Palata Spıkeri Qabıbolla Jaqypovtyń tóraǵalyǵymen ótken Májilistiń jańa jyldaǵy alǵashqy bıýro otyrysynda bekitilgen kún tártibine sáıkes, aldaǵy jalpy otyrysta birqatar halyqaralyq qujattar depýtattar talqysyna usynylmaq.
Olar: Chehııamen Tabys pen kapıtalǵa salynatyn salyqqa qatysty qosarlanǵan salyq salýdy boldyrmaý jáne salyq tóleýden jaltarýǵa jol bermeý týraly konvensııaǵa ózgerister men tolyqtyrýlar engizý týraly hattamany, sonymen qatar, Qazaqstan men Úndistan arasyndaǵy sottalǵan adamdardy berý týraly kelisimdi ratıfıkasııalaýǵa qatysty bolmaq.
Sondaı-aq, osy kúni Qazaqstanmen energııa tıimdiligin arttyrý baǵdarlamalaryna jáne jastar korpýsyn damytýǵa arnalǵan bir donordyń Trast qory ákimshisi retinde áreket etýshi Halyqaralyq Qaıta qurý jáne damý banki arasyndaǵy grant týraly (Jastar korpýsyn damytý jobasy) kelisim ratıfıkasııalanady dep kútilýde.
Jobanyń maqsaty jastardyń, ásirese, áleýmettik turǵydan osal toptarynyń qoǵamdastyq ómirine tartylýyn yntalandyrý, sondaı-aq, qoǵamdastyqtyń ıgiligi jolyndaǵy qoǵamdyq paıdaly qyzmet daǵdylaryna oqytý baǵdarlamalary arqyly olardyń ómirlik mańyzdy daǵdylaryn damytý bolyp tabylady.
Jalpy otyrysta ilespe qujattarmen tólemder jáne tólem júıeleri, kollektorlyq qyzmet, halyqty jumyspen qamtý týraly zań jobalary boıynsha qorytyndy ázirleý merzimi taǵaıyndalatyn bolady.
Osy kúni Májilis depýtattary Qazaqstan men Moldova úkimetteri arasyndaǵy zańsyz bolatyn adamdardyń readmıssııasy týraly kelisimdi jáne ony iske asyrý boıynsha atqarý hattamasyn, sonymen birge, Qyrǵyz Respýblıkasymen óteýsiz áskerı-tehnıkalyq kómek kórsetý týraly úkimetaralyq kelisimdi, 2009 jylǵy 9 maýsymdaǵy Eýrazııalyq ekonomıkalyq qoǵamdastyqtyń Daǵdarysqa qarsy qoryn qurý týraly shartqa ózgerister engizý týraly hattamany jáne qordyń qarajatyn basqarý týraly kelisimge ózgerister engizý týraly hattamany, sondaı-aq, bir taraptan EAEO men oǵan múshe memleketter jáne ekinshi taraptan Vetnam Sosıalıstik Respýblıkasy arasyndaǵy erkin saýda týraly kelisimdi, Qazaqstan men Slovakııa arasyndaǵy Investısııalardy kótermeleý jáne ózara qorǵaý týraly úkimetaralyq kelisimdi ratıfıkasııalaýǵa qatysty zań jobalaryn jumysqa qabyldamaq, dep habarlady Májilistiń baspasóz qyzmeti.