Memleketti kásibılendirýge baǵyttalǵan jospar

Elbasy Nursultan Nazarbaev «Ult Jospary – qazaqstandyq armanǵa bastaıtyn jol» atty maqa­lasynda eń uly qundylyǵymyz – Táýelsizdiktiń 25 jyldyǵyna jańa qazaqstandyq armanmen qadam basqanymyzdy, onyń basty maqsaty júzege asyrylyp jatqan «Qazaqstan-2050» Strategııasymen bara-bar ekenin atap kórsetti. Bul atalǵan maqalanyń kótergen júginiń qanshalyqty salmaqty ekenin baǵamdap tur. Álemniń damyǵan 30 eliniń qataryna enýdi kózdeıtin Strategııany júzege asyrý aıasynda memleketimizde aýqymdy ózgerister oryn alýda. Sonyń biri jemqorlyqqa qarsy quraldar men tetikterdi, ınstıtýttardy jańartý qajettiligi oraıynda atqarylǵan júıeli jumystar der edik. Bul saladaǵy negizgi nátıje jemqorlyqtyń saldarymen kúreske emes, onyń aldyn alýǵa baǵyttalýymen erekshelenip otyr. Elbasy aıtqan jańa qazaqstandyq armanǵa jaqyndata túsetin bes ınstıtýttyq reforma men «100 naqty qadamdy» jáne Joldaýdy júzege asyrýdan týatyn mindetter men tapsyrmalardy taǵy bir saralaǵan tolǵamdy maqalanyń mańyzy zor. Prezıdent maqalasynda bizdiń departamentimiz atqarýǵa tıisti birqatar jumystar taıǵa tańba basqandaı aıqyn kórsetilgen. «Memleketti kásibılendirý» degen arnaıy taraýynda qazaqstandyq memlekettik qyzmetti damytýdyń jańa kezeńi bastalǵany aıtylýy beker emes. Máselen, jýyrda Memleket basshysynyń Jarlyǵymen Memlekettik qyzmet jáne sybaılas Jemqorlyqqa qarsy is-qımyl agenttigi Memlekettik qyzmet isteri mınıstrligi bolyp, onyń qury­lymynda jemqorlyqqa qarsy is-qımyldyń ulttyq bıýrosy quryldy. Bir jyldan asa ýaqyt buryn, ıaǵnı 2014 jyldyń 26 jeltoqsanynda jemqorlyqqa qarsy tıimdi saıasatty engizý jáne onyń kez kelgen boı kórsetýine «tózbeýshilik» jaǵdaıyn qalyptastyrý maq­satynda Prezıdent jańadan «Jem­qorlyqqa qarsy strategııany» be­kitti. Bul Memleket basshysynyń tapsyrmalaryn, «Qazaqstan-2050» Strategııasyn júzege asyrý sheń­berindegi qazirgi qazaqstandyq qoǵam talaptaryna jaýap bere alatyn jáne jańa saıası mindettermen tyǵyz baılanysty qujat boldy. Osyǵan oraı, 2015-2017 jyldarǵa arnalǵan respýblıkalyq jáne óńirlik is-sharalar jospary qabyl­dandy. О́tken jyly kadr saıa­satyn tıimdi júzege asyrýǵa negiz bolatyn «E-qyzmet» aqparattyq júıesin memlekettik organdarǵa engizý boıynsha belsendi jumys júrgizilip, Shyǵys Qazaqstan obly­syndaǵy memlekettik organdar atalǵan avtomattandyrý júıesimen tolyq qamtyldy. Departamentimizdiń negizgi qyz­metiniń biri – memlekettik qyz­met salasyndaǵy biryńǵaı saıa­satty júzege asyrý. Osy oraıda memlekettik organdar kadrlarynyń jaǵdaıyna turaqty túrde monıtorıng júrgizilip turady. Aıtalyq, byltyr 4844 memlekettik qyzmetke úmitker testileýge qatysyp, olar­dyń ishinen 1574-i, ıaǵnı 32 paıyzy testileýdiń shekti deńgeıinen ótti. Júrgizilgen saraptamalar testi­leý