti ótkizildi. KHDR-diń ortalyq televıdenıesi taratqan bul aqparda Phenıannyń, sonymen birge, eldiń egemendigine qol tıgizilmese, ıadrolyq qarýdy eshkimge qoldanbaıtyny jetkizilgen. Soltústik Koreıa bıligi, sondaı-aq, munymen toqtalyp qalmaı, óziniń ıadrolyq áleýetin udaıy arttyra beretinin málimdegen.
Burnaǵy kúni túnde AQSh, Koreıa jáne Japonııa seısmostansalary Soltústik Koreıanyń Iаngando provınsııasyndaǵy Phýngerı ıadrolyq polıgony aýdanynda tehnogendik sıpattaǵy óte kúshti jerasty dúmpýiniń oryn alǵanyn tirkegen. Munda seısmıkalyq dúmpý kúshiniń magnıtýdasy Rıhter baǵanasy boıynsha 4,2-ni qurady.
Osyǵan baılanysty Japonııa men Koreıa Respýblıkasynyń úkimetteri qaýipsizdik keńesteriniń shuǵyl otyrystaryna jınaldy. Bul eki eldiń bılikteri ıadrolyq synaqtar saldarynan oryn alatyn jerasty silkinisteriniń 2005 jyldan bastalǵanyn aıtyp otyr. Sol kezden KHDR ózin ıadrolyq derjava retinde jarııalaǵan bolatyn. Budan keıin bul el sondaı synaqtardy 2006, 2009 jáne 2013 jyldary jasady. Sonyń saldarynan BUU Qaýipsizdik Keńesi KHDR-ge qarsy sanksııa engizgen edi.
Japonııa sarapshylary kezekti ıadrolyq synaqqa baılanysty aımaqtaǵy radıasııalyq fonnyń artyp ketpegenin atap ótti.
Damır QOJAMQUL.