Keshe Almatyda Memlekettik hatshy Gúlshara Ábdiqalyqova Elbasynyń tapsyrmasy boıynsha belgili mádenıet jáne óner qaıratkerlerine 2015 jylǵy Prezıdenttik jáne Memlekettik stıpendııalardy tabys etti.
Memlekettik hatshy rásimdi asha otyryp, qatysýshylardy shyn júrekten quttyqtap, Prezıdenttik jáne Memlekettik stıpendııalar otandyq mádenıetti damytýǵa qosqan eleýli úlesine berilgen baǵa ekenin atap ótti. Al bıyl memlekettiń qarjylaı qoldaýyna ıe bolǵan daryn ıeleriniń quramy 40 paıyzǵa ózgergen. Stıpendııa alatyndar qatary jas daryndarmen tolyqty, ókinsek te, talaı taý tulǵalar ómirden ozyp jatqan jaıy bar.
Elbasynyń tapsyrmasymen kelgen Memlekettik hatshy zııaly qaýymmen júzdesýde byltyrǵy jylǵa sholý jasap, keler jyldyń keleli tirlikterine toqtala kele, sózdi mádenıet maıtalmandarynyń ózine berdi. Aldymen jazýshylar atynan Memlekettik syılyqtyń laýreaty Sábıt Dosanov sóz alyp:
– Alpaýyt elderdiń ózi daǵdarystan eseńgirep, álem otqa oranyp jatqan qıyn kezeńde táýelsiz Qazaqstan barlyq qıynshylyqtardy erlikpen eńserip, jarqyn bolashaqqa – Máńgilik Elge júrip keledi. Olaı bolsa, sol baǵytymyzdy zerdelep kórelik. Keńes ókimeti kezinde odaqtas 15 respýblıkanyń túgel táýelsizdik alǵanymen, bári birdeı bizdeı baqytty bola almaı otyr. Olardyń kóbisi ekonomıkalyq qana emes, mádenı, ádebı daǵdarysta. Al bizde kitaptarymyz memlekettik tapsyryspen shyǵyp, mereıtoılarymyz ótip jatyr. Táýelsizdiktiń alǵashqy jyldaryndaǵy qıyn kezeńniń ózinde Memleket basshysynyń pármenimen taǵaıyndalǵan Prezıdenttik jáne Memlekettik stıpendııalaryn zııaly qaýym 20 jyl boıy úzdiksiz alyp keledi. Keıbir elderdegi qandastarymyz mundaı qamqorlyqqa bólenbek turmaq, mereıtoılaryn ótkizýge tyıym salynǵandyǵyn ókinishpen aıtady, – dedi.
Osydan keıin belgigi qypshaqtanýshy Aleksandr Garkaves, opera sańlaǵy Maıra Muhamedqyzy, teatr maıtalmandary Núketaı Myshbaeva men Roza Áshirbekova sóz alyp, mádenıettiń máselesin qozǵady. Eń kúrdeli kezeńderde de qamqorlyǵynan aıyrmaǵan Memleket basshysyna shynaıy alǵystaryn bildirdi.
Biz joǵaryda bolashaǵynan úlken úmit kúttirgen ádebıet pen mádenıettiń jas ókilderi de Memlekettik stıpendııalarǵa iligip otyrǵanyn atadyq.
– Adamǵa keıde jyly sóz, qamqor kóńildiń ózi kóp kúsh-qýat beredi. Al jas talanttar úshin ultymyzdyń aıtýly azamattarymen birge Memlekettik stıpendııaǵa iligip, Elbasynyń qamqorlyǵyna bólený olardy jigerlendiredi jáne úlken mártebe, – dedi jas akter Ádil Ahmetov.
Gúlshara Ábdiqalyqova Elbasy Nursultan Nazarbaevtyń zııaly qaýymnyń jalpyulttyq qundylyqtardy nyǵaıtýǵa bastaıtyn kúsh retindegi ulaǵatty róli jónindegi sózin qatysýshylardyń nazaryna saldy. Memlekettik hatshy mádenıet qaıratkerleriniń ıdeıalary men oı-pikirleri, shyǵarmalary halyqtyń rýhanı qazynalaryn, ejelgi, baı ári ózindik ónerin saqtaýǵa jáne eseleýge baǵyttalýy tıis ekenin atap ótti.
Stıpendııalar memlekettik qoldaý kórsetý maqsatynda Qazaqstan Respýblıkasynyń qurmetti ataqtary men memlekettik nagradalaryn ıelengen mádenıet jáne óner qaıratkerlerine, sondaı-aq, aıtýly shyǵarmashylyq jetistigi úshin daryndy shyǵarmashyl jastarǵa Qazaqstannyń mádenıetin jasaýǵa, saqtaýǵa jáne damytýǵa qosqan úlesi úshin beriledi.
Otandyq mádenıetti damytýǵa qosqan mańyzdy úlesi úshin ádebıet
pen ónerdiń 100 qaıratkerine stıpendııalar taǵaıyndaldy.
Stıpendııaǵa ıe bolǵandar qatarynda Oljas Súleımenov, Aleksandr Garkaves, Myrzataı Joldasbekov, Sábıt Dosanov, Bıbigúl Tólegenova, Eskendir Hasanǵalıev, Vladımır Tolokonnıkov, Asanáli Áshimov, Iýrıı Pomeransev, Sherhan Murtaza, Ákim Tarazı, Anatolıı Molodov sııaqty maıtalmandar bar.
Sonymen birge, Jánel Maqajanova, Sanjar Mádıev, Ádil Ahmetov, Qanat Omarov, Erlan Rysqalı sııaqty birqatar jas daryndarǵa memlekettik qoldaýlar kórsetildi.
Kezdesý Qazaqstan mádenıeti men ónerin damytýdyń ózekti máselelerin talqylaýmen aıaqtaldy. Memlekettik hatshy el Táýelsizdiginiń 25 jyldyǵy «Máńgilik El» jalpyulttyq patrıottyq ıdeıasynyń negizinde Bolashaǵy birtutas ult qalyptastyryp jatqan Qazaqstan halqynyń ıgiligin, abyroıy men ar-ujdanyn pash etetin tereń mazmundy jańa shyǵarmalarmen atap ótiletinine úmit bildirdi.
Almatyǵa jumys sapary aıasynda Gúlshara Ábdiqalyqova, sondaı-aq, Qazaqstan Jazýshylar odaǵynyń basshylyǵymen kezdesip, respýblıkalyq «Qazaq ádebıeti» gazeti men «Juldyz» jáne «Prostor» jýrnaldarynyń redaksııalaryn da boldy.
Zııaly qaýymmen kezdesýde otandyq ádebıetti nasıhattaý, kórkemdigi joǵary shyǵarmalardy ómirge ákelý, sonymen birge, eldiń rýhanı-mádenı salasyn odan ári damytýdyń ózekti máseleleri talqylandy.
Kezdesý sońynda Memlekettik hatshy shyǵarmashyl zııaly qaýym ókilderi «100 naqty qadam» Ult Josparyn iske asyrýǵa, Qazaqstan Respýblıkasy Táýelsizdiginiń 25 jyldyǵy aıasynda ótetin merekelik is-sharalarǵa belsene qatysatynyna senim bildirdi.
Aınash ESALI,
«Egemen Qazaqstan».
ALMATY.
Sýretti túsirgen
Borıs BÝZIN.