«Astana Operanyń» jetekshi solısi Álfııa Kárimova Italııada V.A.Mosarttyń «Don Jýan» operasynyń tusaýkeserine qatyspaq. Jarqyraǵan koloratýralyq soprano ıesi 31 qańtar jáne 2, 6 aqpan kúnderi «Karlo Felıche» teatry sahnasynda Donna Anna partııasyn alǵash ret oryndaıdy.
Qazirdiń ózinde ánshi munda kúndelikti daıyndyq jumystaryna oıdaǵydaı kirisip ketti. Ol bul róldi úlken jaýapkershilikpen oryndap shyǵýdy maqsat tutyp otyr. О́ıtkeni, álemdik deńgeıdegi oryndaýshylardyń ózin abdyratpaı qoımaıtyn partııany ol alǵash ret oryndamaq, sonymen qatar, ol – ádemi, dramalyq kúrdeli arııalarǵa jáne názik te sazdy birqatar ansambldik kórinisterge toly bolmaq. «Árbir jańa sahnalyq beıne árqashan hıkaıalarǵa, kútpegen oqıǵalarǵa, meıramdarǵa toly, sondyqtan qajymas eńbekti talap etedi», – dedi Á.Kárimova gastroldik sapar aldyndaǵy suhbatynda.
– Solıske, vokalshyǵa daıyn kúıinde eshteńe ońaılyqpen tıe bermeıdi. Basty partııalardy oryndaý úshin oǵan qanshama ýaqyt, úzdiksiz jattyǵý kerek. Olaı bolmaǵan jaǵdaıda adamnyń kásibı turǵyda damýy, ósýi, belgili bir jetistikterdi ıelenýi áste múmkin emes. Mosartty shyrqaý óte kúrdeli, munda daýystyń yrǵaqtala tógilýi, aspaptarǵa ilese alýy, ekpindi ıgerý, vokal pozısııasyn dál qoıý jáne júz paıyz daýysty ıgere alý sııaqty sheberlikter aýadaı qajet, – dedi áńgime barysynda ol.
Bir ereksheligi, qoıýshy Rozetta Kýkkıdiń nusqasyna saı opera jelisi 1980-jyldardaǵy Amerıkaǵa aýystyryldy. Eń ınnovasııalyq ıtalııalyq operanyń zamanaýı rejısserleriniń jarqyn da batyl spektakli asa zor kórneki áser beredi. Don Jýan – sánqoı da dýmandy bardyń juldyzy, sondyqtan ol aınalasyndaǵy árbir názik jaratylys ıeleriniń júregin tez jaýlap alýǵa tyrysady. Al, Álfııa Kárimovanyń keıipkeri Donna Anna áıelqumar Don Jýandy eliktirgen talǵampaz bıkesh. Qoıylymdaǵy kóptegen qyzyqty elementterge, tańǵalarlyqtaı tapqyr ıdeıalar men áserli sheshimderge qarap, operanyń jeke kózqarasty bildiretin nusqa ekenin túsiný qıyn emes.
Aıta ketý kerek, Don Jýan partııasyn Mıkele Pattı oryndaıdy, Leporello – Lýchano Leonı, Komandor – Grem Brodbent, Don Ottavıo – Patrık Vogel, Donna Elvıra – Raffaella Lýpınachchı, Serlına – Lılıa Gamberını, Mazetto róli Roberto Maıetta enshisine buıyrmaq. 31 qańtarda operaǵa maestro Krıstof Poppen, al 2 jáne 6 aqpanda Pabl Assante dırıjerlik etedi dep kútilýde.
Qarshyǵa KÚLEN.