kezinde úmitkerdiń basqa zańnamalardy jetik bilse de, bir zań boıynsha shektik deńgeıden óte almaı qalatynyn anyqtady. Osy oraıda Astanaǵa testileý baǵdarlamasyn jetildirýge baılanys­ty óz usy­nystarymyzdy joldadyq. Elbasy maqalasynda aıtylǵan, jańa jyldan bastap kúshine engen jańa zań memlekettik qyzmettiń jańartylǵan modelin usynyp otyr. Memlekettik qyzmet júıesimen birge jemqorlyq kórinisteriniń barynsha aldyn alýǵa baǵyttalǵan júıe de jańǵyrtylyp, 1 qańtardan bastap jańa zańnama kúshine endi. Elbasy jemqorlyqpen kúresti dáıekti jáne júıeli sıpatpen júrgizetin jańa zańnama­nyń halyqaralyq talaptarǵa sáıkes ekenin atap ótti. Osyǵan oraı, departamentte qoǵamnyń ár mú­shesiniń jemqorlyqqa qarsy aza­mattyq sanasynyń oıanýyna, jem­qorlyq qubylystardy týyndatatyn jaǵdaılardyń aldyn alýǵa baǵyttalǵan jemqorlyqqa qarsy aǵartý jáne qoǵammen baılanys bólimi qurylyp, jumys isteýde. Byltyr jemqorlyqqa qarsy memlekettik saıasatty túsindirý maq­satynda aqparat quraldarynda 400-den astam maqala jaryq kórip, memlekettik organdar men bilim nysandarynda 500-den astam semınarlar men dárister, kezdesýler men alqaqotan áńgimeler, eldi mekenderde kóshpeli májilister ótti. Azamattyq qoǵam ınstıtýttary da atalǵan jumysqa tartylyp, jemqorlyqqa qarsy is-qımyl salasyndaǵy áriptestik týraly me­mo­randýmdar qabyldandy. «Nur Otan» partııasynyń oblystyq fılıaly men departament jáne aýdan arasynda qabyldanǵan úshjaqty memorandým boıynsha Abaı aýdany men Kýrchatov qalasy jemqorlyqtan tys aımaq retinde jarııalandy. Departamenttiń uıytqy bolýymen ótken aýqymdy is-sharalar qatarynda BAQ ókilderimen jáne jetekshilerimen kezdesý, «Jastar – jemqorlyqqa qarsy» atty kóńildi tapqyrlar oıyny, «Qazaqstan Respýblıkasyndaǵy jemqorlyqqa qarsy saıasat: ǵylymı, quqyqtyq jáne ekonomıkalyq qyry» atty respýblıkalyq konferensııa, «Úzdik memlekettik qyzmetshi – 2015» baıqaýy, «Galstýksiz kezdesý» atty jas memlekettik qyzmetshilermen kezdesýlerdi aıtýǵa bolady. Árıne, jemqorlyqqa boı aldyrǵandarǵa áýelgi kezekte úl­ken kólemdegi aıyppul salý ar­qyly qatań shara qoldanylady. Byltyr 71 laýazymdy tulǵa, onyń ishinde 28 jetekshi qylmystyq jaýapkershilikke tartylyp, kel­tirilgen shyǵyn qaıtaryldy. Jahandaný zamanynyń talaptaryna saı, elimizde osyndaı ońdy ózgerister oryn alyp, órkenıetti elderdiń qataryna bir emes, júz qadamǵa jaqyndaýdyń múmkindigi týyp otyr. Sondyqtan, barshańyzdy Elbasynyń maqalasyndaǵy ma­ńyzdy mindetterdi sátti iske asyrý úshin óz úlesterińizdi qosýǵa, mem­lekettik qyzmet mártebesin jańa bıikke kóterýge jáne sybaılas jemqorlyqsyz qazaqstandyq qoǵam qurýǵa barynsha qoldaý kórsetýge shaqyramyn. Ǵalymbek DOSANOV, Shyǵys Qazaqstan oblystyq memlekettik qyzmet jáne sybaılas jemqorlyqqa qarsy is-qımyl departamentiniń basshysy. О́SKEMEN.