Gımnasterkańdy qaıys belbeýmen shart baılap, soldat etigimen sart-surt adymdap júrgiń kelmese, jolyn jasa.
Ońtústik Qazaqstan oblysyndaǵy Saıram aýdany Qorǵanys isteri jónindegi bóliminiń áskerı shaqyrtý qyzmetiniń basshysy osylaı oılaıdy eken. Ol T. degen azamatqa boryshyn atqarmaı-aq áskerı bılet áperýge ýaǵda jasaǵan. Aqysyna 35 myń teńge qolǵa qystyrasyń. Qur aıaqqa bata júrmeıdi ǵoı.
Shymkent qalasyndaǵy Qarataý polısııa bóliminiń ýchaskelik polısııa ınspektory da osyndaı kúdikpen qolǵa túsken.
Inspektor merziminen buryn shartty túrde bosatylǵan azamattan turǵylyqty jerinde bolmady dep akt túzbeý jáne materıaldy sotqa joldamaý jóninde ant-sý ishkenge uqsaıdy. Árıne, qursózge emes, 35 myń teńgege.
Alaıda, ekeýiniń de degeni bolmady. Sybaılas jemqorlyqqa qarsy is-qımyl Ulttyq bıýrosynyń Ońtústiktegi departamenti qyzmetkerleriniń qolyna túsken. Endi olardyń ústinen atalǵan derekter boıynsha QR QK 366-baby 1-bólimine sáıkes para alý deregi boıynsha sotqa deıingi tergep-tekserý amaldary júrgizilip jatyr.
Osyny estigen bir jigit: «Bulardyń qaıta ynsaby bar eken. Almaty qalasyndaǵy inime áskerı bılet jasatý úshin úsh myń dollar bergen edim» depti.
Árıne, ustalmaǵan ury emes. Sondaı-aq, paranyń da úlken-kishisi bolmaıdy. Zań aldynda bári birdeı.
Baqtııar TAIJAN,
«Egemen Qazaqstan».
Ońtústik Qazaqstan oblysy.