Parlament Májilisiniń Elbasyna óz ókilettilikterin toqtatý, Májilistiń jáne barlyq deńgeıdegi máslıhattardyń saılaýyn kezekten tys ótkizý týraly bastamasy aýyldyqtardyń da kóńiline qonady. Bul qazirgideı daǵdarys jaǵdaıyn eńserýde aldyn ala naqty sharalar alýǵa alǵyshart jasasa, ýaqyt pen qarjyny tıimdi paıdalanýǵa da múmkindik beredi degen de uqyptylyq ustanymy ańǵarylady. Sondaı-aq, ár saılaýdy bólek-bólek ótkizip, arqany keńge salatyn kez emes ekeni aıtpasa da túsinikti. Memleket basshysy Ult Josparyn júzege asyrýdyń praktıkalyq kezeńi bastalǵanyn qadap aıtty. Endi alańsyz eńbek etetin, sol arqyly daǵdarysta da damýǵa berik negiz qalaıtyn irgeli isterge uıymshyldyqpen jumylatyn shaq týdy. Burynǵydan da jınaqy, burynǵydan da uqypty jáne únemshil bolýǵa ýaqyt talaby ıtermelep otyrǵanyn jasyrýdyń reti joq. Kún saıyn qubylyp turǵan AQSh dollarynyń teńgege baǵamynyń basqa shaýyp, tóske órlep turǵany bolsa anaý, al, munaı baǵasynyń arzandap, bir barreliniń 28 AQSh dollaryna deıin quldyrap ketkeni bolsa, mynaý. Munymen de toqtamaı ma degen qaýip te joq emes. Munyń el ekonomıkasynyń damý dınamıkasyna saldary bolatyny da aıqyn aqıqat. Sondyqtan jańarý arqyly jańǵyrýǵa baǵyt ustaý jón-aq. Májilis depýtattary óz mindetterin kirshiksiz atqardy, qoǵamdyq damýymyzǵa qajetti kóptegen zańnamalar qabyldandy. Endi jańa jaǵdaıda belsene iske kirisetin depýtattar korpýsyn jasaqtaýdyń ýaqyty keldi. Ony Májilis depýtattarynyń ózderi túsinip, eldik múddeni joǵary qoıa bilýi bizdiń demokratııalyq ustanymdarymyzdyń damyǵanyn kórsetse kerek. Májilisimenderdiń bul bastamasy óte ýaqytyly jáne durys qabyldanǵan sheshim der edim. Sondaı-aq, ekonomıkanyń munaıǵa táýeldiligin joqqa shyǵarmaǵanmen, ony ártaraptandyrýǵa baǵyt bergen Prezıdenttiń pátýáli ýájin júzege asyrýǵa belsene kirisýimiz kerek.
Elbasymyz jarııalaǵan «100 naqty qadam» Ult Jospary Qazaqstannyń damyǵan memleketterdiń otyzdyǵyna kirý jónindegi baǵdarlamasy retinde bizdiń árqaısysymyzǵa, onyń ishinde alystaǵy aýylda eńbek etip júrgen bizderge de tikeleı qatysty ekeni sózsiz. О́ıtkeni, osy mańyzdy qujatta kórsetilgen baǵyttar bizderdiń qatysýymyzben júzege asyrylatyny anyq jáıt.
«100 naqty qadamnyń» 60-qadamynda «Sút jáne sút ónimderi óndirisin damytý úshin strategııalyq ınvestorlar tartý. Negizgi mindet: úsh jyl merzimde TMD elderi naryǵyna shyǵarylatyn ónimderiniń jartysyna deıingi eksportyn qamtamasyz etý», al 61-qadamda «Et óndirisi men óńdeýdi damytý úshin strategııalyq ınvestorlardy tartý. Negizgi mindet – shıkizat bazasyn damytý jáne óńdelgen ónimderdi eksporttaý» dep kórsetilgen.
Osynyń qaı-qaısysy da aýyl sharýashylyǵynda eńbek etip júrgen kásipkerlerdiń ilkimdiligine tikeleı táýeldi. Bizdiń oblysymyzda qazirgi ýaqytta osy baǵytta aýqymdy jumystar júrgizilip jatqany qýantady
Men onshaqty jyldan beri tórt túlik mal ósirýmen aınalysyp kelemin. Bıe baılap, qymyz óndiretin sharýamyz birshama qalyptasty, qazir ónimimizge suranys mol. Osy óndirisimizdiń nátıjesinde Astanaǵa deıin baryp, jurtshylyqqa ózimiz daıyndaǵan ónimderimizdi usynyp júrmiz.
Bizdiń qymyzymyzdy Aqtóbe aımaǵynyń turǵyndary ǵana emes, kórshiles óńirlerden kelip alyp ketip jatady. Ýaqyt ótken saıyn múmkindigimizge qarap, óz óndirisimizdi keńeıtip kelemiz. Memleket tarapynan jasalyp jatqan qoldaý-kómek te óz dárejesinde septigin tıgizýde. Sondyqtan da biz Elbasymyzdyń ustanǵan baǵytyn eńbegimizben qoldaımyz, úlesimizdi qosamyz. Eger Memleket basshysy májilismenderdiń úndeýin qoldap jatsa, jańadan saılanatyn depýtattyq korpýsqa qolynan is keletin, jańa jaǵdaıda jumys isteı alatyn azamattarǵa tańdaý jasalatynyna bek senimdimin. Biz egemendik alǵannan beri kóp ilgeri kettik. Ol qaı isimizden de aıqyn ańǵarylýda. Sonyń ishinde eldiktiń tarazyǵa tartylar tusy saılaýǵa qatysty da taǵylymdy tájirıbe jınaǵanymyzdyń bir dáleli osy – Parlament Májilisiniń ózin-ózi taratý jáne kezekten tys saılaý ótkizýge bir kisideı bastama jasaýy der edim. Bul bastama bizdi ár iske osylaı patrıottyq kózqarasta kelýimizge ónege bolmaq. Jańarý jańa bıikterge baspaldaq bolary sózsiz.
Sabytaı JEKSENBAEV,
«Qostemir» sharýa
qojalyǵynyń jetekshisi.
Aqtóbe oblysy,
Baıǵanın aýdany.