ASTANA. 14 qańtar. Halyqaralyq «Shabyt» shyǵarmashyl jastar festıvaliniń laýreaty Renat Elýbaev Italııanyń astanasy Rım qalasynda ótken halyqaralyq sýretshiler baıqaýynda jeńiske jetti. Bul týraly egemen.kz tilshisi habarlady.
Baıqaýǵa 170-ge jýyq qylqalam sheberleri qatysty. Konkýrsqa ol ulttyq naqyshtaǵy sýretterin usyndy. Osy týyndylary tóreshilerge unap, onyń kartınalary qazylardyń sheshimimen úzdik dep tanyldy. Baıqaýda Renat Elýbaev Halyqaralyq Mıkelandjelonyń Moıseı músinshesin aldy. Sóıtip, talantty otandasymyz qazaqtan tuńǵysh ret Halyqaralyq Mıkelandjelo syılyǵynyń ıegeri atandy. «Mundaı úlken syılyqtar ártisterge, ánshilerge beriledi. Al sýret biz úshin tańsyq dúnıe. Bul baıqaýǵa jer-júziniń qylqalam sheberleri qatysady. Qazylar solardyń sýretterine qarap, baǵalaryn beredi. Músinshege laıyqtylar ǵana úzdik dep tanylady. Sol syılyq maǵan buıyrdy», deıdi Renat Elýbaev.
Moıseı statýetkasy – Mıkelandjelo Býonarrotı jasaǵan ataqty músinniń kishkentaı kóshirmesi. Onyń tarıhyn aıtsaq, 1505 jyly Iýlıı II Rım Papasy ony shaqyryp alyp, qulpytas jasaýdy tapsyrady. Mıkelandjelo músindi jasaıdy. Sol kezde Moıseı músini Rımdegi eń baǵaly týyndy dep tanylady.
Renat Elýbaev ımpressıonıstik modern baǵytynda sýret salady. Impressıonızm «erkindik», «bir sáttik» degen maǵynany bildiredi. Byltyr ol «Realızmnen alshaq» janr boıynsha Belarýste ótken «Kýrshınale-2015» halyqaralyq óner olımpıadasynda «Sýret óneri» atalymynda bas júldeni jeńip alǵan. Odan keıin AQSh-tyń Nıý-Iork qalasynda ótken «New York Realism» fine art» atty beıneleý óneri sheberleriniń halyqaralyq baıqaýynda «Altyn qyran» medalin ıelendi.
Qazir Renat «Astana Opera» memlekettik opera jáne balet teatrynda jumys isteıdi.
Dastan Kenjalın.
Derek: egemen.kz
Sýret: Renat Elýbaevtyń facebook jáne vkontakte áleýmettik jelilerindegi jeke paraqshalarynan alyndy.