Aqmola oblysynyń ákimi Sergeı Kýlagın «ALL ENERGY Holding LTD» Izraıl kompanııasynyń Azııadaǵy óńirlik bıznesti damytý jónindegi dırektory Aleksandr Vopılovpen kezdesip, Kókshetaýda jańa jylý-elektr ortalyǵyn salý máselesin qarastyrdy. Kezdesýge kompanııa dırektorymen birge «Saryadyr» kenishindegi «On Olja» jaýapkershiligi shekteýli seriktestiginiń basshysy Marat Nábıev, oblystyq departamentter men basqarmalardyń basshylary qatysty.
Jınalǵandar aldynda sóz sóılegen sheteldik kompanııanyń ókilderi oblys ortalyǵynda búgingi tańda ekonomıkalyq jaǵynan tıimdi, eń arzan otyn kózi qoldanylatyn bý qazandyqtaryn salý qajettigin usyndy. Kompanııa dırektory Aleksandr Vopılovtyń aıtýynsha, JEO salynǵan kezde óńirdegi jylý energııasyna degen tapshylyqty joıýǵa bolady. Jańa JEO 180 MVt elektr jáne 450 Gkal/saǵ. jylý qýatyn óndirýge múmkindik beredi.
Jobaǵa qatysty usynys-pikirlerdi muqııat tyńdaı kele, oblys ákimi Sergeı Kýlagın búgingi kúni tanymal kompanııa usynyp otyrǵan jobanyń óńirde qyzyǵýshylyq týdyratynyn atap ótti. Elbasy Joldaýynda erekshe ekpin túsirilgen ıntegrasııalyq arqaýmen ınvestısııa tartýdyń mańyzy orasan. Nysannyń ekologııalyq jaǵynan tıimdi bolýyn eskere kele, qarjylandyrý máselesine toqtalǵan ol, Úkimet 7,9 mıllıard teńge kólemindegi jobalardy qoldaýǵa múmkindik berip otyrǵanyn eske saldy.
Jańa jylý elektr ortalyǵy Kókshetaý úshin eń ózekti máseleniń biri. Bolashaq ortalyq óndiretin qýat kózderi jyl sanap ósip kele jatqan qalanyń ǵana emes, oǵan irgeles úsh aýdannyń suranysyn óteı alady. Al, oblys ortalyǵynyń turǵyndary jyl boıy ystyq sýdy paıdalaný múmkindigine ıe bolmaq.
Buǵan qosymsha, «ALL ENERGY Holding LTD» kompanııasy Ereımentaý aýdanyndaǵy Saryadyr kómir kenishinde de 1000 MVt qýattaǵy elektr stansasyn salý nıetinde ekendigin bildirdi. Usynys oblys basshylyǵy tarapynan qoldaý tapty. Atalǵan eki jobany iske asyrý qosymsha jumys oryndaryn qurýǵa, salyq salymyn molaıtýǵa, oblysty qýat tutynýshydan qýat óndirýshige aınaldyrýǵa múmkindik bermek.
Baqbergen AMALBEK,
«Egemen Qazaqstan».
Aqmola oblysy.