«Biz ózimizdiń qazaqstandyq armanymyzdyń oryndalýyna jáne Qazaqstannyń órkendeýine senimdi túrde qol jetkizetin bolamyz!» degen Elbasymyz N.Nazarbaev Ult Jospary baǵdarlamasynda qazaqstandyq armanǵa bastaıtyn joldy naqty kórsetip, saralap berdi.
Adamda arman kóp. Armandap qana qoımaı, soǵan umtylyp, jol taba bilgen adam armanyna qol jetkizedi. Kez kelgen ulttyń, eldiń, qoǵamnyń basty armany – erkin el, táýelsiz ult, egemen memleket bolý bolsa kerek. Ata-babamyz azat el bolýdy ómir boıy ańsap ótti. Asqaq arman oryndaldy. Qazaqstandaı táýelsiz eldiń jas bilimgeri bolǵanyma ózimdi baqytty sanaımyn. Jáne boıymdaǵy aqyl, kúsh-jigerimdi osy elimniń qaryshtap damýyna jumsaımyn.
Mektep qabyrǵasynda júrgende ál-Farabı atyndaǵy Qazaq ulttyq ýnıversıtetinde bilim alý armanyma aınalǵan edi. Jambyl oblysy, Baızaq aýdany, Dıhan-2 aýylyndaǵy 60 jyldyq tarıhy bar shaǵyn mektebinen arman qýyp, Almatyǵa kelip, talapker atanyp, judyryqtaı júregimniń lúp-lúp soqqanyn ómir boıy umyta qoımaspyn. Meniń jaqsy bilim alýyma, arman-qııaldarymnyń oryndalýyna árıne, eń aldymen ata-anamnyń, maǵan tárbıe-bilim bergen ustazdarymnyń qosqan úlesi zor. Sondyqtan, bul asyl jandarǵa degen alǵysym mol. О́mir boıy basymdy ıip ótemin. Ýnıversıtettiń esigin aıqara ashqan kúnnen bastap meni jańa álem, jańa orta, jańa dostar kútip turdy. Asqaq armannyń asqaryndaı bolǵan ásem qalashyq meniń júregimdi birden jaýlap aldy. QazUÝ-dy elimizdiń barlyq joǵary bilim berý júıesiniń tiregi, bilikti mamandar ordasy deýge bolady. О́z bilimi men darynyna senetin kóńildi de izdenimpaz jastardyń ortalyǵy ekeni kózge kórinip-aq tur. Bul meniń ýnıversıtetimdi asyra maqtaǵanym emes, men muny shynaıylyqpen, shyn júregimmen aıtyp otyrmyn. Kók baıraqty jelbirete kóterip, ata-babamyzdyń armanyn oryndap, amanatyn arqalaǵan Elbasymyz Nursultan Nazarbaev táýelsiz Qazaqstan memleketin azǵana jyldardyń ishinde álemge tanytty. Endeshe, armandar oryndalady. Tek soǵan jetkizetin durys joldy tańdap, aıanbaı eńbek etip, kúresý qajet.
Baıdos BEKÁDILOV,
ál-Farabı atyndaǵy Qazaq ulttyq ýnıversıtetiniń stýdenti.
ALMATY.