nemese kóktaıǵaqtan zardap shekkenderdiń qatary qalyń
Qaqaǵan qańtardyń qaq ortasynda jańbyr jaýǵandy kórdik. Artynsha aıaz uryp, Qaraǵandynyń kósheleri muz aıdynyna aınaldy. Kóshedegi halyq tusaýly attaı kibirtiktep, bireý shalqasynan qulady, endi bireýi etpetinen tústi. Aıaq-qolyn shyǵaryp, maıyp bolǵandarda esep joq. Jańbyr jaýǵan 11 qańtardyń ózinde túrli jaraqat alǵan 70-ke tarta adam dárigerdiń kómegine júgingen...
Osydan kelip, kóshedegi kóktaıǵaqqa kim jaýap beredi degen suraq týady. Zań boıynsha shaǵyn jáne orta bıznestiń kez kelgen nysany nemese qandaı da bir mekeme ǵımaratynyń aýmaǵy dep júrginshi joldyń jıegine deıingi aralyqty aıtamyz. Iаǵnı, jerdi paıdalanýshy ózine tıesili osy aýmaqtyń tazalyǵy men qaýipsizdigine jaýap berýi tıis.
Solaıy solaı ǵoı, biraq ta zańnyń bul talaby kóp jaǵdaıda oryndalmaı jatady. Endi bul sharýany aıaqsyz qaldyrmaýdy qalalyq ákimdik óz qolyna aldy. О́zine tıesili jerdiń qaryn tazalamaǵan, muzyn oımaǵan saldyr-salaq kásipkerlerge, mekeme basshylaryna shytyrlatyp turyp aıyppul salady. Jeke tulǵalarǵa – 20 aılyq eseptik kórsetkish (AEK), al shaǵyn, orta jáne iri kásipkerlik sýbektilerine 30-dan 100 AEK aralyǵyndaǵy kólemde aıyppul belgilengen.
Búgingi kúnge deıin kóshesin kúremegen biraz tulǵalar aıyppuldyń «ashy» dámin tatyp úlgerdi. Osylaı shómishten qysqanda ǵana aqshanyń qadirin jaqsy biletin aǵaıyn amaldyń joqtyǵynan qolyna kúrek alyp, qımyldaı bastady. Qaryn kúrep, muzyn oıyp, qumyn shashyp, tuzyn seýip degendeı...
Qaırat ÁBILDINOV,
«Egemen Qazaqstan».
QARAǴANDY.