Izgi oı, ıgi bastama

«Elbasynyń «Ult Jospary – qazaqstandyq armanǵa bastaıtyn jol» taqyrybynda jaryq kórgen maqalasy Ult Josparyn júzege asyrýǵa jalpyulttyq qozǵaý saldy. Bul, shyn mánisinde, qoǵamdaǵy barlyq salany jandandyrýǵa baǵyttalǵan «jol kartasy» nemese is-qımyldar júıesi ispetti». Qazaqstan Prezıdenti janyndaǵy Ortalyq kommýnıkasııalar qyzmetinde ótken brıfıngte «Qoǵamdyq kelisim» respýblıkalyq memlekettik mekemesiniń dırektory Natalıa Kalashnıkova osylaı dedi Onyń aıtýynsha, bul maqalada eldi ilgeriletýge jol ashatyn naqty tetikter kórsetilip, mańyzdy baǵyt-baǵdarlar aıqyndalǵan. «Jańa jyldyń qarsańynda Memleket basshysy «Ult Jospary – 100 naqty qadamdy» júzege asyrýǵa sep bolatyn birqatar Jarlyqtarǵa qol qoıdy. Bul Tujyrymdama qazaqstandyq birtektilik pen birlikti nyǵaıtý men damytýdy kózdeıdi. Onda jalpyulttyq birlik pen qoǵamdyq kelisimdi nyǵaıtýdaǵy jańa múmkindikter men tetikter kórsetilgen», – dedi N.Kalashnıkova. Sondaı-aq, ol Qazaqstan halqy Assambleıasyn 2025 jylǵa deıin damytýdyń jańa Tujyrymdamasyna sáıkes, jumystyń jańa ınstıtýttyq baǵyttary aıqyndalǵanyn, bul eń birinshi kezekte, Memlekettik tildiń ulttyq korpýsy jáne «Myń bala» sekildi jobalardy odan ári tıimdi júzege asyrýǵa yqpal etetinin jetkizdi. Máselen, «Myń bala» jalpyulttyq mádenı-aǵartýshylyq jobasy aıasynda barlyǵy 235 myńǵa tarta bala qatysqan 7863 is-shara ótkizilipti. Sharalardyń nátıjesinde 44 myńǵa tarta jasóspirim memlekettik tildi oqyp, úırengen. «2015 jyl – Qazaqstan halqy Assambleıasy jyly, «Ult Jospary – 100 naqty qadamdy» qolǵa alý jyly. Bul jyl 5 ınstıtýttyq reformaǵa qajetti keń áleýmettik bazanyń qalyptasýyna jáne qazaqstandyq birtektilik pen birlikti nyǵaıtýǵa yqpal etti. Jalpy alǵanda, aldaǵy ýaqytta júzege asyrylatyn reformalardyń quqyqtyq negizin jandandyrý júzege asyryldy. Máselen, 50-den astam normatıvti-quqyqtyq aktiler qabyldandy, «Qazaqstan halqy Assambleıasy týraly» Zańǵa ózgertýler engizildi, birinshi ret zańdyq turǵyda «Máńgilik El» jalpyulttyq patrıottyq ıdeıasy bekitildi, «Qaıyrymdylyq týraly» Zań qabyldandy», – dedi «Qoǵamdyq kelisim» respýblıkalyq mem­lekettik mekemesiniń dırektory. Osylaı degen ol aldaǵy ýaqytta birtektilik jáne birlik sıpatyndaǵy barlyq jumysty Qazaqstan halqy Assambleıasynyń aınalasyna shoǵyrlandyryp, iske asyrý kózdelip otyrǵanyna, sebebi Qazaqstan halqy Assambleıasy «Qazaqstandyq damý jolynyń» jáne «Beıbitshilik modeli men qoǵamdyq kelisimniń» ózegi ekenine toqtaldy. «Áleýmettik saýalnamalar júrgizýdiń qorytyndysy bo­ıynsha el turǵyndarynyń 98 paıy­zy «Biz – Qazaqstan azamatymyz!» degen ustanymǵa maqtanyshpen qaraıtynyna, halyqtyń 94,2 paıyzy «Máńgilik El» jalpy­ulttyq patrıottyq ıdeıasy qundylyqtaryn qoldaıtynyna, al 92,8 paıyzy Qazaqstanda­ǵy etnosaralyq kelisimdi saq­taý maqsatyndaǵy memlekettik saıasatqa oń kózqaraspen qaraı­tynyna kóz jetkizdik», dedi ol óz sózinde. Brıfıng barysynda bıyl Qazaqstan Táýelsizdigine 25 jyl tolatyny, sonymen qatar, osy jyly 5 ınstıtýttyq reforma belsendi túrde júzege asyryla bastaıtyny, jalpyulttyq jobalardyń iske asyrylýynda negizgi róldi Qazaqstan halqy Assambleıasy ıelenetini aıtyldy. Máselen, bir ǵana «Úlken el – úlken otbasy» jobasy aıasynda búgingi kúnge deıin 20-ǵa tarta is-shara atqarylǵan eken. Al «Taıqazan. QHA – 20 ıgi is» jobasyna 4,5 myń eldi meken qamtylyp, oǵan 2,9 mln. adam qatysqan. Soǵys jáne tyl ardagerleri, áleýmettik jaǵynan az qamtylǵan otbasylar «Qamqor» aksııasy aıasynda 413 mln. teńge kóleminde qarjylaı kómek alsa, 300-ge tarta dimkás balaǵa 41 mln. teńge mólsherinde medısınalyq kómek kórsetilgen. «2016 jyly osyndaı sıpattaǵy ıgi sharalar óziniń jalǵasyn taba bermek. Memleket tarapynan qolǵa alynǵan barlyq sharalar «Ult Jospary – 100 naqty qadam» sheńberinde, onyń ishinde eldiń turaqtylyǵy men qaýipsizdigin saqtaýdy negizge ala otyryp, jú­zege asyrylatyn bolady», dedi N.Kalashnıkova. Láıla EDILQYZY, «Egemen Qazaqstan». Sýretti túsirgen Erlan OMAROV.