Keshe Qasym-Jomart Toqaevtyń tóraǵalyq etýimen Parlament Senatynyń otyrysy boldy, dep habarlady osy palatanyń baspasóz qyzmeti.
Otyrysty asha kelip, Senat Tóraǵasy Qazaqstan Respýblıkasynyń besinshi shaqyrylǵan Parlamenti Májilisiniń ókilettigin merziminen buryn toqtatý jáne Parlament Májilisiniń jáne barlyq deńgeıdegi máslıhattarynyń kezekten tys saılaýyn ótkizý týraly Elbasynyń Jarlyǵy shyǵýyna baılanysty joǵarǵy palata aldynda turǵan mindetterge senatorlardyń nazaryn aýdardy. «Prezıdenttiń bul sheshimi qoǵam men memleket úshin óte mańyzdy reformalardy júzege asyrýǵa jedel kirisip, daǵdarysqa qarsy sharalarǵa jańa serpin beretini sózsiz», – dep atap ótti Q.Toqaev.
Konstıtýsııaǵa sáıkes, Májilis ýaqytsha bolmaǵan kezde Parlamenttiń zań shyǵarý qyzmetin Senat atqarady. Bul jaǵdaıda Elbasynyń Ult Josparyn zańnamalyq turǵydan qamtamasyz etý úshin Senat Úkimetpen birlesip aýqymdy jumystardy úılesimdi túrde jalǵastyratyn bolady.
Q.Toqaev Senat depýtattary qoǵam men memlekettiń turaqty damýyna asa qajetti zańdardy qabyldaýda, ózderiniń mol tájirıbesi men tereń bilimin aıamaı jumsaıtynyna kúmán joq ekenin aıtty.
Otyrys barysynda Senat Qazaqstan men Halyqaralyq Qaıta qurý jáne Damý banki arasyndaǵy Qaryz týraly kelisimdi (Eńbek daǵdylaryn damytý jáne jumys oryndaryn yntalandyrý jónindegi joba) ratıfıkasııalady. Kelisim biliktilikti táýelsiz baǵalaý jáne sertıfıkattaý júıesin engizý jáne jetildirýge, jumyspen qamtý qyzmetin jaqsartýǵa, eńbekke jaramdy halyqty oqýǵa qol jetkizýin keńeıtýge baǵyttalǵan. Jobanyń quny – 25 345 mıllıon teńge – 137 mıllıon AQSh dollary, onyń ishinde syrtqy qaryzdardy respýblıkalyq bıýdjetten qosa qarjylandyrý esebinen 6,8 mıllıard teńge – 37 mıllıon AQSh dollary, syrtqy qaryz esebinen 18,5 mıllıard teńge – 100 mıllıon AQSh dollary. Jobany 2020 jylǵy 30 maýsymda aıaqtaý josparlanyp otyr.
Senatorlar zańnamaǵa sporttyq jáne sporttyq-buqaralyq, oıyn-saýyq, mádenı-buqaralyq is-sharalar ótkizý kezinde qaýipsizdikti qamtamasyz etý máseleleri boıynsha túzetýlerdi qabyldady. Qujat jergilikti atqarýshy organdardyń buqaralyq is-sharalardy ótkizýge qatystyrylǵan uıymdardyń qyzmetin úılestiretin uıymdastyrý komıtetterin qurýyn qarastyrady. Uıymdastyrýshylarǵa is-sharaǵa qatysatyn kórermenderdiń boljaldy sany týraly, satylǵan bıletterdiń, turaq oryndarynyń sany týraly jergilikti atqarýshy organdardy ýaqtyly habardar etý jónindegi mindetter júkteledi. Azamattardyń qaýipsizdigin qamtamasyz etý maqsatynda jeke tulǵalarǵa is-sharalarǵa barǵan kezde tyıym salýlar men shekteýler engiziledi. Atap aıtqanda, stadıondarǵa alkogol ónimderin, shyny jáne metall ydystaǵy ónimderdi, pırotehnıkalyq ónimderdi alyp kirýge, adamdar ómirine qaýip tóndiretin kez kelgen zattardy minbeler men sport alańdaryna laqtyrýǵa, áleýmettik, násildik, ulttyq jáne dinı arazdyq týǵyzatyn plakattar men emblemalardy paıdalanýǵa tyıym salynady.
Depýtattar, sonymen qatar, senatorlardy halyqaralyq parlamenttik uıymdarǵa jáne Senattyń shet memleketterdiń parlamentterimen yntymaqtastyq jónindegi toptaryna jiberý týraly máseleni qarady.