Almatylyqtar Máýlitti atap ótti

Almatydaǵy Respýblıka saraıynda Qazaqstan musylmandary dinı basqarmasynyń uıymdastyrýymen Muhammed paıǵambarymyzdyń (s.ǵ.s.) týǵan kúni – Máýlit merekesine baılanysty rýhanı kesh bolyp ótti. Merekelik sharaǵa Qazaq­stan musylmandary dinı bas­qarmasynyń tóraǵasy, Bas múftı Erjan qajy Malǵajyuly, naıb múftı Serikbaı qajy Oraz, sondaı-aq zııaly qaýym ókilderi men din qyzmetkerleri qatysty. Erjan qajy Malǵajyuly ıgi sharaǵa jınalǵan halyqty Máýlit merekesimen quttyqtaı kele, musylman áleminde Máýlitti atap ótýdiń mańyzdylyǵy men paıǵambarymyzdyń ómiri týraly maǵynaly sóz sóıledi. – Álemdi qarańǵylyqtan alyp shyǵyp jaryq nurǵa bólegen, eki dúnıeniń baqytyna kenelýge ustaz bolǵan Muhammed (s.ǵ.s.) paıǵambarǵa arnalǵan máýlit keshinde otyrmyz. Búgingi Máýlit – keshirim men meıi­rimdiliktiń merekesi. Bul iz­gilikti paıǵambarymyz kórset­kendeı, adamdardyń bir-birin qurmetteýiniń, qamqorlyq jasaýdyń merekesi, – dedi Bas múftı. Rýhanı keshte «О́ner qyran­dary» teatry ónerpaz­darynyń ǵıbratty oqıǵaǵa toly qoıylymy kórermen kóńiline oı salyp, erekshe áserge bóledi. «Jigitter» kvarteti, Bekjan Turys, Toqtar Serik, Erkin Nurjanov, taǵy basqa ónerpazdardyń oryndaǵan terme-tolǵaý, ǵıbratty án-jyrlary merekeniń árin kir­gizip, jınalǵandarǵa qýanysh syılady. Odan bólek, belgi­li aıtys­ker aqyndar men óner­pazdar óz ónerlerin kórsetip, rýhanı keshtiń shyraıyn keltirdi. Paıǵambarymyz Muha­mmed­ke (s.ǵ.s.) salaýattar oqy­lyp, sá­lemder aıtyldy. Máý­litti tama­shalaýǵa kelgen ja­maǵat­tyń barlyǵyna Qazaq­stan mu­syl­mandary dinı basqar­masynyń soń­ǵy shyǵarǵan kitap­tary, aıat-hadıster jazylǵan úntas­palar syıǵa tartyldy. Sonymen birge, turmystyń aýyrtpashylyǵyn tartyp, elimizdiń telearnalary arqyly kómek suraǵan otbasylarǵa, balalar úılerine Máýlitten túsken qarjy qaıyrymdylyq esebinde bólindi. Birinshi kezekte aýyr dertke shaldyqqan balalardyń syrqatyn emdeýge jumsalsa, ekinshiden, kóp balaly analar men qamqorsyz qalǵan qarttarǵa kómek kórsetildi. Sharanyń basty maqsaty jastardyń dinı kózqarasyn dástúrli dinimizdiń talaptarymen, ádet-ǵurpymyzdyń qundylyqtarymen, ulttyq bolmysymyzben ushtastyryp, ımandy, zııaly, zaıyrly qoǵam qurýǵa úles qosý boldy . Qanat ESKENDIR, «Egemen Qazaqstan». ALMATY.