TARAZ. 20 qańtar. Adam óltirýge tapsyrys alǵan kıller qarııany aıaǵandyqtan óltirýge qoly barmapty. Bul týraly Jambyl oblystyq IID-niń baspasóz qyzmeti habarlady.
Jaqynda jambyldyq polısııa qyzmetkerleri 54 jastaǵy áıeldi ustady. Oǵan 84 jastaǵy zeınetkerdi óltirýge tapsyrys berdi degen aıyp taǵylyp otyr.
Zeınetker men áıeldiń arasyndaǵy daý oblys ortalyǵyndaǵy bir úıden týyndapty. Uzaq ýaqyt daý bolǵan bul másele aqyrynda sotta qaralyp, nátıjesinde zeınetkerdiń paıdasyna sheshilgen. Sondyqtan áıel úı ıesinen qutylýdy oılap, buryn sotty bolǵan bir kisige adam óltirýge tapsyrys bergen.
Biraq qylmysty jasaýǵa ábden daıyndalǵan kıller qarııany aıap, aqyrynda bul týraly ishki ister organdaryna málim etipti. Osydan keıin zeınetkerdiń qanǵa boıalyp, ólip jatqan sátin qoldan uıymdastyrǵan polısııa qyzmetkerleri tapsyrys berýshini aqsha berip jatqan kezinde qolǵa túsirdi.
Kúdikti Taraz qalasyndaǵy ýaqytsha ustaý mekemesine jóneltildi.
Oralhan Dáýit.
Derek, sýret: egemen.kz