AQTО́BE. 18 qańtar. Aqtóbede et eksportyn arttyrý boıynsha keńes ótti. Bul týraly egemen.kz tilshisi habarlady.
Oblysqa eki kúndik jumys saparymen Aýyl sharýashylyǵy Mınıstri Asyljan Mamytbekov keldi. Mınıstr aldymen Alǵa aýdanyndaǵy «AkTep» JShS-ne at basyn buryp, seriktestiktiń jańa jyldyń aldynda ǵana paıdalanýǵa berilgen zamanaýı et kombınatynyń jumysymen tanysty. Sodan keıin Alǵa ındýstrııalyq-tehnıkalyq kolledjinde uıymdastyrylǵan aýyl sharýashylyǵy taýar óndirýshileriniń ónimderi kórmesinde bolyp, óńirde qolǵa alynǵan ıevestısııalyq jobalarmen tanysty.
Sonymen qatar, mınıstrdiń qatysýymen oblysta mal sharýashylyǵy aımaqaralyq et kooperasııasyn qurý jáne ony damytýǵa arnalǵan kóshpeli keńes ótti. Oǵan kórshiles Qostanaı jáne Batys Qazaqstan oblystarynyń ákimderi Arhımed Muhambetov pen Nurlan Noǵaev, Inalca Eurasia kompanııasynyń vıse-prezıdenti Andreı Vakýlın, ınvestorlar, sondaı-aq, oblystaǵy aýyl sharýashylyǵy taýarlaryn óndirýshiler qatysty.
Keńesti kirispe sóz sóılep ashqan oblys ákimi Berdibek Saparbaev aýyldyq jerlerde shaǵyn kásipkerlikti damytý, «Nur Otan» partııasynyń bastamasymen elimizdiń bes óńirinde bastaý alǵan shaǵyn et-sút óndirý jáne óńdeý fermalaryn ashý boıynsha qanatqaqty jobalardy júzege asyrýdyń oblystaǵy qadamyna toqtaldy. Osy baǵdarlamalar boıynsha aýylda kásipkerlik nysandaryn qurýǵa qazirdiń ózinde 40-qa jýyq ótinish túskenin tilge tıek ete kelip, bul jobalardy júzege asyrý úshin oblysqa 3,9 mıllıard teńge qarjy qajet ekenin atap ótti.
2015 jyly aımaqta «Sybaǵa baǵdarlamasy boıynsha 4,5 myń iri qara satyp alynǵan. Reseıge 2,8 myń tonna et, sonyń ishinde 895,5 myń tonna iri qara eti eksportqa shyǵarylǵan. О́ńirdiń aýyl sharýashylyǵyna 5,3 mıllıard teńge ınvestısııa tartylǵan.
Alqaly jıynda Aýyl sharýashylyǵy mınıstri Asyljan Mamytbekov sóz alyp, «100 naqty qadam» Ult josparynyń 61-qadamyn júzege asyrý úshin Úkimet tarapynan et óndirisin damytý men óńdeýge strategııalyq ınvestorlardy tartý boıynsha jasalyp jatqan jumystarǵa toqtalyp ótti. Bıyl eksportqa 12 myń tonna iri qara eti shyǵarylatynyn, odan keıingi jyldary bul kórsetkishti 30 myń tonnaǵa jetkizý kózdelip otyrǵanyn málim etti. Sol úshin «AkTep»» JShS-niń osy álemdik standarttarǵa saı et kombınatynyń múmkindigin paıdalaný baǵytynda jumystar jurgizilip jatqanynan habardar etti.
Búgingi tańda bul jobaǵa Inalca Eurasia kompanııasynyń qarjy quıýǵa jáne mal bordaqylaý alańdaryn keńeıtýge yqylas tanytyp otyrǵanyn jetkizdi. О́z kezeginde sóz alǵan kórshiles óńir basshylary bul baǵytta atqarylyp jatqan jumystardy baıandap, ortaq iske ózindik úlesterin qosatyndyqtaryn jetkizdi.
Inalca Eurasia elimizdiń et ónimi salasyna 100 mln. eýrodan asa qarajatty ınvestısııalaý jóninde sheshim qabyldady. Qarajat respýblıkanyń 3 oblysynda bir mezgilde bordaqylaıtyn 44 myń bas qýattylyǵymen bordaqylaý alańdarynyń qurylysy úshin vertıkaldy-ıntegrasııalanǵan kompanııalardyń qurylýyna baǵyttalmaq. Buǵan qosa, Aqtóbe oblysynda et kombınatynynyń qýattylyǵyn 20 myń tonna et jáne et ónimderin ulǵaıtýmen modernızasııalaý josparlanýda. Inalca Eurasia kompanııasy qazaqstandyq et brendin jasap, Eýropa elderi men Reseı Federasııasyna et eksportyn qamtamasyz etýge nıettenýde.
Úsh oblys ákimdikterimen, mınıstrlikpen jáne Inalca Eurasia kompanııasy arasynda aımaqta ettiń eksporttyq áleýetin joǵarylatý úshin ındıkatıvtik kórsetkishter men maqsattardy aıqyndaıtyn etti mal sharýashylyǵynda aımaqaralyq kooperasııa qurý boıynsha memorandýmǵa qol qoıyldy. Qazaqstandyq «Aktep» kompanııasymen Inalca Eurasia transulttyq korporasııasy arasynda «100 naqty qadam» Ulttyq josparynyń 61-qadamyn júzege asyrý aıasynda ózara kelisim jasaldy.
Jumys saparynyń ekinshi kúni Asyljan Mamytbekov Hromtaý aýdanyndaǵy «Morochnye ıstorıı» JShS reprodýktor sharýashylyǵynda bolyp, jumysymen tanysty. Mınıstrdiń qatysýymen oblystyq ákimdikte ótken alqaly jıynda aýyl sharýashylyǵy salasynyń ózekti problemalary áńgime arqaýyna aınaldy. Sondaı-aq, aldaǵy kóktemgi egistikke daıyndyq máseleleri de sóz boldy.
Satybaldy Sáýirbaı.
Derek, sýret: egemen.kz.