Kókshetaý áýejaıynyń vıse-prezıdenti Oleg Chernyshevtiń jumys ornynda asylyp qalǵandyǵy jónindegi habar birqatar adamdy eleń etkizdi. Tosyn oqıǵa jaıly alypqashpa sózder de kóbeıdi. Mine, endi Aqmola oblystyq kólik prokýratýrasy osyǵan qatysty Qylmystyq kodekstiń 105-babyna saı qylmystyq is qozǵalǵanyn habarlady.
Sondaı-aq, prokýratýra ókili munyń aldyn ala tujyrym ekendigin eskertti. Ázirge arnaıy komıssııa tııanaqty zertteý jumystaryn júrgizýde. Barlyq qorytyndy quzyrly komıssııa jumysynyń aıaqtalýymen aıqyndalady.
Oleg Chernyshev Kókshetaý áýejaıynda 28 jyldan beri jumys isteıdi, top-menedjerlik qyzmetke taǵaıyndalǵanyna 4 aı bolǵan. Máıitti Chernyshevtiń atalǵan áýejaıda jumys atqaratyn uly taýyp alǵan. Onyń týǵan-týystary 50 jastaǵy azamattyń óz-ózine qol jumsaýy múmkin emestigin aıtady. Onyń ústine 75 jastaǵy anasyna únemi qamqor bolyp júretin O.Chernyshevtiń qartaıǵan anasyn qaıǵyǵa batyrýy aqylǵa qonbaıdy, deıdi olar.
Árıne, joǵaryda aıtylǵan máselelerdiń anyq-qanyǵy zertteý amaldarynyń qorytyndysynda anyqtalatyny belgili. Al áýejaı basshysy qyzmetinen bosatyldy.
Baqbergen AMALBEK,
«Egemen Qazaqstan».
Aqmola oblysy.