ASTANA. 15 qańtar. Qazaqstan fýtbol federasııasy ulttyq qurama bas jattyqtyrýshysynyń esimin qańtar aıynyń sońynda jarııalaıdy. Bul týraly atalǵan federasııanyń baspasóz qyzmetine silteme jasaǵan egemen.kz tilshisi habarlady.
Esterińizge sala keteıik, 28 jeltoqsan kúni Qazaqstan ulttyq quramasynyń bas jattyqtyrýshysyn daýys berý arqyly tańdaýdyń alǵashqy kezeńi bastalǵan bolatyn. Federasııa tarapynan sheshim qabyldaý úshin saýalnamaǵa 50 myńǵa jýyq adam qatysýy kerek edi. Alaıda, saýalnama bastalǵaly 18 kún ótse de, oǵan 2600 adam ǵana qatysqan. Olardyń 1755-i sheteldik mamanǵa daýys berse, otandyq mamandardy qoldaǵan jankúıerlerdiń sany – 845.
Osylaısha, qatysýshylardyń az bolýyna baılanysty daýys berýdiń ekinshi kezeńi ótkizilmeıdi. Nátıjesinde fýtboldan ulttyq quramanyń bas jattyqtyrýshysy osy aıdyń sońyna deıin jarııalanatyn boldy.
Elaman Qońyr.
Derek: Qazaqstan fýtbol federasııasynyń baspasóz qyzmeti.
Sýret: kff.kz.