ASTANA. 21 qańtar. Elbasy Aqtóbe oblysynyń ákimi Berdibek Saparbaevty qabyldady. Bul týraly akorda.kz habarlady.
Berdibek Saparbaev Memleket basshysyna óńirdiń 2015 jylǵy áleýmettik-ekonomıkalyq damýynyń qorytyndylary men taıaý kezeńdegi damý perspektıvalary týraly baıandady.
Qazaqstan Prezıdenti Aqtóbe oblysynyń óndirisi damyǵan, ósim qarqyny joǵary, ekonomıkasy ártaraptandyrylǵan aımaq ekenin atap ótti.
«Oblys aýmaǵy arqyly avtomobıl joldary, sonyń ishinde «Batys Qytaı – Batys Eýropa» halyqaralyq kólik dálizi, temirjol jelileri, gaz qubyrlary ótedi. Olardyń mańaıynda servıstik oryndardy damytyp, jumys oryndaryn ashýǵa bolady», – dedi Nursultan Nazarbaev.
Sonymen qatar, Memleket basshysy Parlament Májilisiniń kezekten tys saılaýyn ótkizýge baılanysty halyq arasynda keńinen túsindirý jumystaryn júrgizý qajettigine nazar aýdardy.
«Jahandyq daǵdarys álemniń kóptegen elderin qamtydy. Sondyqtan bul oraıda áleýmettik turaqtylyqty saqtaý, halyqty jumyspen qamtý, shaǵyn jáne orta bıznesti qarjylyq jaǵynan qoldaý, «Nurly jol» baǵdarlamasyn júzege asyrýdy qamtamasyz etý mańyzdy», – dedi Qazaqstan Prezıdenti.
Aqtóbe oblysynyń ákimi Qazaqstan Prezıdenti tapsyrmasynyń jáne óńirde júzege asyrylyp jatqan memlekettik baǵdarlamalardyń arqasynda azamattardyń jaǵdaıy jaqsaryp kele jatqanyn aıtty.
«Ekonomıkalyq daǵdarysqa qaramastan, oblys ekonomıkasynyń ósimine qol jetkizildi. Mańyzdy baǵyttyń biri halyqtyń jumyspen qamtylýyn qamtamasyz etý bolyp sanalady. Jumyssyzdyq deńgeıi 4,8 paıyz boldy. О́ńirdegi birqatar iri kásiporyndarmen arada jumysshylardy qysqartýǵa jol bermeý, eńbekaqyny ýaqtyly tóleý jáne ujymdyq sharttardy oryndaý jóninde daǵdarysqa qarsy memorandýmdar jasaldy. Sonymen qatar, Siz bergen tapsyrmalar aıasynda «Qazhrom», «Rýsskaıa mednaıa kompanııa» jáne «Voshod-Oriel» sııaqty kompanııalar óz jumysshylarynyń eńbekaqysyn 1 qańtardan bastap 10-15 paıyzǵa kóterdi. Bul baǵyttaǵy jumystar ózge kásiporyndarda da júrgizilip jatyr», – dedi Berdibek Saparbaev.
Ol bıýdjettiń kiris bóligin tolyqtyrý úshin qosymsha rezervter izdeý maqsatymen memleket pen jekemenshik seriktestigin damytý, halyqaralyq qarjy ınstıtýttary men ınvestorlardyń qarajatyn tartý jumystary júrgizilip jatqanyn aıtty. Máselen, memleket pen jekemenshik seriktestigi aıasynda 29 joba qarastyrylyp jatyr, solardyń qatarynda jedel medısınalyq járdem qyzmeti ǵımaraty, qalalyq balalar stomatologııalyq emhanasy, muz saraıy, jekpe-jek saraıy, fýtbol maneji, 7 balabaqsha, 3 emhana, 1 aýrýhana jáne 1 mektep qurylysy bar.
Sonymen qatar, oblysta ishki ósim rezervterin izdep tabýǵa arnalǵan is-sharalar jospary ázirlendi. 2015 jyly bıýdjet 9,2 mıllıard teńgege ońtaılandyrylsa, bıyl qosymsha taǵy 2,3 mıllıard teńgege ońtaılandyrý josparlanyp otyr. Bıýdjet qarajatyn únemdeý maqsatymen áleýmettik nysandardy, memlekettik mekemelerdiń avtokólikterin gaz otynyna kóshirý qarastyrylǵan, bul jyl saıyn shamamen 500 mıllıon teńge únemdeýge múmkindik beredi. Sondaı-aq, jer qoınaýyn paıdalanýshylardyń satyp alý úderisi aıasynda jergilikti ónimder kólemi men olardyń áleýmettik jaýapkershilik deńgeıi arttyrylady. Mysaly, Aqtóbe kásiporyndary 2016 jyly áleýmettik jobalarǵa 6,6 mıllıon dollar bóledi.
Memleket basshysy kezdesý qorytyndysy boıynsha Berdibek Saparbaevqa jumyspen qamtýǵa, óńir halqynyń ál-aýqatyn arttyrýǵa qatysty birqatar naqty tapsyrma berdi, sondaı-aq, oblysty áleýmettik-ekonomıkalyq damytýǵa baılanysty qoıylǵan barlyq maqsattar men mindetterdi sapaly júzege asyrý qajettigin aıtty.
Elaman Qońyr.
Derek, sýret: akorda.kz.