AQTО́BE. 21 qańtar. «Aqtóbe óńiriniń mýzykalyq murasy» atty aýdıojınaq jaryqqa shyqty. Aýdıojınaqtyń alǵysózin oblys ákimi Berdibek Saparbaev jazǵan. Jınaqqa Aqtóbe jerinde týǵan, ómir súrgen belgili aqyndar men halyq kompozıtorlarynyń shyǵarmalary engen. Qazaq handyǵynyń 550 jyldyǵyna oraı shyǵarylǵan án men kúı jıyntyǵynda 12 SD dısk bar. Oǵan 213 shyǵarma engizilgen. Bul týraly egemen.kz tilshisi habarlady.
Aqtóbe oblysy ákimdiginiń, Aqtóbe oblystyq mádenıet, muraǵattar jáne qujattama basqarmasy men Ǵazıza Jubanova atyndaǵy oblystyq fılarmonııanyń tapsyrysy boıynsha shyǵarylǵan jınaqqa engizilgen týyndylar keminde úsh ǵasyrdy qamtıdy. Antologııany shyǵarýshy prodıýser, mádenıettanýshy Albert Safýllınniń aıtýynsha, bul jınaqty shyǵarý úshin eki jyldaı ýaqyt ketken.
Qazaq rýhanııatynyń bir bólshegi – Aqtóbe óńiri de mýzykalyq muraǵa baı. Dáýlesker kúıshi Qazanǵaptan bastap, Bataqtyń Sarysy, Qyzyl Turdalyuly, Sarysholaq shaıyr, Boǵda Qarauly, Úsen tóre, Tarazy Kálenqyzy, osy jerde izi qalǵan Asan qaıǵy, Móńke Tileýuly, Shernııaz Jarylǵasuly, Aqtan Kereıuly, Ábýbákir Kerderi, Táńirbergen Moldabaı, Naýryzbek, Tileýmaǵambet jyraýlar, Nurpeıis Baıǵanın syndy ánshi-jyraýlar men halyq kompozıtorlarynyń, keıingi Ahmet Jubanov, Bákir Tájibaev, Ǵazıza Jubanova, Baqyt Basyǵaraev, Qadiráli Erjanov, Sádýaqas Balmaǵambetov sııaqty kompozıtorlardyń shyǵarmalary, Qýandyq Shańǵytbaev, Saǵı Jıenbaev, Meıirhan Aqdáýletuly, Ertaı Ashyqbaev, Baýyrjan Babajanuly, Qaıyrǵalı Qojanbaev, Beıbit Oraluly, Abdýlhamıt Raıymbergenov, Jaılaý Asylhanov syndy aqyndar, kompozıtorlar men kúıshilerdiń shyǵarmalary osy jergilikti rýhanı murany baıytyp tur.
Jınaqqa Aqtóbe topyraǵynda izi qalǵan áıgili Asan qaıǵy, Móńke Tileýuly, Shernııaz Jarylǵasuly, Aqtan Kereıuly, Ábýbákir Kerderi, Sarysholaq Boranbaıuly, Sary Bataquly, Qyzyl Turdalyuly, Tarazy Kálenqyzy, Táńirbergen Moldabaı, Nurpeıis Baıǵanın sııaqty jyraýlar men halyq kompozıtorlarynyń shyǵarmalary, óńirdiń án sheberleri men termeshileriniń oryndaýynda keń taralǵan dástúrli halyq ánderi, kóneden kele jatqan halyq kúıleri men dáýlesker kúıshi Qazanǵaptyń jáne onyń izbasarlarynyń teńdessiz kúıleri toptastyrylǵan. Sonymen qatar, qazirgi zamanǵy qazaq mýzyka óneriniń negizin qalaýshylardyń biregeıi akademık Ahmet Jubanovtyń, aqyn-kompozıtor Bákir Tájibaevtyń shyǵarǵan ánderi, kórnekti jerles aqyndar – Q.Shańǵytbaev, S.Jıenbaev, M.Aqdáýletuly, E.Ashyqbaev jáne basqalardyń sózderine jazylǵan tanymal kompozıtorlar men jergilikti sazgerlerdiń shyǵarmalary engizilgen.
Satybaldy Sáýirbaı.
Derek, sýret: egemen.kz.