ASTANA. 12 qańtar. Qazaqstan Respýblıkasy Qarýly Kúshteriniń Áskerı-tarıhı murajaıy baǵaly jádigermen tolyqty. Bul týraly egemen.kz tilshisi habarlady.
Murajaı qoryna 1941-1945 jyldardaǵy Uly Otan soǵysynyń basty jádigeri – Jeńis Týynyń kóshirmesi berildi.
Jeńis Týynyń kóshirmesin Máskeýde ótken TMD Qorǵanys mınıstrleri keńesiniń otyrysynda RF Qorǵanys mınıstri Sergeı Shoıgý QR Qorǵanys mınıstri Imanǵalı Tasmaǵambetovke tapsyrǵan bolatyn.
«Batyrymyz, urpaǵymyz Raqymjan Qoshqarbaev tikken Jeńis Týynyń kóshirmesi murajaıǵa tapsyryldy. Balalarymyz, bolashaǵymyz úshin bul urpaqtarymyzdyń jetistikteri men olardyń qandaı batyl bolǵandary týraly esteliktiń nyshany bolmaq», - dedi QR QK Bas shtaby bastyǵynyń orynbasary – QR QK BSh Tárbıe jáne ıdeologııalyq jumystar departamentiniń bastyǵy general-maıor Muhamedjan Talasov.
Soǵys alańynda qasqaıyp turyp shaıqasqan ata-babalarymyzdyń batyldyǵy bite qaınasqan elimiz, qazaqstandyq armııanyń tarıhy úshin Týdyń shejireli máni óte zor. Endi jádiger Qarýly Kúshteriniń Áskerı-tarıhı murajaıynda laıyqty oryn tabady. Ol keńes halqynyń, onyń adamgershilik jáne moraldyq rýhynyń qýattylyǵy men myzǵymastyǵynyń jarqyn sımvoly retinde UOS arnalǵan ekspozısııada ornalastyrylady, sondaı-aq óskeleń urpaqqa áskerı-patrıottyq tárbıe berýde paıdalanylady.
«Soǵys surapyl boldy. Mıllıondaǵan adamnyń ómirin qıdy. Bul týdy Máskeýden bastap sonaý Berlınge deıin jaýyngerlerimiz soǵys maıdanynan alyp ótip, fashıstik Germanııanyń týyn tikti. Bul týmen jaýyngerlerimiz ómirin qıyp, aıqasqa attandy jáne ózderiniń áskerı boryshyn atqardy. Jeńis Týy – jeńiske qol jetkizgenimizdiń nyshany ispetti», dep aǵynan jaryldy Uly Otan soǵysyna qatysýshy Oleg Lınık.
Týdy tabys etý boıynsha resmı is-sharaǵa Uly Otan soǵysy, Aýǵan soǵysynyń ardagerleri, Halyq qaharmany, armııa generaly Saǵadat Nurmaǵambetov atyndaǵy «Jas ulan» respýblıkalyq mektebiniń tárbıelenýshileri, sondaı-aq, 68665 áskerı bóliminiń áskerı qyzmetshileri qatysty.
Qazirde QR QK Áskerı-tarıhı murajaıynyń qorynda 6 000-ǵa jýyq jádiger bar ekenin jáne tolyqtyrylyp jatqanyn atap ótken jón. Elimizdiń túkpir-túkpirinen ártúrli adamdar, kóne zamannan bastap qazirgi kúnge deıin táýelsiz Qazaqstan Qarýly Kúshteriniń qurylýy kezeńderinen syr shertetin tarıhı qundylyǵy bar baǵaly zattardy murajaıǵa tapsyrýda.
Dastan Kenjalın.
Derek, sýret: Qazaqstan Respýblıkasy Qorǵanys mınıstrligi.